Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xij. Capittel.

Christus Kercke, een steen der ergernisse, 4. staet in haren cruyce, onder de hulde ende bescherminge Gods, 6. ende is een ouerwinnersse harer vyanden, 10. Christus wort door synen Gheest verklaert.

A.1

DIt is den last des woordts vanden Heere ouer Israel, spreeckt de Heere, ^a die den Hemel wtbreydet, ende de Aerde fondeert, ^b ende den adem des menschen in hem maket.

a Iesaie. 40.c.22. ende 44.c.24. ende 45.b.12.

b Gene. 2.a.7.

2

Siet, ick wil Ierusalem tot eenen tuymelbeker maken, allen volcken, die rondtomme zijn: ^c want het sal oock Iuda gelden, wanneer Ierusalem beleydt wert.

c Sacha. 14.b.14.

3

Dannoch wil ick, ter seluer tijdt, Ierusalem maken, tot eenen last steene allen volcken: alle die denseluen wech heffen willen, die sullen hen daeraen versnijden: want alle Heydenen op Aerden, sullen hen teghen haer versamelen.

4

Te dier tijdt, spreeckt de Heere, wil ick alle peerden schuwe, ende haren ruyteren banghe maken: doch ouer Ierusalem wil ick myne oogen open hebben, ende alle peerden der volcken met blindtheyt plaghen.

5

Ende de Vorsten Iuda, sullen segghen in haren herten: Laet slechs de burghers Ierusalems eenen goeden moet hebben, inden Heere Zebaoth haeren God.

6

^d Te dier tijt wil ick de Vorsten Iuda maken, tot eenen vyerighen ouen inden houte, ende tot eener fackelen int stroo, dat sy verteeren, beyde ter rechter ende ter slincker zijden, alle volcken omme ende omme: ende Ierusalem sal oock voortaen bewoont worden, aen haren plaetsen te Ierusalem.

d Obad. b.18. Amos 1.a.4.

7

Ende de Heere sal de hutten Iuda verlossen, als in voortijden: op dat hem het huys Dauids niet hooch en beroeme, noch de burghers te Ierusalem teghen Iuda.

8

Te dier tijt, sal de Heere de burghers te Ierusalem beschermen, ende het sal geschieden, dat, wie swack zijn sal onder hen, te dier tijdt, die sal zijn als ^e Dauid: end het huys Dauids sal zijn, als Gods huys, als des Heeren Enghel voor hen.

e 1.Sam. 17.f.50.

9

Ende te dier tijt, sal ick dencken te verdelgen alle Heydenen, die teghen Ierusalem ghetogen zijn.

B.10

Doch ouer het huys Dauids, ende ouer de burghers te Ierusalem, wil ick wtgieten ^f den Gheest ^g der ghenade, ende des ^h† ghebets: ⁱ want sy sullen my aensien, dien ghene doorsteken hebben: ^k ende sullen hen beklaghen, alsmen een eenich kindt beklaecht, ende sullen hen om hem bedroeuen, als men hem bedroeft, om een eerste kindt.

f Hesek. 36.c.26. Ioel 2.c.28. Act. 2.b.17.

g Act. 4.d.31.

h† An ontfermens

i Ioan. 19.d.37.

k Act. 2.d.37.

11

^l Te dier tijt, sal groot leedt dragen zijn te Ierusalem, ^m als daer was by Hadadrimon inden velde Megiddon.

l Luc. 23.c.29. 2.Reg. 24.a.2.

m 2.Para. 35.c.22.

12

Ende het landt sal leedt draghen, een yeghelick gheslachte bysonder: het geslachte des huys Dauids bysonder, ende hare wijuen bysonder: het geslachte des huys ⁿ Nathan bysonder, ende hare wijuen bysonder:

n 2.Sam. 5.b.14. ende 12.a.1.

13

Het gheslachte des huys Leui bysonder, ende hare wijuen bysonder: het gheslachte Simei bysonder, ende hare wijuen bysonder.

14

Also alle andere gheslachten, een yeghelick bysonder, ende hare wijuen oock bysonder.