Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

Uele Koninghen, Uorsten ende Landen, geuen haer onder hem wt verschrickinge, ende worden hem onderdanich. De grouwelicke tyrannie Holofernis ende hoochmoedt des Konincks.

A.1

DOe schickeden de Koningen ende Vorsten van Syrien, ⁺ Mesopotamien, Syrien Sobal, Libien ende Cilicien, hare ^a Ambassadeurs, wt allen steden ende landen, die quamen tot Holofernes, ende spraken:

+ Vele Koningen ende Vorsten worden ouerweldighet.

a boodtschappe

2

Wendet dynen toorne van ons: want het is beter dat wy NebucadNezar den grooten Koninck dienen, ende dy gehoorsaem zijn, ende leuendich blijuen, dan dat wy ommekomen, ende en winnen doch ghelijckewel niets.

3

Alle onse steden, goederen, berghen, ende kleyne berghen, ackeren, ossen, schapen, gheyten, peerden, ende kemelen, ende wat wy slechs hebben:

4

Daertoe oock onse ghesinde, is altemael dyne, doet daer mede, wat du wilt.

5

Ia oock wy, met tsamen onsen kinderen, zijn dyne knechten.

6

Koemt tot ons, ende weest onse ghenadighe Heere, ende ghebruyckt onses diensts, als het dy slechs behaecht.

7

Doe tooch Hoolofernes van het gheberchte af, ⁺ met den gantschen krijchsuolcke, ende nam de vaste steden, ende het gantsche lant in.

+ Tyrannie ende hoochmoedt Holofernis.

8

Ende las daer knechten wt, het beste volck, dat hy onder haer vandt:

9

Daeruan verschrocken alle landen so seer, dat de Regenten ende voorneemsten, wt allen steden, met tsamen den volcke, ^b hem teghen quamen,

b Iudic. 5.a.4.

B.10

Ende namen hem aen, met kranssen, keerssen, reyen, bommen, ende pijpen.

11

Ende en konden dannoch met sulcker eere, gheen ghenade verkrijghen.

12

Want hy verbrack hare steden, ende hieu hare ^c† haghen omme.

c† And. wouden

13

Want NebucadNezar de Koninck hadde hem gheboden, dat hy alle Goden inden landen verdelghen soude: op dat alle volcken, die Holofernes bedwinghen soude, hem alleene voor eenen God prijseden.

14

Doe hy nu Syrien Sobal, Apamean ende Mesopotamien doortoghen hadde, quam hy tot den Edomiters int lant Gabaa,

15

Ende nam hare steden in, ende lach daer dertich daghen lanck: te wijle riep hy zijn krijchsuolck altemael te samen.