Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vj. Capittel.

Op den wech vanghen sy in een water eenen grooten visch, daeruan ghebiedt hem de Enghel sommighe dingen te bewaren, ende gheeft hem te kennen waertoe hem die sullen nut zijn.

A.1

ENde Tobias tooch henen, ^{+ a} ende een hondeken liep met hem: ende de eerste dachreyse bleef hy by den water Tigris.

+ Hoe de Ionge Tobias eenen visch vanghet, ende wat hem de Engel daeruan bewaren heet.

a Tob. 11.a.9.

2

Ende ghinck henen, op dat hy syne voeten wiessche, ende siet, een groot visch schoot daerwt, hem te verslinden:

3

Voor welcken Tobias verschrack, ende schreyede met luyder stemmen, ende sprack: O Heere, hy wil my verslinden.

4

Ende de Enghel sprack tot hem: Grijpt hem by den kouwen, ende recket hem wtwaerts: ende hy tooch hem op het landt: doe wierp hy hem voor syne voeten.

5

Doe sprack de Enghel: Houwet den visch van eenander: het herte, de galle ende de leuer, bewaert dy: want sy zijn seer goet ter ^b meesterije.

b Of, medicijne

6

Ende sommighe stucken van den vissche, brieden sy, ende namense mede op den wech: dat ander soutteden sy in, op dat sy het onderweghen hadden, tot dat sy quamen in de stadt Rages in Meden.

7

Doe vraghede Tobias den Enghel, ende sprack tot hem: Ick bidde dy Azaria mijn broeder, dat du my willest segghen, watmen voor meesterije maken kan, vanden stucken, die du hebst heeten bewaren?

8

Doe sprack de Engel: Wanneer du een stucxken vander herten, legst op de gloeyende kolen, so verdrijft den rooc allerley boose ^c speuckerie, van mans ende van vrouwen, also, dat sy gheene schade meer doen en kan.

c Of, ghespuys, gheestuertooninghe

9

Ende de galle van den vissche, is goedt de ooghen daermede te saluen, dat sy eenen het staer verdiijue.

B.10

Ende Tobias sprack: Waer willen wy dan ter herberghe trecken? ende de Enghel antwordde,

11

Ende sprack: ⁺ Hier is een man met namen Raguel, dijn bloedturiendt van dynen stamme, die heeft maer eene eenighe dochter, ⁺ die heet Sara, ende anders gheene kinderen meer.

+ Raguel.

+ Sara.

12

^d Dy zijn alle syne goederen bescheert, ende du salt de dochter nemen.

d Num. 27.a.8. ende 36.a.8.

13

^e Daerom handelt om haer by haren vader, so sal hyse dy gheuen ten wijue.

e Tobi. 7.b.15.

14

Doe sprack Tobias: Ick hebbe gehoort, ^f dat sy alreede te voren seuen manne vertrouwet is, die zijn alle doodt, ende daertoe seydtmen, een boose gheest hebbe haer ghedoodet.

f Tobi. 3.a.8.

15

Daerom vreese ick my, dat het my oock also gaen mochte: so souden dan myne ouderen van ^g leede steruen, dewijle dat ick een eenich sone ben.

g Of, rouwe, droeffenisse

16

Doe sprack de Enghel Raphael: Hoort my toe, ick wil dy segghen, ouer welcke de Duyuel macht heeft,

17

Namelicken, ouer de ghenen, die daer God verachten, ^h ende alleene om ontucht wille, vrouwen nemen, ⁱ ghelijck als het domme vee.

h 1.Thess. 4.a.3.7

i Psalm. 32.a.9.

18

^k Maer du, wanneer du met dyner bruydt, in de kamer koemst, so saltu dy dry daghen harer ^l onthouden, ende met haer bidden.

k Tob. 8.a.4.6.

l 1.Corint. 7.a.5.

19

Ende in derseluer nacht, wanneer du de leuer van den vissche, salst op de gloeyendighe kolen legghen, so sal de Duyuel verdreuen worden.

C.20

Ende de ander nacht, saltu tuchtich tot haer gaen, ghelijck als de heylighe Patriarchen.

21

Inder derden nacht nu, salstu verkrijghen, dat gesonde kinderen van dy gegenereert worden.

22

Wanneer nu de derde nacht voorby is, so saltu dy tot der Ionckvrouwe doen, met der vreese Gods, meer wt begheerte der vrucht, dan wt booser lust: op dat du ende dyne kinderen verkrijghen den seghen, die den zade Abrahe toegheseydt is.