Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat x. Capittel.

Dewijle Tobias om der Bruyloft wille vertoeft, wort zijn vader seer bekommert, ende zijn moeder weent seer, ende en wil haer niet laten troosten, als Tobias langhe om verlof ghebeden heeft ende niet langher blijuen wil, so laet hem Raguel zijn sweer reysen met zijn wijf.

A.1

ALs nu de Ionghe Tobias, ⁺ syner Bruyloft haluen, lange wt was, begonst de oude Tobias zijn vader te sorghen, ende sprack: Waerom mach doch mijn sone so lange wt zijn? ende wat mach hem doch ophouden.

+ Tobias de oude.

2

Misschien is Gabel ghestoruen, ende niemandt en wil hem dat ghelt weder gheuen.

3

Ende werden gantsch treurich, ⁺ beyde Tobias ende zijn Huysvrouwe Hanna, ende weenden allebeyde, dat haer sone, op de bestemmede tijt, niet weder te huys en quam.

+ Hanna des ionghen Tobias moeder weenet. Tobi. 5.c.23.

4

Ende zijn moeder weende so seer, dat sy haer niet en woude troosten laten, ende sprack: Och mijn sone, och mijn sone, waerom hebben wy dy laten wandelen, onse eenighe vreuchde, onsen eenighen troost, in onsen ouderdom, onse herte ende onse ^a erue?

a Of, erfgename?

5

Wy hadden schats genoech ghehat, wanneer wy dy niet hadden henenwech trecken laten.

6

Ende Tobias sprack tot haer: Swijcht stille, ende weest te vreden, onsen sone gaet het, oft God wil, wel: hy heeft eenen goeden trouwen gheselle met hem.

7

Maer sy en woude haer niet troosten laten, ende liep alle daghen henenwt, ^b ende sach op alle heerstraten, van daer hy komen soude, oft sy syner erghens ghewaer werde.

b Tobi. 11.a.5.

8

Raguel nu sprac tot syner dochter manne Tobia: Blijft by ons, ick wil eenen bode henen senden, tot Tobia dynen vader ende hem weten laten, dat het dy wel gaet.

9

Ende Tobias sprack: Ick weet het, dat mijn vader ende moeder, als nu alle daghen ende vren rekenen, ende zijn mynent haluen seer bekommert.

B.10

Ende als Raguel met velen woorden Tobiam badt, ende hy het gheenerley wijs verwillighen en woude, beual hy hem Saram: ende gaf hem de helfte aller syner goederen, aen knechten ende maechden, aen vee, kemelen ende runderen, ende vele goedts: ende lieten ghesont ende vrolick van hem trecken,

11

Ende sprack: ^c De heylighe Enghel des Heeren, ⁺ zy by dy op den weghe, ende brenge dy ghesondt weder te huys, dat du dyne ouderen ghesondt vindest: ende God gheue, dat myne oogen, uwe kinderen moghen sien, eer ick sterue.

c Tobi. 5.c.20.

+ Raguel ende Hanna, seghenen ende verlaten hare dochteren.

12

^d Ende de ouderen namen de dochter, kussedense, ende lietense van hen.

d Gene. 24.g.60.

13

Ende vermaendense, dat sy ymmers soude haers mans ouderen, in eeren houden, als hare eyghen ouderen, ^e haren man lief hebben, het ghesinde vlijtighen regeren, ende haer selues tuchtighen houden.

e Tit. 2.a.5. 1.Pet. 3.a.1.