Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xv. Capittel.

A.1

SIet, ⁺ spreeckt de Heere, spreeckt in de ooren mijns volcks de reden der Propheten, die ick in dynen mondt gheuen sal.

+ Straffe ouer de sonde.

2

Ende beschicket, dat het in een tzedel geschreuen worde, ^a want het is trouwe ende waerheyt.

a Ioan. 17.b.17.

3

^b Vreeset dy niet voor den aenslaghen teghen dy, ende en laett dy niet bekommeren de ongeloouicheyt der ghener, die teghen dy spreken.

b Philip. 1.c.28.

4

^c Want alle ongheloouighen, sullen in haren onghelooue steruen.

c Marc. 16.b.16. Ioan. 3.b.18. ende 8.c.24. ende 12.e.48.

5

Siet, spreeckt de Heere, ick wil straffe ouer de werelt senden, krijch, hongher, doodt ende verderffenisse.

6

Want ^d de boosheyt heeft ouerhant op allen Aerdtbodem, ende harer schadelicken wercken zijn vele gheworden.

d Matth. 24.b.12.

7

Deshaluen spreeckt de Heere:

8

Ick en wil tot harer boosheyt niet meer swijghen, die sy so roeckeloos doen, ick en wil oock niet lijden, dat sy so booslicken handelen: ^e want onschuldich bloedt der bekommerden, schreyet tot my, ende de zielen der rechtueerdigen, schreyen sonder ophouden tot my.

e Apocal. 6.b.10. ende 19.a.2.

9

Ende deshaluen, spreeckt de Heere, ^f ick wilt ghewislicken wreken, ende wil alle onschuldich bloet wt hen, tot my nemen.

f Deute. 32.d.35. Ioel. 3.c.21.

B.10

^g Siet, mijn volck wordt als een kudde schapen ter slachtinghe gheuoert, ick wilt als nu niet lijden, dat het in Egyptenlandt woone:

g Psalm. 44.c.23. Roma. 8.d.36.

11

Maer wilt wtuoeren met gheweldiger hant ende hooghen arme, ende wilse straffen ende plaghen, als te voren, ende wil alle zijn lant verstooren.

12

Egypten sal treuren, ende syne fondamenten sullen gheslaghen worden, met der straffe, die God ouer haer voeren sal.

13

Die het veldt bouwen, sullen treuren: want haer zaedt sal van brandt ende haghel, ende van eenen grousamen Gesternte verdoruen worden.

14

Wee der wereldt, ende dien, die daer inne woonen.

15

Want het sweerdt koemt ende hare verderffenisse, ^h ende een volck sal teghen het ander strijden, ende sweerden in haren handen hebben.

h Matth. 24.a.7.

16

Want daer sal een onstandtachticheyt zijn in den menschen, ende eener sal den anderen ouerweldighen, ende en sullen haren Koninck niet achten ende hare Vorsten: hare handelingen sullen sy afmeten na hare ghewelt.

17

Want de mensche sal begheeren in de stadt te gaen, ende en salder niet komen.

18

Want om harer hooueerdie wille, sullen de steden verschricket worden, de huysen beuen, ende de menschen sullen hen vreesen.

19

Daer en sal gheener met den anderen medelijden hebben, Ia eener sal den anderen ten strijde verwecken, te nemen haer goedt, omme des honghers wille, ende van weghen des grooten drucks.

C.20

Siet, ick roepe tesamen alle Koninghen der Aerden, die daer zijn van den ^† Opganc, van den Suyden, van den Oosten ende Libano, tot hem te keeren, ende weder te gheuen, dat sy hen ghegheuen hebben.

† And. om my te vreesen, van etc. om op hen te doen keeren etc. dat sy hen gedaen hebben

21

ⁱ Als sy noch heden by daghe mynen wtuerkorenen doen, also wil ick oock doen, ende weder vergelden in haren schoot, so spreect de Heere God,

i Ierem. 50.b.15. ende 51.e.49. Hesek. 16.f.59. Matth. 7.a.2.

22

Myne hant en sal der sondaers niet verschoonen, ende mijn sweerdt en sal niet ophouden ouer die, ^k die het onschuldich bloet verghieten op Aerden.

k Prouer. 6.b.17.

23

Het vyer is aengegaen, van synen toorne, ende heeft verteert de fondamenten der Aerden, ende de sondaers, als een ^l aenghesteken stroo.

l Maleac. 4.a.1.

24

Wee dien, die hier sondighen, ende ^m myne gheboden niet houden, spreeckt de Heere.

m Deute. 11.c.28.

25

Ick wil hen niet ouersien: wijcket ghy kinderen, van gheweldt, en beulecket mijn Heylichdom niet.

26

Want God kent alle die, die teghen hem sondighen, ende daerom gheeft hyse in doodt ende verderffenisse.

27

Want als nu zijn de quaden ouer de wereldt ghekomen, ende daer sullet ghy in blijuen: want God en sal v niet lossen, daerom dat ghy tegen hem ghesondighet hebt.

28

Siet, een grousaem ghesichte koemt, van den opganck der Sonnen.

29

Daer sullen Draken geslachten wtgaen, ende Arabiers volck met velen waghenen, ende hare veelheyt sal zijn, als eenen wint op Aerden, dat hen vreesen sullen ende verschricken, alle diese hooren rasen in haren toorne.

D.30

Sy sullen daerwt wt den woude breken, als de wilde swijnen, ende met grooter macht sullen sy komen, ende sullen met hen in den strijdt staen, ende het deel des lants der Assyriers verwoesten.

31

Ende dan sullen de Draken ouerhant nemen, harer gheboorte indachtich, ende sullen hen omkeeren, tesamen sweeren in grooter kracht, haer te veruolghen.

32

Sy nu sullen verschricken ende swijgen voor harer kracht, ende sullen vlieden.

[fol. 16r]

33

Ende wt den lande der Assyriers, salse eener belegheren, ende eenen wt hen ^* wtmaken: ende daer sal vreese ende verschricken zijn in haren toch, ende eenen twist onder haren Koninghen.

* vernielen:

34

Siet, wolcken van den Oosten ende van den Westen tot int Suyden, ende die zijn seer grousaem, vol toorns ende ongheweder.

35

Sy sullen aen malcanderen slaen, ende ^n† sullen aen het groote Gesternte op Aerden slaen, ende haer Ghesternte:

n† And. vele sterren op Aerden vallende maken, Ia oock haer etc.

36

Ende ^o het bloet sal van den sweerde, tot den buycke toe, ende ^† het mest des menschen totten ^p stroysele des kemels komen.

o Apocal. 14.c.20.

† An. den roock

p An, gordele

37

Ende groote vreese ende beuen sal op Aerden zijn, ende die den toorne sien, sullen verschricken, een beuen salse aenstooten.

38

Ende dan sullen groote reghenen van den Suyden komen, van den Noorden, ende een deel van den Westen,

39

Ende van den onghestuymen winde van den Oosten, ende sullense opsluyten, ende de wolcken die hy in toorne opghewecket hadde: ende het Ghesternte om een verschricken te maken tot den Oosterschen ende Westerschen winde, sal verstooret worden.

E.40

Ende de groote wolcken sullen verheuen worden, ende de strecke wolcken vol toorns, ende het Ghesternte: dat sy het gantsche Aerdtrijck verschricken, ende alle die daer op woonen, ende dat sy ouer alle verheuene plaetsen ghieten een grousaem Ghesternte.

41

Vyer ende haghel, ende vliegende sweerden, ende vele waters, dat alle velden vol worden, ende alle beken.

42

Ende sullen breken de steden ende de mueren, de bergen ende hueuelen, alle hout, woudt ende gras der beemden, ende alle hare vrucht.

43

Ende sy sullen standtachtich gaen na Babylon, ende haer verschricken.

44

Sy sullen tot haer komen, ende haer omlegeren: sy sullen dat Ghesternte ende allen toorne, ouer haer wtgieten: dan so sal wtgaen stof ende roock, tot in den hemel, ende alle die om haer zijn, sullense beklaghen.

45

Ende die onder haer blijuen, sullen dienen dien, die haer verschricket hebben.

46

Ende du Asia, die dy oock op den hope Babylons, vertroostest, ende een eere bist harer persoone,

47

Wee dy du ellendighe, dat du dy haer vergelijcket hebst, ende hebst dyne dochteren in hoererije vercieret, dat sy hen verheuchden ende welbeuielen dynen boeleerderen, ^q die ^r doorgaens begeert hebben met dy te hoereren.

q Apoca. 18.a.3.

r Of, allewech

48

Du hebst der verhateder stadt gelijck zijn willen, in allen haren wercken ende vindinghen, daerom spreeckt God:

49

Ick wil ongheluck ouer dy brenghen, ^s eensaemheyt, armoedt, ^t honger, krijch, pestilencie, dat ick dyne huysen wtroeye, vander verstooringhe, doodt, ende macht dyner kracht.

s weduweschap

t Syrac. 40.b.19. 4.Esdr. 16.c.29. Ierem. 24.b.10. ende 27.a.8. Hesek. 6.b.11.

F.50

Ghelijck een bloeme verwelcket wordt, so de hitte ouer ^u† haer schijnet.

u† And. dy

51

Also saltu swack ende ellendich worden, so du ghestraffet worst, ende van den wijuen ghestraffet, dat dy de Gheweldighen ende Liefhebbers niet aennemen en moghen.

52

Ben ick dy so vyandt, spreeckt de Heere?

53

Haddestu myne wtuerkoren, niet alle tijt gedoodt, de slaghen dyner handen ghehooghet, ende sprakest ouer haren doodt, so du droncken warest,

54

Vercieret de ghestalte dijns aenghesichts?

55

^x Den loon dyner hoererije, wort dy in dynen schoot weder vergolden: daerom saltu de wedergheuinghe ^y† ontfanghen.

x Apocal. 18.a.6.

y† And. niet nemen.

56

^z Als du, spreeckt de Heere, mynen wtuerkorenen ghedaen hebst, also doe dy God, ende late schade ouer dy gaen.

z Matth. 7.a.2.

57

Dyne kinderen sullen van honger steruen, du salt door het sweerdt vallen, dyne steden sullen verstooret worden, ende alle de dynen, met den sweerde in den velde omkomen.

58

Die in berghen zijn, sullen van honger steruen, ende sullen haer eyghen vleesch eten, ende voor hongher ende dorst, haer eyghen bloedt drincken.

59

Door de Zee saltu met onsalicheydt komen, ende dan saltu noch, weder ongheluck hebben.

G.60

In den voortoge sullen sy de verslagene stadt verscheuren, ende sullen een deel dijns landts wtroeyen, ende het deel dyner eere wtmaken, ende de omghekeerde noch een mael omkeeren.

61

Sy sullen dy vertreden als eenen halm, ende sy sullen dijn vyer zijn, ende dy verteeren.

62

Dyne steden ende dijn lant, dyne wouden, ende dyne vruchtbare boomen, sullen sy met vyere verbranden.

63

Dyne kinderen sullen sy geuancklick henen voeren, ende wat du hebst, sullen sy roouen, ende de schoonheyt dijns aenghesichts, sullen sy verbleecken.