Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vj. Capittel.

Achior wort gheuanghen, ende den Iodischen volcke ouergheleuert, den welcken Achior alle dinck vertelt, waer door het volck beweecht zijnde, tot God om hulpe gheroepen heeft.

A.1

DAer na vergrimmede Holofernes oock ouer Achior, ⁺ ende sprack:

+ Holofernes lastert God.

2

^a Hoe derfstu ons propheteren, dat dat volck Israels, van synen God soude beschuttinghe hebben?

a Iudith 5.c.25.

3

^b Wanneer wyse dan nu slaen, ghelijck als eenen mensche, so saltu sien, dat daer gheen ander God en is, dan alleen NebucadNezar: ende dan saltu oock, door der Assyries sweerde, met hen doorsteken worden, ende gantsch Israel sal met dy omkomen.

b Iudith. 13.c.27.

4

So saltu ghewaer worden, dat NebucadNezar, een heere der gantscher werelt zy, wanneer du met mynen sweerde doorsteken worst, ende ligst onder den verslagenen Israels, ende moest steruen ende verderuen.

5

Meynstu nu, dat dyne propheteringhe ghewisse is, so en doruestu niet verschricken noch bleeck worden.

6

Also het hen gaen sal, so sal dy oock gaen:

[fol. 22r]

want ick wil dy als nu tot schicken, op dat ick dy met hen straffe.

7

Doe beual Holofernes synen knechten, ⁺ dat sy Achior grijpen souden, ende henen na Bethulia voeren, in de handen der kinderen Israels.

+ Achior wort na Bethulia gheuoert.

8

Ende de knechten Holofernis grepen hem, ende doe sy ouwer het vlacke velt aen het geberchte quamen, doe toghen de schutters teghen haer wt.

9

Doe weken sy op een zijde aenden berghe, ende bonden Achior aen eenen boom, met handen ende voeten, ende stieten hem henen onder, ende lieten hem also hanghen, ende toghen weder tot haren heere.

B.10

Doch de kinderen Israels, quamen nederwaert van Bethulia tot hem, ende maeckten hem los: ende brachten hem henen in tot Bethulia, ende leydden hem onder het volck, ende vraechden hem, hoe dat toeghegaen ware? waeromme hem de Assyriers ghehanghen hadden?

11

Terseluer tijt waren de Ouersten inder stadt, ⁺ Osias de sone Micha, vanden stamme Simeon, ende Charmi, die oock Othoniel hiet.

+ Osias. Charmi.

12

Voor desen Oudtsten ende voor allen volcke, seyde Achior, ^c alles wat hem Holofernes gheuraecht, ende wat hy gheantwoort hadde: ende dat hem Holofernes lieden om deser antwoorde wille, hadden dooden willen.

c Iudith. 5.a.3.5.

13

Doch Holofernes hadde beuolen, men soude hem den kinderen Israels ouerleueren: op dat, wanneer hy de kinderen Israels gheslagen hadde, dat hy hem, namelicken Achior, dan oock woude straffen ende ombrengen: daeromme dat hy gheseyt hadde, ^d De God des Hemels soude haer beschermer zijn.

d Iudith 5.c.25.

14

Doe Achior sulcks gheseydt hadde, ⁺ viel alle dat volck op haer aenghesichte, ^e ende baden den Heere aen, weenden alle te gelijcke, ende baden den Heere, ende spraken:

+ Een ernstlick ghebet der Israeliters.

e 2.Mach. 13.b.12.

15

^f Heere God des Hemels ende der Aerde, siet aen haren hoochmoedt ende onse ellende, ende siet dyne Heylighen ghenadichlick aen, ende bewijset, dat du ^g de ghenen niet en verlatest, die op dy hopen, ende stortest, ^h die op henseluen ende hare macht pochen.

f Matth. 11.c.25.

g Syrach. 2.b.12.

h Psalm. 20.a.8. 2.Reg. 19.c.22.

16

Also weenden ende baden sy den gantschen dach, ende troosteden Achior,

17

Ende spraken: De God onser vaderen, diens macht du ghepresen hebst, sal het dy also vergelden, dat sy haren lust aen dy niet sien, maer dat du siest, ho sy gheslagen ende verdelghet worden.

18

Ende wanneer ons de Heere onse God verlosset, so zy God met dy onder ons: ende wiltu, so saltu met alle den dynen by ons woonen.

19

Doe nu het volck weder van malcanderen ginck, nam hem Osias met hem in zijn huys, ende richtede een groote auontmaeltijdt aen,

C.20

Ende badt tot hem alle Oudtsten, ende leefden wel, na dien sy langhe gheuastet hadden,

21

ⁱ Daer na wert het volck weder te samen gheroepen, ende baden om hulpe, vanden God Israels, in der Versamelinghe, de gantsche nacht.

i Ioel. 2.b.15.