Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

Uan NebucadNezars ouergroote begeerte, tot heerschappie, ende om landen in te nemen, van zijn Heyrkracht de tyrannische daden.

A.1

INden dertienden Iare NebucadNezars des Konincx, ⁺ aen den twee ende twintichsten daghe der eerster maendt, werdt gheraedtslaget in den huyse NebucadNezars, des Konincx van Assyrien, dat hy hem woude wreken.

+ NebucadNezar trachtet vele landen onder hem te brenghen.

2

Ende hy ontboot alle syne Raetsheeren, Vorsten ende Hooftlieden tot hem, ende raetslaghede heymelicken met hen,

3

Ende hieldt hen voor, hoe hy dachte alle dese landen onder zijn Rijcke te brenghen.

4

Doe sulcx hen alle wel behaghede, eysschede de Koninck NebucadNezar, Holofernem synen Veldthooftman tot hem, ende sprack:

5

Trecket wt teghen alle Rijcken, die teghent Westen ligghen, ende sonderlicken teghen die, die mijn ghebodt verachtet hebben.

[fol. 21r]

6

^a Du en salt gheen Rijcke verschoonen, ⁺ ende alle vaste steden, saltu my onderdanich maken.

a Hesek. 9.a.5.

+ Holofernes.

7

Doe riep Holofernes de Hooftlieden, ende Ouersten des Assyrischen krijchsuolcx tot hem, ende rustede het volck ten krijghe, als hem de Koninck gheboden hadde, ^b hondert ende twintich duysent te voete, ende twaelf duysent schutters te peerde.

b Iudith. 7.a.2.

8

Ende liet alle zijn krijchuolck, voor hem henen trecken, met ontallicken kemelen, grooter prouande: daertoe met ossen ende schapen sonder ghetal, voor zijn volck.

9

Ende liet wt gantsch Syrien koorne toeuoeren, in zijn heyr.

B.10

Goudts ende ghelts nu, nam hy wtermaten vele, met hem, wt des Konincx kamer.

11

Ende tooch also voort, met den gantschen heyre, met waghenen, ruyteren ende schutters, welcke den Aerdtbodem bedeckten als sprinckhanen.

12

Doe hy nu ouer de landtpale des Assyrischen landts ghetoghen was, quam hy aen het groote geberchte Ange, tot der slincker zijden Cilicien, ende nam alle hare vlecken, ende vaste steden in.

13

Ende verstoorde Melothi, een beroemde stadt: ende beroofde alle lieden in Tharsis, ende de kinderen Ismaels, die daer woonden teghen der woestijne, ende teghent Suyden des landes Chellon.

14

Hy tooch oock ouer den ^c Phrat, ende quam in Mesopotamien, ende verstoorde alle hooghe steden, die hy vandt, vander beke ^d Mambre aen, tot aen de Zee:

c Gene. 2.b.14.

d Gene. 33.b.18.

15

Ende nam daer de landtpale in, van Cilicien aen, tot aen de lantpale Hoppe, die tegent Suyden ligghen.

16

Ende voerde oock wech de kinderen Midian, ende roofde alle haer goet: ende sloech alle die hem wederstonden, met der scherpte des sweerts.

17

^e Daer na reysde hy henenaf, int landt Damasken, inden oogst, ende verbrandde alle haer koorne, ende liet neder houwen alle boomen, ende wijnberghen.

e Deut. 20.b.19. Iudic. 15.a.5.

18

^f Ende het gantsche landt vreesde hem voor hem.

f Iosu. 2.a.9. ende 5.a.1.