Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

HET VIERDE Boeck Esdre.

Dat Eerste Capittel.

A.1

HET Tvveedde Boeck Esdre des Propheten, ^a des soons Saraie, des soons Azarie, des soons Helkie, des soons ^b† Sadonie, des soons Sadok, des soons Achitob.

a Esr. 7.a.1.

b† And. Sallum

2

Des soons Amerie, des soons Azarie, des soons Maraioth, des soons Sarahie, des soons Vzi, des soons Bocci, des soons Abisus, des soons Pinhas, des soons Eleazar,

3

Des soons Aaron wt den stamme Leui, die een gheuangen geweest is in der Medenlandt, in den Koninckrijcke Artaxerxis des Konincks der Persen.

4

Ende des Heeren woordt geschiedde tot my, ⁺ ende sprack:

+ Esdras wordt gesonden, den volcke hare ondanckbaerheyt ende Gods weldaden, met tsamen syner straffe voor te houden.

5

^c Gaet henen, ende segget mynen volcke, hare lasteren, ende hare kinderen, hare boosheyt, die sy teghen my ghedaen hebben, dat sy het haren kindtskinderen segghen.

c Iesa. 58.a.1.

6

Want de sonden der Vaderen, hebben in den kinderen ouerhandt ghenomen: sy hebben myner vergheten, ende andere Goden gheoffert.

7

Ben ^d ick dan niet die, diese wt den lande Egypti, wt den diensthuyse gheleydet hebbe? sy daerenteghen hebben my tot toorne verwecket, ende myne raedtslaghen verachtet.

d Exod. 14. ende 20.a.2.

8

Du dan plucket dijn hayr op dynen hoofde wt, ende werpet alle quaet ouer haer, dat sy myner Wet niet ghehoorsaem en zijn gheweest: het is een ongheschicket onghemeestert volck.

9

Hoe langhe sal ick met hen lijden, dien ick so vele goets ghedaen hebbe?

B.10

Vele ^e Koninghen hebbe ick om harent wille verdoruen, ^f den Pharao ende syne dienaers, ende alle syne macht hebbe ick gheslaghen:

e Psalm. 136.b.17.

f Exod. 14.c.27.

11

^g Voor hen henen hebbe ick alle volcken wtgheroeyet, ende in den opganghe der Sonnen, hebbe ick de twee landen ende volcken, Tyrum ende Sydonem, verstooret, ende alle hare vyanden hebbe ick ommeghebracht.

g Num. 21.c.24. Iosu. 8. 10. 12.

12

So spreeckt nu also tot hen: So spreeckt de Heere:

13

^h Ick hebbe v door de Zee gheleydet, ^i† ende alleweghe eene sekere bane ghemaeckt: ^k Mosen hebbe ick v ten Hooftmanne ghegheuen, ^l ende Aaron ten Priester.

h Exod. 14.c.29.

i† An. hebbe v den wech vanden beginne gemaeckt.

k Exod. 3.b.10.

l Num. 18.a.

14

^m Licht hebbe ick v ghegheuen in eener wolcken calumne, ende groote wonderen hebbe ick v ghedaen: maer ghy hebbet myner vergheten, spreeckt de Heere.

m Exod. 13.c.21.

15

So spreeckt de Almachtighe Heere: ⁿ Quackelen hebbe ick v ten teecken ghegheuen, ende den legher tot scherme, dies niet te weynigher, hebbet ghy oock daer ghemurmureert,

n Exod. 16.b.13. Num. 11.d.31. Psalm. 78.c.27. ende 105.e.40.

16

Ende hebbet de ouerwinninghe uwer vyanden, niet myner kracht toeghegheuen: Ia oock op den hedighen dach, murmureert ghy.

17

Waer zijn de goede daden, die ick v ghedaen hebbe? doe ghy in der woestijne hongher ledet, schreydet ghy niet tot my?

18

Ende spraket: ^o Waerom hebstu ons in dese woestijne gheleydet, dat du ons van hongher dooddest? beter ware het ons gheweest, wy hadden den Egyptenaren ghedienet, dan dat wy hier in deser woestijne steruen moeten.

o Num. 14.a.3.

19

Doe hadde ick een medelijden met uwen suchten, ^p ende gaf v Hemelsbroot ter spijse.

p Exod. 16.a.4.

C.20

^q Der Enghelen broodt hebbet ghy ghegheten: ^r doe v dorstede. hebbe ick niet den rotzsteen opghehouwen, ende waters de volheyt daerwt vlieten laten? voor de hitte hebbe ick v met den bladeren der boomen bedecket.

q Sap. 16.c.20.

r Num. 20.b.11. Exod. 17.a.6. Psalm. 78.b.15. 2.Esd. 9.c.20. 1.Corinth. 10.a.4.

21

Ick hebbe v een goedt vett landt inghegheuen: de Cananeer, Phereseer, de Philistineer, hebbe ick voor v wt ghedreuen: ^s wat soude ick v doch meer doen, spreeckt de Heere?

s Iesa. 5.a.4.

22

So spreeckt de Almachtighe Heere: ^t Als ghy in der woestijne waret, in den ^u† Amoreischen water, ende dorst hadde, doe ghy mynen Namen lasterdet,

t Exod. 15.c.25.

u† And. water Marah,

23

Doe en gaf ick v gheen vyer, om uwe lasteringhe, maer een hout toochde ick v, dat v dat water soete maeckte.

24

Wat sal ick dy, O Iacob doen? ^x Iuda, du en hebst niet willen gehoorsaem zijn: ick wil my tot eenen anderen volcke maken: mynen Name wil ick den seluen gheuen, dat sy myne settinghen houden.

x Exod. 32.a.8.

25

^y Dewyle ghy my verlaten hebbet, so wil ick v oock verlaten: so ghy ghenade van my begheeren sullet, en wil ick v niet barmhertich zijn.

y 2.Para. 24.c.20

26

^z So ghy my aenroepet, en wil ick v niet verhooren: ^a want uwe handen hebbet ghy met bloede beulecket, uwe voeten zijn snelle tot doodtslaghen.

z Iesa. 1.b.15. Prouer. 1.c.28.

a Iesa. 59.a.3.

27

My hebbet ghy niet verlaten, maer v selues.

28

So spreeckt de Almachtighe Heere: Hebbe ick v niet gebeden, als een vader syne kinderen, als een moeder hare dochteren, ende eene Voester hare kleyne kinderen,

29

Dat ghy mijn volck woudet zijn, so woude ick uwe God zijn? ende so ghy myne kinderen waret, woude ick uwe vader zijn?

D.30

^b Ick hebbe v te samen versamelt, als eene hinne hare kieckskens, onder hare vleughelen versamelt: wat soude ick v nu meer doen? ick wil v van mynen aenghesichte verwerpen.

b Matth. 23.d.37.

31

^c So ghy my offeret, wil ick mijn aenghesichte van v wenden: want uwe Hooghtijden, Nieuwemaenden ende Besnijdingen, hebbe ick verworpen.

c Iesa. 1.b.11. ende 66.a.3. Iere. 7.c.20. Amos 5.c.22.

32

Ick hebbe myne Dienaers de Propheten tot v gheschicket, ^d die hebbet ghy ghedoodet, ende hare lichamen ^e† verscheurt: dier bloedt wil ick van uwen handen ^f† eysschen, spreeckt de Heere.

d 2.Para. 24.c.21. 2.Esd. 9.c.26. Matth. 2.d.34.

e† And. ontledet

f† And. wreken,

33

So spreeckt de Almachtighe Heere: ^g Vwe

g Luc. 13.d.33.

[fol. 8r]

huys moet ledich worden: ick wil v verwerpen, ghelijck de windt de halmen:

34

Vwe kinderen en sullen niet vruchtbaer zijn: want mijn ghebodt hebben sy verachtet, ende quaedt voor my ghedaen.

35

Eenen volcke dat komen sal, wil ick uwe huysen gheuen, ende die my noyt ghehoort en hebben, sullen my gheloouen, ende dien ick noyt gheen teecken betooghet en hebbe, die sullen doen, dat ick hen heete.

36

Gheene Propheten en hebben sy noyt ghesien, ende sullen doch hare sonde bekennen.

37

Ick betuyghe my op de ghenade, die ick doen wil den koemstighen volcke, dier kinderen vrolicken in vreuchden: ^h ende hoewel sy my met lijflicken ooghen niet en sien, gheloouen sy doch in den gheeste dien, dat ick segghe.

h 1.Pet. 1.a.8. Ioan. 20.c.29.

38

Ende nu broeder, schouwet, wat grooter eere, ⁱ ende siet het volck, dat van den Oosten koemt.

i Matth. 8.b.11. Luc. 13.c.27.

39

Dien wil ick ten gheleyde gheuen: Abraham, Isaac ende Iacob: Osee, Amos, Michee, Iohel, Abdie, Ionam,

40

Nahum, Habakuk, Sophoniam, Haggeum, SacharIam ende Malachiam, ^k die de Enghel Gods ghenoemt is.

k Male. 3.a.1.