Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat x. Capittel.

Is een voorrede op het xj. Capittel dat daer volcht, waerin Daniel een sonderlick stuck schrijft van de Enghelen, welckes ghelijcken nerghens in de H. Schriftuere en is, namelick, dat de goede Enghelen teghen de boose strijden, landen ende volcken beschutten ende beschermen.

Ende de boose Engelen noemt hy oock Uorsten. Hierwt kanmen verstaen, waeromme het in der Koninghen ende Uorsten houen, so woeste ende wilt toegaet, dat het goede also verhindert, ende krijch ende ongeluck so haest gheuordert ende aengherichtet wort.

Want de Duyuelen zijn daer, sy stoocken ende trecken ofte verhinderen doch so vele, dat het goede nergens en kan voortgaen. Teghen sulcke wijsheyt der Duyuelen, waer de wijsheyt ende het vermoghen der menschen veel te kleyne. Daeromme heeft God de goede Enghelen als Wachters verordent, die des Duyuels voornemen breken, ende dat goede op de Aerde voorderen ende helpen souden.