Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

Is een exempel, waer in wy sien, hoe Daniel om des rechten Gods diensts wille in noot ende iammer koemt. Het welcke beschreuen is tot onsen troost, op dat wy weten, dat wy de eerste niet en zijn, of wy schoon om Gods woort lijden moeten: dat andere ende grootere Heyligen hebben dat selue moeten verwachten ende lijden.

Bouen desen, is het ons oock een leere, dat wy geen ongeluck ons en laten so swaer zijn, dat wy daerom souden van Gods woordt afwijcken, ende ons laten tot sonden beweghen. Ghelijck hier Daniel wil lieuer lijf ende leuen verliesen, dan dat ghebedt laten.

18

Ende de Koninck ghinck wech op syne. etc.

Dit is een seer troostlick exempel, hoe God den Godureesenden Daniel wonderlick verlost, de welcke lieuer hemseluen liet in der grouwelicker leewen kuyle worpen (daer hy haestelick hadde verslonden gheworden, so hem de Enghel des Heeren niet beschermt ende beschuttet en hadde) dan hy den ghebode des Konincx, dwelck (hoewel den Koninck daer niet van wetende) tot zijns leuens beroouinghe ghestelt was, soude ghehoorsaem wesen.

Waerinne wy desen troost hebben: Ist dat wy aen God ende aen zijn woordt met een gheloouich herte blijuen vast hanghende, so en sal hy ons niet verlaten. Ia de grouwelicke leeuwen sullen eer so tam worden als hondekens.

Wederom bewijst God ons hier, hoe hy met de vyanden zijns woordts ende syner Christenen wil handelen: namelick, dat ongheluck dat sy op anderen dien sy toornich zijn, soecken te brenghen, wil God op haer eyghen hooft laten vallen.

Also verandert de sake hier wonderlick: De Godloose meynden Danielem te verdrucken, ende henseluen te verheffen. Maer God maect het also, dat Daniel hooger verheuen wert, ende dat den Naem Gods wijder verbreyt wert: ende de Godloose moeten met hare wijuen ende kinderen wtgheroeyt worden.