Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiiij. Capittel.

1. Na dat hy Ierusalem verstoort heeft, 3. voert hy zijn Euangelium in de gantsche werelt, 9. heerschet alleene, gheweldichlicken in synen Rijcke, 16. ende neemt wech het Leuitische Priesterdom, met tsamen synen wesen, ghereetschap ende vierdaghen.

A.1

SIet, ^* de tijt des Heeren koemt, datmen dynen roof wtdeylen sal in dy.

* den Heere koemt de tijdt,

2

Want ick sal allerley Heydenen, tegen Ierusalem versamelen ten strijde: ende de stadt sal ghewonnen, de huysen gheplondert, ende de vrouwen geschendet worden: ende de helft der stadt sal gheuanghen wech gheuoert worden, ende het ouerghebleuen volck, en sal niet wt der stadt wtgheroeyet worden.

[fol. 84v]

3

Doch de Heere sal wt trecken, ende ^a strijden teghen deselue Heydenen, gelijck als hy pleech te strijden, ter tijdt des krijchs.

a De Gheest sal de werelt straffen om der sonde, etc. Dat sal de strijdt zijn.

4

Ende syne voeten sullen te dier tijdt, staen op den Olyberghe, die voor Ierusalem leyt, tegent Oosten: ende den Olyberch sal hem midden ontwee splijten, vanden Opganck der Sonnen, totten Nederganck, gantsch wijdt van malcanderen: dat hem de eene helft des berchs teghent Noorden, ende de ander teghent Suyden gheuen sal.

5

Ende ghy sullet vlieden voor sulcken dal, tusschen ^b mynen bergen, want het dal tusschen den ^c† bergen, sal naby henenaen reycken aen Azal: ende sullet vlieden, ^d als ghy in voortijden vlodet voor der Aerdbeuinghe, ^e ter tijdt Vsia des Konincks Iuda: so sal dan komen de Heere mijn God, ende alle Heylighen met ^f† dy.

b Dat zijn de twee stucken des Olyberchs, die van malcanderen gheschuert is.

c† And. berchskens

d Amos 1.a.1.

e 2.Par. 26.b.19.

f† And. hem

6

Te dier tijdt en sal gheen licht zijn, maer koude ende vrost.

7

Ende sal eenen dach zijn, die den Heere bekendt is, die noch ^g dach noch nacht zy, ende omtrent den auondt sal het licht zijn.

g Het Euangelium en sal niet eenen lijffelicken dach noch licht zijn: daertoe alle dat andere wat sus lange een lijflick Godsdienst gheweest is, dat sal alsdan gheestlick zijn.

8

^h Te dier tijdt, sullen verssche wateren wt Ierusalem vlieten: de helft na de Zee teghent Oosten, ende de ander helft na de wterste Zee, ende sal dueren, beyde des somers ende des winters.

h Sacha. 13.a.1. Apocal. 22.a.1.

9

ⁱ Ende de Heere sal Koninck zijn ouer alle landen: te dier tijdt, sal de Heere slechs Een zijn, ende synen Name slechs Een.

i Obad. c.21.

B.10

Ende men sal inden gantschen lande rondtomme gaen, als op eenen slechten velde, van Gibea na Rimon toe, teghent Suyden na Ierusalem: want sy sal verheuen ende bewoont worden, aen harer plaetse, van der poorte BenIamin, tot aen de plaetse der eerster poorten, tot aen de Hoeckpoorte toe, ende vanden ^k torren Hananeel, tot aen des Konincx wijnperssen.

k Nehem. 3.a.1. Ierem. 31.d.38.

11

Ende men sal daerinne woonen, ^l ende daer en sal gheenen Ban meer zijn, ^m want Ierusalem sal gantsch seker woonen.

l Apoca. 22.a.3.

m Ierem. 33.b.16

12

Ende dat sal de plaghe zijn, ⁺ daer de Heere alle volcken mede plaghen sal, die teghen Ierusalem gestreden hebben: haer vleesch sal verdwijnen, dewijle dat sy noch op haren voeten staen, ende hare oogen inden holen vergaen, ende hare tonghen inden monde vergaen.

+ Staffe der tyrannen ende rotten.

13

ⁿ Te dier tijdt sal de Heere een groot rumoer onder hen aenrichten, dat de eene den anderen sal by der hant vaten, ende syne hant op des anderen hant legghen.

n Hagge. 2.c.22.

14

^o Want oock Iuda sal teghen Ierusalem krijghen: Op dat versamelt worden de goeden aller Heydenen, die rondtomme zijn, gout, siluer, ende kleederen, bouen maten vele.

o Sacha. 12.a.2.

15

Ende so sal dan dese plaghe gaen, ouer peerden, muylen, kemelen, esels, ende allerley ghedierte, die inden seluen heyre zijn, als ghene gheplaecht zijn.

16

Ende alle ouerghebleuene onder allen Heydenen, die tegen Ierusalem toghen, sullen Iaerlicx henenop komen, aen te bidden den Koninck, den Heere Zebaoth, ende te houden het Loofhuttenfeest.

17

Welcker gheslachte nu op Aerden, niet henenop komen en sal na Ierusalem, den Koninck den Heere Zebaoth, aen te bidden, ouer die en sal het niet reghenen.

18

Ende wanneer het gheslachte der Egyptenaers, ⁺ niet henenop toge ende quame, so sal het ouer haer oock niet reghenen: dat sal de plaghe zijn, daer de Heere alle Heydenen mede plagen sal, die daer niet henenop komen, het Loofhutten Feest te houden.

+ Dat is de grootste ende grouwelickste plaghe, dat men van Gods woort moet berooft zijn.

19

Want dat sal een sonde zijn der Egyptenaers, ende aller Heydenen, die niet henenop en komen, het Loofhutten Feest te houden.

C.20

Te dier tijdt, sal de rustinghe der peerden, den Heere heylich zijn, ende de ketelen inden huyse des Heeren, sullen ghelijck zijn, als de beckenen voor den Altaer.

21

Want alle ketelen, beyde in Iuda ende Ierusalem, sullen den Heere Sebaoth heylich zijn, also, dat alle die daer offeren willen, sullen komen, ende deselue nemen, ende daerinne koken: ende daer en sal gheen ^p† Cananiter meer zijn, inden huyse des Heeren Sebaoth, te dier tijdt.

p† And. kremer.

Eynde des Propheten SacharIa.