Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

Als Tobias meynt dat de tijdt zijns steruens daer is, so gheeft hy synen sone schoone leeringhen ende vermaninghen om onbeuleckt ende Godsalichlick te leuen.

A.1

DOe nu Tobias dachte, ⁺ dat zijn ghebedt also verhoort ware, dat hy steruen soude, riep hy synen sone tot hem,

+ Tobias leeret synen sone, hoe hy Godsaligen leuen sal

2

Ende sprack tot hem: Lieue sone, hooret myne woorden, ende behoudtse vaste in dynen herten.

3

Wanneer God myne ziele sal wech nemen, so begraeft mijn lichaem: ⁺ ende eeret dyne moeder alle dijn leefdaghe.

+ Moeder eeren Exod. 20.b.12. Syrac. 7.c.27.

4

Dencket daeraen, in wat vare sy ghestaen heeft, doe sy dy onder haren herten droech.

5

Ende wanneer sy ghestoruen is, so begraeftse by my.

6

Ende hebbet God voor ooghen ende in der herten, ⁺ alle dijn leefdaghe: ^a ende wacht dy, dat du in gheene sonden verwillighest, ende doest teghen Gods ghebodt.

+ God vreesen.

a Rom. 6.b.11.

7

Van dynen goederen helpet den armen, ⁺ ende en wendet dy niet van den armen, so sal dy God weder ghenadichlicken aensien.

+ Aelmissen geuen. Luc. 14.b.13. Prouer. 3.a.9. Syrac. 4.a.1. ende 14.b.13.

8

^b Waer du kanst, daer helpet den noodtdurftighen.

b Syrac. 35.a 4.

9

Hebstu vele, so gheeft rijckelicken: hebstu weynich, so gheeft doch van den weynigen met trouwer herten.

B.10

Want du salst een recht loon versamelen, in der noodt.

11

^c Want de aelmissen verlossen van allen sonden, oock van den doot, ende en laten niet in der noodt.

c Tob. 12.a.9. Syrac. 29.b.14.

12

Aelmissen is eenen grooten troost, voor den Allerhoochsten God.

13

Hoedt dy mijn sone, voor aller hoererije, ⁺ ende en houdt dy tot gheener andere, maer alleene tot dynen wijue.

+ Hoererije te vlieden. Deut. 14.a.5. 1.Thess. 4.a.3.

14

De hoouaerdie laet noch in dyner herten, ⁺ noch in dynen woorden heerschen: ^d want sy is een aenbeginne alles verderfs.

+ Hoouaerdie te vermijden.

d Gene. 3.a.5.

15

^e Wie dy arbeydet, dien geeft in korten synen loon, ende veronthoudet niemande synen verdienden loon.

e Leuit. 19.b.13. Deut. 24.b.14.

16

^f Wat du niet en wilt, datmen dy doe, dat en doet du eenen anderen oock niet.

f Matth. 7.b.12. Luc. 6.d.31.

17

^g Dijn broot deylet den hongherighen mede, ende bedecket de naeckten met dyne kleederen.

g Luc. 14.b.13. Matth. 25.d.35. Iesa. 58.a.7. Hesek. 18.a.7. Psalm. 112.a.9. Prouer. 11.c.24.

18

Gheeft aelmissen van dynen broode ende wijne, by der begraefnisse der vromen, ende eett noch en drincket niet, by den sondaers.

19

^h Soecket alle tijdt raedt by den wijsen,

h Syrac. 9.b.19.

C.20

Ende dancket God alle tijdt, ende biddet, dat hy dy regere, ende du in alle dynen voornemen, synen woorde volghest.

21

Du salt oock weten, mijn sone, dat ick tien pondt siluers, doe du noch een kindt warest, den Gabel gheleenet hebbe in der stadt Rages in Meden, ⁺ ende syne hantschrift hebbe ick by my:

+ Gabel. Tob. 1.b.15. ende 9.a.5.

22

Daerom ghedencket, dat du by hem komest, ende sodanich gheldt eysschest, ende hem syne handtschrift weder gheuest.

23

Sorghet slechs niet, mijn sone, wy zijn wel arm, ⁱ doch wy sullen vele goets hebben, so wy God sullen vreesen, ^k de sonde vermijden ende goedt doen.

i Rom. 8.b.17. Prouer. 15.a.6.

k Syrac. 21.a.2.