Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Uermaentse tot vroomheydt ende beteringhe, 4. propheteert teghen de Philisteen, 8. Moab, Ammon, 12. Moorenlieden ende Assyria.

A.1

^a† VErgadert v, ende koemt herwaerts, ghy verdrietlick volck,

a† And. Ondersoecket v seluen,

2

Eer dan het oordeel wtgaet, dat ghy als kaf by daghe, henen wech varet, eer dan des Heeren grimmigen toorn ouer v kome, eer den dach des Heeren toorn, ouer v kome,

[fol. 78v]

3

^b Soecket den Heere, alle ghy ellendighen in den lande, ghy die sijne rechten houdet: soeckt gherechticheyt, soeckt ootmoedt, op dat ghy aen den daghe des toorns des Heeren, moeghet verborghen worden.

b Iesai. 55.a.6. Amos 5.a.6.

4

^c Want Gasa moet verlaten worden, ende Ascalon woest worden: Asdod sal in den middaghe verdreuen worden, ende Accaron wtghewortelt worden.

c Iesai. 14.c.29. Ierem. 27.a.1. Hesek. 25.b.15.

5

Wee dien, die aen der Zee henen af woonen, den krijghers, des Heeren woordt sal ouer v komen: ⁺ du Canaan der Philisteenlandt, ick wil dy ombrenghen, dat daer niemandt meer woonen en sal.

+ Philisteen.

6

Daer sullen aen der Zee henen af enckel Herders huysen ende schaepskoyen zijn.

7

Ende datselue sal den ouerghebleuen aen den huyse Iuda, te deele worden, dat sy daer op weyden sullen: des auonts sullen sy hen in den huysen Ascalon legheren, wanneer haer nu de Heere haer God wederom te huys ghesocht, ende hare gheuanckenisse ghewendet heeft.

8

Ick hebbe de smaedtheydt Moabs, ⁺ ende het lasteren der kinderen Ammon, ghehooret, daer mede sy mijn volck ^d ghesmadet, ende hen op desseluen landtpalen gheroemet hebben.

+ Moab. Ammon. Iesai. 15. 16. Iere. 18.a.1. Hesek. 25.a.8.

d Of, ghehoonet,

9

Welaen, so warachtich als ick leue, spreect de Heere Zebaoth, de God Israels: Moab sal ^e als Sodom, ende de kinderen Ammon, als Gomorra worden: Ia als eenen netelstruyck ende soutgroeue, ende een eewighe woestijne: de ouerblijuende mijns volcks sullense beroouen, ende de ouerghebleuene mijns volcx sullense eruen.

e Gene. 19.c.24.

B.10

^f Dat sal hen ghebeuren, voor hare hooueerdije, dat sy des Heeren Zebaoths volck, ghehoonet, ende hen gheroemet hebben.

f Sacha. 2.a.8.

11

Schricklick sal de Heere ouer haer zijn, ^g want hy sal alle Goden op Aerden ^h verdelghen, ende alle ⁱ Eylanden onder den Heydenen sullen hem aenbidden, een yeghelick aen syner plaetse.

g Iesai. 2.b.18.

h Dat is van den Euangelio gheseyt, welck komen soude na der Babylonischer geuanckenisse, als dan gheschiet is.

i Apocal. 15.a.4.

12

Oock sullet ghy Moorenlieden, ⁺ door mijn sweert verslaghen worden.

+ Moorenlieden Assur.

13

Ende hy sal zijn hant strecken ouer het Noorden, ende Assur ommebrenghen: ^k Niniue sal hy eensaem maken ende dorre, als een woestijne.

k Tob. 14.a.6. Nahum. 2.b.10. ende 3.a.7.

14

^l Dat hen daer in legheren sullen, allerley gedierte onder den Heydenen: oock sullen ^m† Roerdompen ende Swijneghels woonen op haren thorrens, ende sullen in den vensteren singhen, ende de Rauen op den balcken: want de Cederen berders sullen afghereten worden.

l Iesai. 14.b.11.

m† And. Stockwlen ende Kranen. [and. Koeckoecken ende Nachtwlen] op haren gesneden loouerwercke sitten, het voghelgesanck ende gheschrey, sal onder den vensteren, ende een verwoestinge op den stijlen zijn.

15

Dat is de vrolicke stadt, die so seker woonde, ende sprac in harer herten: ⁿ Ick bent, ende gheene meer: hoe is sy so woest gheworden? dat de ghedierten daerinne woonen, ende wie daer voor by gaet, die fluytetse aen, ende klappet met der handt ouer haer.

n 2.Reg. 19.c.23.d.35. Iesai. 47.a.8. Hesek. 28.a.2. ende 29.a.3.