Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiij. Capittel.

De oude Tobias loeft God, ende vermaent oock de andere God te louen.

A.1

TObias nu dede synen mondt op, ⁺ loefde God, ende sprack: Heere, du bist een groot sterck God, ende dijn Rijcke ^a dueret eewichlick.

+ Eene dancksegghinghe des Tobie.

a Iesa. 9.a.6. Dani. 2.e.44. ende 4.a.2. ende 7.b.14. Luc. 2.c.29.

2

^b Du ^c tuchtighest ende troostest weder: du kanst in de Helle stooten, ende weder daerwt brenghen: ^d dyner handt en kan niemandt ontulieden.

b 1.Sam. 2.a.6. Deut. 32.d.37. Sapi. 16.b.13.

c Of, castijest

d Ione 1.a.3. Sapi. 16.b.15.

3

Ghy kinderen Israels, loeft den Heere, ^e ende prijset hem voor den Heydenen.

e Psalm. 18.f.50. Rom. 15.a.9.

4

Want daerom heeft hy v verstroyet onder de Heydenen, die hem niet en kennen, op dat ghy syne wonderen verkondiget, ende de Heydenen bekennen, ^f dat daer gheen Almachtigher God en is, dan hy alleene.

f Deut. 32.d.39. Iesa. 43.b.10. ende 45.a.5.

5

Hy heeft ons ^g ghetuchticht om onser sonden wille, ende door syne goedicheyt helpet hy ons weder.

g Iere. 31.b.18.

6

Siet, wat hy by ons ghedaen heeft, ende met vreesen ende beuen, loeft hem in synen wercken, ende prijset dien, die eewich heerschet.

7

Ende ick wil hem oock prijsen, in desen lande, daer wy geuancklick inne zijn: want hy heeft syne wonderen, ouer een sondtlick volck vertooghet.

8

^h Daerom bekeeret v ghy sondaers, ende doet wat goets voor God, ende gheloouet, dat hy v goedt bewijset.

h Iesa. 55.a.7. Hesek. 18.c.27. ende 33.b.11. Iacob. 4.a.8.

9

Ende ick wil my nu van herten verheughen in God.

B.10

Loeft den Heere syne wtuerkorene, houdet vreuchdendaghen, ende prijset hem.

11

Ierusalem du ⁱ stadt Gods, God sal dy tuchtighen om dyner wercken wille: ⁺ maer hy sal hem dyner weder ontfermen.

i 2.Para. 6.a.6.

+ Propheteringhe Tobie van der thuysuaert der gheuanckenisse.

12

Loeft den Heere voor syne gaue, ende prijset den eewighen God, ^k dat hy dyne hutten weder bouwe: ende alle dyne gheuangen weder hale, dat du dy eewichlick verheughen moghest.

k Psalm. 147.a.2.

13

^l Du salt ghelijck als een klaer glantz lichten, ende aen allen eynden op Aerden, salmen dy eeren.

l Luc. 2.d.32.

14

^m Van verren landen salmen tot dy komen, ende gheschencken brenghen: in dy salmen den Heere aenbidden, ende du salt het Heylichdom heeten.

m Iesa. 6.a.6. Matth. 8.b.11. Act. 2.a.5.

15

Den grooten Name des Heeren, sullen sy in dy aenroepen.

16

ⁿ Veruloeckt sullen zijn, alle die dy verachten: verdoemet sullen zijn, alle die dy lasteren: gheseghenet sullen zijn, alle die dy bouwen.

n Gene. 12.a.3. Num. 24.a.9.

17

Ende du salt dy verheughen ouer dyne kinderen, want sy sullen alle gheseghent ^o ende tot den Heere ghebracht worden.

o Iesa. 66.c.20.

18

^p Wel dien, die dy lief hebben, ende die dy wenschen, dat het dy wel gae.

p Psalm. 122.a.6.

19

^q Myne ziele loeft den Heere, want de Heere onse God, ^r sal de stadt Ierusalem, van alle harer droeffenisse verlossen.

q Psalm. 103.a.1. ende 104.a.1. ende 146.a.1.

r Apoc. 21.a.4.

C.20

Wel my, so de ouerbleuenen van mynen zade, Ierusalem sien sullen in syner heerlicheyt.

21

^s De poorten Ierusalems, sullen van Saphir ende Smaragden ghebouwet worden, ende alle hare mueren, van edele steenen rondt omme henen.

s Apoc. 22.b.18. Iesa. 54.b.12.

22

Met witten ende reynen marmorsteene, sullen alle de straten ghesteenbrugghet worden, ende in allen straten salmen Halleluya singhen.

23

Gheloeft zy God, diese verhooghet heeft, ende zijn Rijcke blijue eewichlick ouer haer, Amen.