Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat viij. Capittel.

Doe Tobias met zijn wijf ghinck slapen, so hieldt hy hem ghelijck hem de Enghel gheboden hadde, ende sy werden beyde voor schade bewaert.

A.1

ENde na der auondtmeltijdt, ⁺ brachten sy den Iongen Tobiam, tot der Ionckvrouwen in de kamer.

+ Tobias wordt Sara by geleyt

2

^a Ende Tobias dachte aen de reden des Enghels, ende langhede wt synen buydel een stuck van der leuere, ende leyde het op de gloeyende kolen.

a Tob. 6.a.4.

3

Ende de ^b Enghel Raphael, nam den Gheest gheuancklick, ende bandt hem in de woestijne verre in Egypten.

b Apoc. 20.a.2.

4

Daerna vermaende Tobias de Ionckvrouwe, ende sprack: ^c Sara, staet op, ende laet ons God bidden, heden ende morghen, ende ouermorghen, want dese dry nachten willen wy bidden: daerna willen wy ons te samen houden als Echte lieden.

c 1.Corint. 7.a.5.

5

^d Want wy zijn kinderen der Heylighen, ende ons en behoort niet, sodanighen staedt te beghinnen, gelijck als de Heydenen, die God verachten.

d Tob. 2.b.18.

6

^e Ende sy stonden op, ende baden vlijtighen, datse God behoeden woude.

e Tob. 6.b.18.

7

Ende Tobias badt, ⁺ ende sprack: Heere mijn God, du God onser vaderen, ^f dy sullen louen, Hemel, Aerde, de Zee, alle wateren ende fonteynen, ende alle creatueren, ende wat daerinne is.

+ Een ghebedt des Ionghen Tobie, in den beghinne des houwelicks.

f Psalm. 148.

8

^g Du hebst Adam ghemaeckt van eenen Aerden klotte, du hebst hem Heuam ghegheuen tot eener helperschen.

g Gene. 2.a.7.c.22.

9

Ende nu Heere, du weetst, dat ick niet booser lust haluen, dese myne suster ten wijue ghenomen hebbe, maer dat ick moghe kinderen genereren, daerdoor dynen Name, eewichlick gepresen ende gheloeft worde.

B.10

Ende Sara sprack: Heere, ontfermet dy onser, dat wy beyde ghesondt, onse ouderdom moghen verkrijghen.

11

Ende omtrent de middernacht riep Raguel syne Dienaren, ende ghinck met hen, dat sy een graf maeckten.

12

Want hy sprack: Het mochte hem misschien oock gegaen zijn, als den anderen seuen, die met haer vertrouwet gheweest zijn.

13

Ende als sy dat graf gemaeckt hadden, quam Raguel met synen wijue, ende sprack:

14

Sendet eene maecht henen, ende laetse toesien, oft hy oock doodt zy, op dat wy hem voor den daghe begrauen.

15

Ende de maecht sleeck in de kamer, vandtse beyde ghesondt ende frisch, ende slapende by malcanderen.

16

Ende sy bracht hem de goede bootschap: ende Raguel ende zijn wijf Hanna danckede God, ende sprack:

17

Wy dancken dy Heere, ⁺ du God Israels, dat het so niet gheschiet en is, als wy besorgheden.

+ Raguel ende Hanna louen God.

18

Want du hebst barmherticheydt aen ons bewesen, ende hebst onsen vyant, die ons leedt dede, verdreuen.

19

Du hebst dy ontfermet, ouer dese twee eenighe kinderen, ende nu Heere gheeft hen, dat sy dy alle tijdt louen, voor sulcke ghenade, ^h ende dy alle tijdt prijs ende lof offeren: op dat andere lieden aen hen bekennen, ⁱ dat du alleene God bist, in der gantscher wereldt.

h Hebr. 13.b.15.

i Deut. 32.d.39. Iesa. 43.b.10. ende 45.a.5.

C.20

Ende also haest beual Raguel, dat sy dat graf weder toewierpen, eer het dach werde.

21

Ende synen wijue beual hy, dat sy eene maeltijdt weder bereydede: ende beschickte hen alle noodtruft op den wech.

22

Ende hy hiet twee vette runderen slachten, ende vier schapen, ende noodde alle syne nabuers ende vrienden te gaste.

23

Ende Raguel vermaende ende badt Tobiam hoochlicken, dat hy twee weken woude by hem blijuen:

24

Ende van alle synen goederen, gaf hy Tobie de helfte: ^k ende maeckte eene voorschrijuinghe, dat na synen doodt de ander helft, Tobie oock gheworden soude.

k Tob. 14.b.16.