Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xj. Capittel.

1. Propheteert, dat Christus van den Ioden soude verkocht worden, voor dertich Siluerlinghen, daerom hyse oock verlaten soude, dat Ierusalem eyndtlicken verstooret, ende de Ioden in dwalinghe verstocket, ende verstroyet souden worden, ende also het Euangelium ende het Rijcke Christi na synen tijden, onder de Heydenen komen.

A.1

DOet dyne poorten op, ⁺ Libanon, dat het vyer dyne Cederen verteere.

+ Libanon is Ierusalem wt Libano gebouwet, ende door de Romeynen verstooret.

2

Huylet ghy Dennen, want de Cederen zijn gheuallen, ende dat heerlicke ghebouwete is verstooret: huylet ghy Eycken Basan, want het vaste woudt is omme ghehouwen.

3

Men hooret de herders huylen, want haer heerlicke ghebouwete is verstooret: men hooret de ionghe Leeuwen brullen, want de heerlicheyt des Iordaens is verstooret.

4

So spreeckt de Heere mijn God: Hoedet de slachtschapen.

5

Want hare heeren slachtense, ende en houdent voor ghene sonde: verkoopense, ende spreken: Gheloeft zy de Heere, ick ben nu rijcke: ende hare herderen en verschoonen harer niet.

6

Daerom en wil ick oock der inwooners inden lande niet meer verschoonen, spreeckt de Heere: ende siet, ick wil de lieden laten, eenen yeghelicken in der handt des anderen, ende in der handt synes Konincks, dat sy het landt ^a† verslaen, ende en wilse van harer handt niet ^b† verlossen.

a† And. te morsel slaen

b† An. wtrucken

7

Ende ick hoedde de slachtschapen, om der ellendigher schapen wille: ende nam twee stauen tot my, den eenen hiete ick Soet, den anderen hiete ick Suer, ende hoedde de schapen.

8

Ende ick verdelchde dry herderen in eener maendt: want ick en mochte harer niet, so en wouden sy myner oock niet.

9

Ende ick sprack: Ick en wil v niet hoeden, ^c wat daer steruet, dat sterue, wat versmachtet, dat versmachte, ende de ^d† ouerblijuende, verslinde een yeghelick, des anderen vleesch.

c Iere. 15.a.2.

d† An. andere etc.

B.10

Ende ick nam mynen staf Soete, ende ^e verbrack hem, ^f op dat ick mijn verbondt wech name, dat ick met allen volcken ghemaket hadde.

e Of, bracken in stucken

f Hosee. 2.b.17.

11

Ende het werdt dies daechs wech genomen: ende de ellendighe schapen, die het met my hielden, merckten daerby, dat het des Heeren woort ware.

12

Ende ick sprack tot hen: Behaecht het v, so brenghet herwaerts so vele als ick ghelde: so niet, so laet het aenstaen: ^g ende sy woegen daer, so vele als ick galdt, dertich Siluerlinghen.

g Matth. 27.a.9. Iere. 32.b.10.

13

Ende de Heere sprack tot my: Werpt het henen, dat het den Potbacker ghegheuen worde, Ey een treflicke somma, dier ick weert geachtet ben van hen: ende ick nam de dertich Siluerlinghen, ende wierpse in het huys des Heeren, op dat sy den Potbacker ghegheuen werden.

[fol. 84r]

14

Ende ick verbrack mynen anderen staf Suer, op dat ick de broederschap tusschen Iuda ende Israel wech name.

15

Ende de Heere sprack tot my: Neemt wederom tot dy ^h eens dullen Herders ghereetschap.

h Hesek. 34.a.2.8.

16

Want siet, ick sal Herders inden landte opwecken, die het versmachtede niet besien, het ^{i† †} verslaghene niet soecken, ende het verbrokene niet heelen, ende het ghesonde niet versorghen en sullen: doch het vleesch der vetten sullen sy verslinden, ende hare klauwen verscheuren.

i† And. te morsel gheslagen.

† And. ionck teerder lam maken.

17

^k† O Godekensherders, die de kudde verlaten: het sweerdt kome op haren arm, ende op hare rechter ooghe: haren arm moet verdorren, ende haer rechter ooghe doncker worden.

k† An. Ueruloect zy de onnutte Herder die etc. verlaet.