Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat x. Capittel.

Iudith bereydt haer kostelick, ende neemt haer maecht met haer, ende gaet by nachte ter poorten wt inden legher Holofernis.

A.1

DOe sy nu wt ghebeden hadde, ⁺ stondt sy op, ende riep hare maghet Abra,

+ Abra Iudith maghet.

2

Ende ghinck henenonder int huys, ^a ende leyde den sack af, ende tooch hare weduwenkleederen wt,

a 2.Hest. a.1.

3

Ende wiesch haer, ende salfde haer met kostelicken water, ende vlechtede hare hayr, ende settede een huyue op, ende tooch hare schoone kleederen aen,

4

Ende vercierde haer met spanghen ende ghesmijde, ende tooch alle hare cieraet aen: ende de Heere gaf haer ghenade, dat sy lieffelick aen te sien was: want sy en vercierde haer niet wt curioosheyt, maer Gode te loue.

5

Ende sy dede harer maghet eenen gepeckten wijnbalch vol wijns, ende een kruycke met olye, ende eenen sack, daer sy vijghen, meel, ende broot inne hadde, dat sy eten mochte: ende sy ghinck henen.

6

^b Ende aen de poorte vandt sy Osiam ende de Oudesten, die harer wachteden, gelijck het verlaten was.

b Iudith. 8.c.29.

7

Ende sy verwonderden hen, dat sy so schoone was.

8

Doch nu en vraechden sy niet, wat sy inden sinne hadde, maer lietsense henenwt, ende spraken: De God onser vaderen, gheue dy ghenade, ende late dijn voornemen wel ghelucken: dat hem Israel dyner verheughe, ende dynen Name gherekent worde onder de Heylighen.

9

Ende alle die daer waren, spraken, Amen, amen.

B.10

Maer Iudith badt, ende ginck voort met harer maecht Abra.

11

Ende doe sy smorghens vroech den berch henenaf ghinck, beiegenden haer de wachters der Assyriers, ende liepen haer aen, ende vrachden haer, van waer sy quame, ende waer sy henen woude.

12

Ende sy antwoordde: ^c Ick ben een Hebreische vrouwe, ende ben van hen gheuloden: want ick weet het, dat sy v in de handen komen sulten: daer omme dat sy v verachtet hebben, ende niet en wouden ghenade soecken, ende hen ghewillichlicken gheuen.

c Iudith. 8.a.1. ende 3.a.8.

13

Daeromme hebbe ick my voorgenomen, by den Vorst Holofernes te komen, dat ick hem hare heymelickheyt openbare, ende segghe hem, hoe hyse lichtelicken ouerwinnen moge, dat hy niet eenen man verliesen en derf.

14

Dewijle dat sy so sprack, sagen syse aen, ende verwonderden hen gantsch seere, dat sy so schoone was,

15

Ende spraken: Dat mochte dy helpen, dat du het so goet meynest, ende tot onsen heere gaen wilt.

16

Want wanneer du voer hem koemst, so sal hy dy ghenadich zijn, ende salt hem van herten wel gheuallen: ende sy brachtense henen in Holofernes tente, ende seyden hem van haer.

17

Ende doe sy voor hem quam, ^{+ d} wert hy also haest aenghesteken teghen haer.

+ Iudith koemt tot Holofernes.

d Syrach 9.a.9. Iudith 16.a.9.

18

Ende syne dienaers spraken onder malcanderen: Dat Hebreische volck en is trouwen niet te verachten, dewijle dat het schoone vrouwen heeft: soude men om sulcker schooner vrouwen willen niet krijghen?

19

^e Doe nu Iudith Holofernem sach sitten onder zijn tapijt, dat schoon ghewercket was, met purpuren ende goude, ende met smaragden, ende velen edelen steenen verciert,

e 2.Hest. 4.a.3.

20

Viel sy voor hem neder, ende badt hem aen: ende Holofernes hietse weder op richten.