Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vij. Capittel.

Sy komen tot Raguel, de welcke hen vriendelic ontfanghet, ende gheeft Tobie syne dochter Saram.

A.1

ENde sy toghen tot Raguel in: ⁺ ende Raguel ontfinckse met vreuchden.

+ Sy komen tot Raguel, die ontfanghet hen vriendelick.

2

Ende hy sach Tobiam aen, ende sprac tot Hanna syner vrouwen: Hoe ghelijck siet de ionghe gheselle onsen ^a neue. ⁺

a sustersone

+ Hanna Raguelis wijf.

3

Ende als hy dat seyde, sprack hy: Van waer zijt ghy, lieue broeders? sy spraken: ^b Wt den stamme Naphthali zijn wy, ^c van den gheuanghenen in Niniue.

b Tob. 1.a.1.

c 2.Reg. 17.a.

4

Raguel sprack tot hen: Kennet ghy Tobiam mynen broeder? ende sy spraken tot hem: Ia, wy kennen hem wel.

5

Ende als hy nu vele goedts van Tobia seyde, sprack de Enghel tot Raguel: Den Tobias, daer du na vraghest, is deses Ionghelincks vader.

6

Ende Raguel neychde hem tot hem, weende, ende viel hem om den hals, ende kussede hem,

7

Ende sprack: O mijn lieue sone, ^d gheseghenet zijstu, want du bist eens rechten vromen mans sone.

d Tob. 9.a.7.

8

Ende Hanna zijn wijf, ende Sara haer dochter, begonsten oock te weenen.

9

Daerna hiet Raguel een schaep slachten, ende de maeltijdt bereyden: ende als sy baden, dat sy hen wouden ter tafelen setten,

B.10

Sprack Tobias: ^{+ e} Ick en wil heden niet eten noch drincken, dy beuestighest my dan een bede, ende segghest my toe, Saram dyne dochter te gheuen.

+ Tobias handelet om Sara.

e Gene. 24.d.33. 1.Sam. 16.b.11.

11

Doe dat Raguel hoorde, verschrack hy: want hy dachte daeraen, wat den seuen mannen ^f geschiet was, dien hy te voren syne dochter ghegeuen hadde, ende vreesde, het mochte desen oock also gaen: ende doe hy niet antwoorden en woude,

f Of, beieghent

12

Sprac de Engel tot hem: Vreest dy niet, hem de maecht te geuen: want dyne dochter is hem ten

[fol. 19r]

wijue bescheert, dewijle hy God vreest: daerom en heeft dijn dochter, gheenen anderen gheworden konnen.

13

Doe sprack Raguel: Ick en twijuel daer niet aen, dat God myne bittere tranen ende ghebet, verhoort hebbe:

14

Ende ghelooue, dat hy v daerom heeft laten tot my komen: op dat mijn dochter desen kreghe, wt haren gheslachte, ^g na de Wet Mosi: ende nu en hebbet gheenen twijuel daeraen, ^h ick wilse dy gheuen.

g Num. 36.a.6. 1.Corint. 7.d.39.

h Tobie 6.b.11.

15

Ende nam de handt der docher, ⁺ ende sloechse Tobie in syne handt, ende sprack: De ⁱ God Abrahams, de God Isaacs, de God Iacobs, zy met v, ende helpe v te samen, ende gheue synen seghen rijcklicken ouer v.

+ Den Ionghen Tobias wordt de Sara vertrouwet.

i Exod. 3.a.6. Matth. 22.d.32.

16

Ende sy namen eenen brief, ende schreuen de ^k houwelickstichtinghe,

k contract

17

Ende loefden God, ende hielden maeltijdt.

18

Ende Raguel riep zijn wijf Hannam tot hem, ende hietse de andere kamer toerichten.

19

Ende brachten Saram syne dochter daer henen in, ende sy weenede.

20

Ende hy sprack tot haer: Hebbet eenen goeden moedt, mijn dochter: de Heere des Hemels gheue dy vreuchde, ^l voor dat leedt, dat du gheleden hebst.

l Tobie 3.a.7.