Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiij. Capittel.

1. Christi kercke wort van sonden, Afgoden, ende valschen Propheten gereynicht, 7. haer Herder Christus, wert gheslaghen, 8. ende van eenen seer kleynen hoope aenghenomen.

A.1

TE dier tijt sal het huys Dauids, ende de burghers te Ierusalem, een vrije opene ^a Fonteyne hebben, teghen de sonde ende onreynicheyt.

a Hesek. 47.a.2. Sacha. 14.a.8. Ioan. 19.d.34.

2

^b Te dier tijt, spreeckt de Heere Zebaoth, wil ick der Afgoden namen wtroeyen wt den lande, datmen harer niet meer gedencken en sal: ^c daertoe wil ick oock de Propheten ende onreyne gheesten, wt den lande drijuen:

b Iesaie. 2.c.20. Hesek. 30.b.13.

c Ierem. 14.b.15.

3

Dat het also toegaen sal, ^d Wanneer yemant meer ^e propheteert, so sullen zijn vader, ende moeder die hem ghegenereert hebben, tot hem seggen: Du en salt niet leuen, want du sprekest leughenen inden Name des Heeren: ende also sullen hem de vader ende de moeder, die hem ghegenereert hebben, doorsteken, wanneer hy propheteert.

d Deuter. 13.b.12.

e Of, prophetischer wijse wat voorseyt.

4

Want het sal te dier tijdt gheschieden, dat de Propheten met schanden bestaen, met haren ghesichten, wanneer sy daer van propheteren: ^f ende en sullen niet meer eenen rouwen mantel aentrecken, daer sy mede bedrieghen:

f 2.Reg. 1.a.8.

5

Maer hy sal moeten segghen: ^g Ick en ben gheen Propheet, maer een ackerman: want ^h ick hebben menschen ghedient, van myner ieughet op.

g Amos 7.b.14.

h In Hebre. Ick ben lijfeygen van myner ieuget op eens menschen.

6

So men dan segghen sal tot hem: Wat zijn dat voor wonden in dynen handen? so sal hy segghen: So ben ick gheslaghen inden huyse, der ghenen, die my lief hebben.

7

Sweert, maket dy op ouer mynen Herder, ende ouer den man, ^i† die my de naeste is, spreeckt de Heere Zebaoth: ^k slaet den Herder, so sal hem de kudde verstroyen: so wil ick myne hant keeren tot den kleynen.

i† And. mijn medegheselle, etc. is,

k Matth. 26.d.31. Marc. 14.c.27. Ioan. 16.d.31.

8

Ende het sal geschieden, in welcken lande, spreect de Heere, twee deelen zijn, die sullen wtgheroeyet worden, ende ondergaen, ^l ende het derde deel sal daerinnen ouerblijuen.

l Amos. 9.a.8.

9

Ende ick wil datselue derdendeel door het vyer voeren ende ^m louteren, als men siluer loutert, ende vaghen als men gout vaghet: ⁿ die sullen dan mynen Name aenroepen, ende ick wilse verhooren: ick wil seggen: ^o Het is mijn volck: ende sy sullen segghen: Heere mijn God.

m Sapien. 3.a.6. 4.Esd. 9.h.74. 1.Petri. 1.a.7.

n Iesaie 58.a.9.

o 2.Corin. 6.b.16.