Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

Dat eerste deel deses Capittels, is een vyerich ende schoon gebedt, waerin de Propheet bidt, dat God synen toorne afwende, ende zijn volck wt de Babylonische geuanckenisse verlosse, ende wederom te huys in haer lant helpe. Dit ghebedt stelt hy aldus:

Ten eersten bekent ende vertelt hy, met wat grooter sonden zijn volck sulcke rechtueerdighe straffe verdient heeft. Daer na bidt hy God, dat hy sulcke straffe ghenadichlick afwende om zijnder rechtueerdicheyt wille, (dat is, om dat hy ghenadich is, ende wt enckel ghenade de sonde vergheeft, ende rechtueerdich maect) ende om zijns Naems wille, dat is, op dat Gods eere, Naem ende dienst, onder de Heydenen niet wtghebluscht en worde.

Na dese forme ende exempel, sullen wy onse ghebedt oock stellen, ende alleen op Gods genade ende barmherticheyt bidden, onse sonde bekennen, ende ons beteren.

21

Euen doe ick so sprack, in mynen. etc.

Dit ander deel deses Capittels, is een seer troostelick exempel, hoe God dat gebet dat tot hem door het betrouwen op zijn ghenade ghedaen is, met bekenninghe onser onweerdicheyt, ghenadichlick wil verhooren, ende meer gheuen, dan wy bidden.

Want als Daniel hadde gebeden dat God zijns volcx gheuanckenisse wilde afwenden, so heeft God hem desen grooten schat gheopenbaert, namelick, hoe langhe tijt het noch daer van zy, dat Christus soude gheboren worden, ende in zijn ampt treden: ende hoe zijn eyghen volck hem niet aennemen, maer dooden soude.

Ende de Propheet heeft hier dat Nieuwe Testament met schoone woorden afgebeeldet, dat Christus door zijn steruen ende offerhande, soude de ouertredinge wech nemen, de sonde verseghelen, de misdaedt versoenen, ende de eewighe gherechticheyt brenghen. Want dit heeft Chri-

[fol. 86v]

stus door zijn doot wtghericht, ende wort door dat Euangelium verkondicht in de gantsche wereldt.

Ende dewijle de Ioden sulcke verkondinghe ende weldaet niet en hebben willen aennemen, so heeftse God verstoort, dat sy nu met alle haer eerlickheyt, Koninckrijcke Priesterdom, Tempel, Wet, Offerhande, ende alle haer doen, te niete zijn, ende gheen beteringe te hopen hebben.