Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat x. Capittel.

1. Scheldet der valschen Afgodendienst, met tsamen den valschen Propheten ende herderen, 3. beschrijft der gheloouighen onuerwindtlicke sterckheyt, 7. ende menichuuldighe ghenade onder haren Koninck Christo.

A.1

SO biddet nu van den Heere den spaden reghen, ^a so sal de Heere wolcken maken, ende v reghens ghenoech gheuen, tot aller vrucht op den velde.

a Deut. 28.b.12.

2

Want de Godekens spreken enckel moeyte, ^b ende de waersegghers sien enckel leughenen, ende spreken vergheuische droomen, ende haer troosten en is niets: daerom gaen sy ^c bijster, als een kudde, ende zijn versmachtet, ^d dewijle daer gheen herder en is.

b Hesek. 13.a.6.

c Of, verdwaelt

d Hesek. 13.a.3.

3

Mynen toorne is vergrimmet ouer de herderen, ende ick wil de ^e bocken te huyssoecken, want de Heere Zebaoth sal syne kudde te huyssoecken, namelicken, het huys Iuda, ende salse toerusten, als een wtghecieret peerdt ten strijde.

e Dat zijn de Priesters ende Propheten in den volcke, die Christus namaels Phariseen heet.

4

^f† De hoecken, naghelen, strijdtboghen ende drijuers alle sullen van hen wech komen.

f† And. Ia van hem [den Iuda] sal zijn den egge, van hem sal zijn de nagel, van hem sal zijn de strijdtboghe, van hem sullen wtgaen alle dwinghers met malcanderen.

5

Ende sullen dannoch ghelijckewel zijn, als de Reusen, die den dreck op der straten treden in den strijde, ende sullen strijden: want de Heere sal met hen zijn, dat de ruyters te schanden worden.

6

Ende ick wil het huys Iuda stercken, ende het huys Ioseph ^g† ontlossen, ende wilse weder insettten, want ick ontferme my harer: ende sullen zijn als sy waren, doe ickse niet verstooten en hadde: want ick de Heere haer God wilse verhooren:

g† And. verlossen

7

Ende Ephraim sal zijn, als een Reuse, ende haer herte sal vrolick worden, als van wijne: daertoe hare kinderen sullent sien, ende hen verheugen, dat haer herte aen den Heere vrolick zy.

8

Ick wilse aenblasen, ende haer versamelen, want ick wilse verlossen: ende sy sullen hen vermeerderen, als sy hen te voren vermeerdert hebben.

9

Ende ick wilse onder de volcken saeyen, dat sy myner ghedencken in verren landen: ende sullen met haren kinderen leuen ende wederkomen.

B.10

Want ick wilse weder brenghen wt Egyptenlandt, ende wilse versamelen wt Assyrien, ende wilse int landt Gilead ende Libanon brenghen, datmen ^h† se niet vinden en sal.

h† an niet [ruyms] ghenoech voor haer etc.

11

Ende hy sal door de Zee des ⁱ angsts gaen, ende de baren in de Zee slaen, dat diepe wateren verdrooghen sullen: ^k so sal dan vernedert worden de heerlicheyt te Assyrien, ende de ^l Scepter in Egypten sal ophouden.

i Dat heet, de enghe Zee, als sy door de roode Zee ginghen, door sodanighe enge Zee moeten wy alle gaen.

k Iesa. 10.a.5.c.26

l Hesek. 29.a.2.

12

Ick wilse stercken in den Heere, dat sy sullen wandelen in synen Name, spreect de Heere.