Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 5v]

Dat vij. Capittel.

A.1

DOe waren Sisennes de onderuoghet in Celosyria ende Phenicia, ⁺ ende andere Landtsheeren ende hare metghesellen ghehoorsaem, dien, dat de Koninck Darius, ^a† bekent hadde:

+ Den Tempel wordt voluoeret ende wtgemaeckt. Esr. 8.c.

a† An. met voorsate gheboden, of besloten

2

Hielden vlijtighen aen aen den heyligen wercken, ende waren methelpers met den ouden Voorghesetteden der Ioden.

3

Ende also ginck dat werck des Heylichdoms ghelucklick ^b van der handt, als de Propheten Haggeus ende SacharIas, propheteerden.

b Of, voort,

4

Ende volbrachten alle dinck, door het gebodt des Heeren des Gods Israels, ende wt den raetslaghe, Cyri, Darij ende Artaxerxis der Koninghen in Persia.

5

Ende also werdt onse huys ^c wtghemaeckt, tot op den dry ende twintichsten dach der maent Adar, in den sesten Iare des Konincks Darij.

c Ioan. 2.c.20.

6

Ende de kinderen Israels, de Priesteren ende Leuiten, ende de anderen die wt der gheuanckenisse komen, ende die henentoe ghedaen waren, deden, daerna als in den boecke Mose gheschreuen is.

7

Ende offerden op der Tempelwijnghe, ⁺ hondert ossen, twee hondert Rammen, vier hondert lammeren,

+ Den Tempel wordt heerlick inghewijet.

8

Ende twaelf bocken voor de sonde des gantschen volcx Israels, na het ghetal der stammen Israels.

9

Ende de Priesters ende Leuiten, stonden bekleedet met Priesterlicken ghewaede, na den gheslachten, ouer alle wercken des Heeren, des Gods Israels, na den boecke Mose, ende de Deurwachters by allen deuren.

B.10

Ende de kinderen Israels, ⁺ met dien, die wt der gheuanckenisse gekomen waren, hielden het Passah aen den veertienden daghe der eerster maendt, als de Priesteren ende Leuiten gheheylicht waren.

+ Passah wordt ghehouden.

11

Die wt der gheuanckenisse waren komen, die en werden niet alle met malcanderen gheheylicht: maer de Leuiten werden met malcanderen gheheylicht.

12

Ende also slachteden alle die, die wt der gheuanckenisse ghekomen waren, het Paeschlam haren broederen, den Priesteren, ende hen selues.

13

Ende de kinderen Israels, die wt der gheuanckenisse quamen, die ouerbleuen waren van allen onreynicheden der Heydenen, sochten den Heere,

14

Ende hielden het Feest der ongheheuelden brooden, seuen daghen lanck, aten ende droncken voor den Heere:

15

Dat de Heere den raedtslach des Konincx in Assyria voor haer gewendet, ende hare handen ten wercke des Heeren des Gods Israels ghestercket hadde.