Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

A.1

DOe stondt Esdras op, van den voorhoue des Tempels daerbuyten, ende ginc henen in de ^{a †} kamer Ionathe, des soons Nasabi,

a Of, slaepkamer

† And. sale

2

Ende bleef aldaer, ende en att gheen broodt, ende dranck gheen water, om der ouertredinghe wille ^b des volcks.

b †And. der menichte

3

Ende daer werdt eene ^c wtkundinghe in den gantschen Iudea, oock te Ierusalem, allen dien, die wt der gheuanckenisse te Ierusalem versamelt waren:

c Dat is, Openbaer wt verkondighen.

4

Dat een yegelick, die niet in tween ofte dryen daghen, na ^d† den rade der ouden Raetsheeren, na Ierusalem quame, dien soude zijn goedt ghenomen worden, ende hy soude wtghesloten zijn van der Ghemeynte der gheuankenisse.

d† And. der bekentenisse

5

Doe versamelden hen alle die wt den geslachte Iuda ende BenIamin, in drien daghen te Ierusalem, in der neghender maendt, aen den twintichsten daghe,

6

Ende de gantsche Gemeynte sat in den houe des Tempels, ^e tzitterende, want de winter viel in.

e Dat is, schuddende, beuende, rijelende.

[fol. 7r]

7

Doe stondt Esdras op, ende sprack: Ghy hebbet onrecht ghedaen, dat ghy de wtlandige wijuen, v ten houwelick genomen hebbet, daermede ghy de sonden Israels hoopedet.

8

Nu so bekennet dat, ende gheuet lof den Heere den God onser vaderen.

9

Ende volbrenghet synen wille, wijcket van den Heydenen des landts, ende van den wtlandighen wijuen.

B.10

Doe schreeuwede het gantsche volck met luyder stemmen, ⁺ ende sprack: Als du ghesproken hebst, also willen wy hem doen.

+ De Heere verschicket den Esdra, in deser sake, een willich volck.

11

Dewijle nu des volcks vele is, ende de winter hier, en konnen wy niet buyten dakes staen: daertoe en is dit gheen dinck, dat in eenen ofte tween daghen moghe gheeyndet worden: want wy hebben hier vele inne ghesondicht.

12

So verordent, dat de Voorghesetteden der Ghemeynte, ende alle die by ons woonen, ende alle die, die vreemde wijuen by hen hebben,

13

Desghelijcx de Priesteren, de Richteren, van allen plaetsen, staen in der voorghenomen tijdt, tot dat sy den toorne des Heeren ^f stillen, in desen handel.

f Of, oplossen

14

Doe ontfinck Ionathas de sone Ezeli, ende Ozias ende Thecam, het ampt deser sake, ende Bozoramus, ende Leuis, ende Sabatheos, holpen hen daertoe.

15

Na dien stonden alle die, die wt der gheuanckenisse ghekomen waren.

16

Ende de Priester Esdras verkoos hem de voorneemsten wt den Vaderen, na der benoeminghe, ende in der Nieuwermaendt der tiender maendt, saten sy te samen, dese sake te ondersoecken.

17

Ende also werdt van den mannen, die wtlandighe wijuen hadden, gehandelt tot op de Nieuwe mane der eerster maendt.

18

Ende daer zijn van den Priesteren gheuonden, ⁺ die hen met vreemde wijuen vermenghet hadden.

+ De namen der ghener, die vreemde wijuen ghenomen hadden. Esr. 10.b.18.

19

Wt den kinderen Iesu des soons Iosedech ende sijnen broederen, Mazeas, Eliezer, Ioribus ende Ioadeus.

C.20

Die verwillichden hen, hare wijuen van hen te doen, ende eenen Ramme te offeren voor hare onwetenheyt.

21

Ende wt den kinderen Semmeri: Masseas ende Esses ende Ieelech, Asarias.

22

Ende wt den kinderen Fosere: Limosias, Hismaenis, Nathanaee, Iussis, Ioddus ende Talsas.

23

Van den Leuiten nu: Iosabdus, Semeis ende Colnis, Calitas, Facteas, Coluas ende Elionas.

24

Vt den Sangheren des Heylichdoms: Eliarib, Zakarus.

25

Wt den Poortenaren: Sallumus ende Tolbanes.

26

Ende wt Israel, wt den kinderen: Foro Osi ende Remias, ende Geddias, ende Melchias, Michelus, Eleazarus, Iemmebias ende Bannab.

27

Ende wt den kinderen Iolaman, Thanias, Zacharias, Ietzrelus, Ioddius, Erimoth ende Elias.

28

Ende wt den kinderen Zathoim, Eliadas, Liasumus ende Zochias, Larimoth, Sabdis ende Tebedias.

29

Ende wt den kinderen Zebes: Iohannes, Amanias, Zabdias ende Emeus.

D.30

Ende wt den kinderen Banni: Olammus, Maluchus, Ieddeus, Iasub, Asabus ende Ierimoth.

31

Ende wt den kinderen Abdin: Naatus ende Moosias ende Caleus, ende Raanas, Maasias, Mathathias, Beseel, Bannus ende Manasses.

32

Ende wt den kinderen Naue: Noneas, Afeas, Melchias, Sameas, Simon, BenIamin, Malchus ende Merras.

33

Ende wt den kinderen Asom: Carianeus, Mathathias, Bannus, Eliphalach, Manasses, Semei.

34

Wt den kinderen Aanni: Ieremias, Moadias, Abramus, Ioel, Baneas, Pelias, Iona, Marimoth, Eliasib, Mathaneus, Eliasis, Orizas, Dielus, Semedius, Zambris ende Ioseph.

35

Wt den kinderen Nobei: Idelus, Mathathia, Sabadus, Zecheda, Sedmi, Iessei ende Baneas.

36

Die alle hadden wtlandische wijuen ten houwelick ghenomen, ende verlietense met haren kinderen.

37

De Priesteren ende Leuiten, ende alle die, die wt Israel waren, wooneden te Ierusalem, ende in den gantschen lande, aen den Nieuwenmaenschijn der seuender maendt, ende de kinderen Israels waren in haren wooninghen.

38

^g Ende de gantsche Ghemeynte quam te samen op de plaetse, die daer is voor der Heyliger poorten des Tempels, van den Opganghe de Sonnen,

g Nehem. 8.a.1.

39

Ende spraken tot Esdra den hooghen Priester ende den Leser: ⁺ Dat hy brachte de Wet Mosi, van den Heere God Israels ghegheuen was.

+ Esdras leest den volcke het boec des Wets.

E.40

Doe brachte Esdras de hooghe Priester de Wet der gantscher Ghemeynte, wijuen ende mannen, oock allen Priesteren, dat sy de Wet hooreden, aen der Nieuwermane, der seuender maendt.

41

Ende hy las op der plaetse, die daer is voor der heyliger poorten des Tempels, van smorghens vroech aen, tot aen den auont, voor wijuen ende voor mannen: ende sy luysterden alle op de Wet.

42

Esdras nu de Priester ende Leser des Wets, stondt op eenen houten predickstoel, dienmen daertoe ghemaeckt hadde.

43

Ter rechter sijden stonden by hem Mathathias, Samus, Ananias, Azarias, Vrias, Ezechias, ende Balsamas.

44

Ter slincker sijden, Faldeus, Misael, Malachias, Abuschas, Sabus, Nabadias ende Zacharias.

45

Doe nam Esdras het boeck voor der gantscher Ghemeynte: want hy was de voorneemste ende heerlichste voor allen.

46

Ende als hy de Wet wtghelesen hadde, stonden sy alle oprecht: doe loefde Esdras den Heere den hoochsten God, den Almachtighen God der Heyrscharen.

47

Ende alle het volck antwoordde: Amen.

48

Ende hieuen hare handen op, vielen neder op de Aerde, ende loefden den Heere, Iesus, Baneas, Sarebias, Iaddimus, Accubus, Sabbatheus, Calithes, Azarias, Ioradus, Ananias, ende Philias de Leuiten,

49

Die de Wet des Heeren leerden, ende in der Ghemeynte de Wet des Heeren lasen, ende een yeghelick stiet henenuoor dien, die de Wet verstondt.

F.50

Doe sprack Atharates tot den ouersten Priester Esdra, ende den Leser, ende den Leuiten, die de Ghemeynte leerden,

51

Ende sprack: Desen dach is Heylich den Heere: ende alle die, die de Wet des Heeren hoorden, weeneden.

[fol. 7v]

52

Doe sprack Esdras: ^h So gaet henen, ende etet des besten, ende drincket het soete, ende ⁱ schicket dan oock dien, die niets en hebben.

h Malea. 8.b.11.

i Syrac. 14.b.11.

53

Want desen dach is den Heere heylich: ende en weest niet treurich: want de Heere sal v heerlick maken.

54

Ende de Leuiten verkondichden allen volcke, ende spraken: Desen dach is heylich den Heere, daerom en weest niet treurich.

55

Doe ginghen sy alle, aten ende droncken, ende waren vrolick, schickeden geschencken dien, die niets en hadden, dat sy oock met vreuchden eten mochten,

56

Want sy waren ouer de mate verheuget worden, wt den woorden diemen hen in der Wet voorghelesen hadde, ende zijn alle te Ierusalem versamelt worden, Feest te houden, na den Verbonde des Heeren Gods Israels.

Eynde des derden Boecks Esdre.