Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

Iudith gaet in haer kamer, ende aenroept God met een ootmoedich ende hertelick ghebedt, dat hy haer volck bescherme.

[fol. 23r]

A.1

DAer na ghinck Iudith in hare kamer, ⁺ ende bekleedde haer met eenen sacke, ende stroyde asschen op haer hooft, ende viel neder voor den Heere, ^a ende schreyde tot hem, ende sprack:

+ Iudith ghebet.

a Hebre. 2.a.2.

2

^b Heere God mijns vaders Simeon, ^c dien du het sweert ghegheuen hebst, de Heydenen te straffen, die de maghet veronteert, ende te schanden ghemaeckt hadden.

b Gene. 24.b.12.

c Gene. 34.c.25.

3

Ende hebst hare wijuen ende dochteren wederom vanghen, ende haer beroouen laten, door dyne knechten, die daer in dynen ijuer gheijuert hebben: helpt my arme weduwe, Heere mijn God.

4

Want alle hulpe, die in voortijden, ende hierna oyt geschiet is, die hebstu ghedaen, ende wat du wilt, dat moet gheschieden.

5

Want wanneer du helpen wilt, so en kant niet feylen: ende du weetst, hoe du de vyanden straffen salt.

6

Schouwet als nu op der Assyriers heyr? ^d gelijck als du in voortijden, op der Egyptenaers heyr, sagest, doe sy dynen knechten naiageden, met grooter macht, ende verlieten hen op hare waghenen, ruyteren, ende groote krijchsuolck.

d Exod. 14.c.24.

7

Ende doe duse aensaghest, werden sy vertzaghet,

8

Ende de diepte ouerrasschedese, ende het water versoopse.

9

Also geschie oock nu desen, Heere, ^e die daer pocchen op hare macht, waghenen, spiessen, ende gheschut,

e Psalm. 20.a.8. 2.Reg. 19.c.22. Iudith 1.a.4.

B.10

Ende en kennen dy niet, ende en dencken niet, dat du Heere onse God de ghene zijst, die du de krijghen stuerest van aenbeghinne, ende heetst billicken, Heere.

11

Strecket dynen arm wt, als in voortijden, ende slaet te morsel de vyanden door dyne macht: dat sy omkomen door dynen toorne, die hen beroemen, sy willen dijn Heylichdom verstooren, ende de hutten dijns Naems ontheyligen, ende met haren sweerde dynen Altaer omwerpen.

12

Straffet haren hoochmoet, door haer eyghen sweerdt:

13

Dat hy met synen eyghen ooghen gheuanghen worde, wanneer hy my aensiet, ende door myne vriendelicke woorden bedroghen worden.

14

Gheeft my eenen moet, dat ick my voor hem, ende voor syner macht, niet ontsette, maer dat ick hem ^f storten moghe.

f Dat is, te neder worpen

15

Dat sal dijns Naems eere zijn, ^g dat hem een wijf neder gheleyt heeft.

g Iudic. 4.a.9. c.21. ende 5.c.23.

16

^h Want du Heere, kanst wel ouerwinninghe gheuen, sonder alle veelheyt, ⁱ ende en hebst gheenen lust aen der sterckheydt des peerts: dy ^k en hebben de hooueerdighen, noch noyt behaecht: doch alle tijt, heeft dy wel behaecht, der ellendighen ende ootmoedighen ghebet.

h 2.Para. 14.b.11. ende 16.a.8. ende 20.b.12.15. Iudic. 7.a.2.7.

i Psal. 147.b.10.

k Syrach. 10.a.9. Luce. 1.e.47.

17

O Heere, een God des Hemels, Schepper der wateren, ende Heere aller dinghen, verhoort mijn arme ellendich ghebedt, die ick alleene op dyne barmherticheyt vertrouwe.

18

^l Dencket Heere aen dijn verbondt, ende gheeft my in, wat ick spreken ende dencken sal, ende gheeft my gheluck daer toe: op dat dijn huys blijue.

l Syrach. 36.a.9.

19

Ende alle Heydenen gewaer worden, dat du God bist, ^m ende gheen ander, sonder alleene du.

m Deute. 32.d.39.