Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

A.1

DE Koninck Darius maeckte een kostelicke maeltijdt synen Dienaren, ⁺ ende alle synen Houe.

+ Een Konincklic weertschap Darij.

2

Oock allen Amptlieden Medie ende Persie, oock allen Voochden ende Voorgesetteden, die onder hem waren, van India aen, tot in Ethiopien, hondert ende seuen ende twintich landen.

3

Als sy nu ghegheten ende ghedroncken hadden, ende nu wel versadighet weder na huys keerden, ghinck Darius de Koninck in zijn kamer, ende leyde hem slapen: ende daer na waecte hy weder op.

4

Doe spraken de dry Ionghelinghen, ⁺ die des Konincx bewaerknechten waren, ende zijns lijfs hoedden, ende de een sprack ten anderen:

+ Een verdichtinge der bewaerknechten Darij.

5

Onser yeghelick sal wat segghen, ende welckers reden die wijser ende voornemelicker is, dien sal de Koninck Darius groote gauen gheuen,

6

Hy sal hem met purpur bekleeden, hem gulden drinckuaten gheuen, gulden gewandt, ende deken: hy sal hem eenen kostelicken wagen maken, ende eenen gulden toom, een sneewitte huyue opsetten, eenen gulden rinck om synen hals.

7

Ende hy sal de naeste ende voorneemste zijn, na den Koninck Dario ende dat om syner wijsheyt wille: oock sal hy een vriendt des Konincx ghenoemt worden.

8

Doe schreef een yeghelick syne meyninge, versegeldent, ende leydent onder des Konincx kussen,

9

Ende spraken: Wanneer de Koninck opstaet, so willen wy hem onse gheschrift gheuen: ende wien de Koninck ende syne Ouerste ghewaldt spreeckt, dat hy de wijseste reden ghesproken hebbe, die heeft ghewonnen.

B.10

De een schreef: Sterck is de wijn.

11

De ander: De Koninck is stercker.

12

De derde: De vrouwen zijn stercker, de waerheyt dannoch, ouerwint die alle.

13

Als nu de Koninck opghestaen was, namen die dry hare gheschriften, ende gauense den Koninck, ende hy lasse.

14

Doe sandt hy wt, ende liet roepen alle syne Ouerste ghewaldt, alle Voochden ende Voorstanders der landen Medie ende Persie.

15

Ende als sy inden Raedt saten, ouerlas men hare gheschriften voor hen.

16

Ende hy hiet de Ionghelinghen roepen, dat sy hare meyninge met monde selues openden.

17

Als sy nu gheroepen werden, ende henenin quamen, sprack de Koninck tot hen: Toocht ons aen, ende gheeft ons te verstaen, wat dat zy dat ghy gheschreuen hebbet.

18

Doe begonst de eerste, ⁺ die van der stercte des wijns ghesproken hadde, ende sprack: Lieue mannen, ^a de wijn is treffelick sterck, ende ouerweldighet alle, die hem drincken.

+ Bescheedt des eersten Iongelincx, vander sterckheyt des wijns.

a Prouer. 20.a.1.

19

Hy verleydt het gemoet, hy maket, dat de armen ende Koninck, dwaesachtich, ende ijdel worden: also doet hy oock met den eyghen manne, ende met den vrijen, met den armen ende rijcken.

C.20

Hy neemt hen allen verstandt, ende maecktse sorgeloos, ende vrolick, dat harer geene, noch aen trueren noch aen syne schult oft plicht gedencket.

21

Hy maket ^b† oock, dat de mensche meynet, wat hy voor hem neemt, dat het zy eerlick ende recht: ende en ghedenct niet, dat hy een Koninck is, niet dat hy een Ouerste is, ende hem sulcks niet en behoort.

b† And. dat yegelick hem dunckt rijcke, so datmen gheen ghedachtenisse noch des Konincx, noch des regenten en heeft, ende maeckt datmen niet en spreect dan by talenten.

22

De menschen vergheten oock, wanneer sy drincken, aller vrientschap, aller broederlicker trouwe ende liefde, in korten, so sy drinken, rucken sy het sweert.

23

Ende so sy van wijne neder geleyt zijn, ende weder opstaen, en weten sy niet, wat sy gedaen hebben.

24

Nu oordeelt, ghy lieue mannen, oft niet de wijn de stercste en zy? want wie woude hem voornemen, sulcke dinghen te doen? ende doe hy dit wtghesproken hadde, sweech hy.