Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE PROPHEET ZephanIa.

Dat eerste Capittel.

1. Propheteert teghen Iuda ende Ierusalem, voorseydt hen hare grousame ende verschrickelicke straffe van den Heere, wt oorsake harer Afgoderije ende roeckelooser sekerheyt.

A.1

DIt is het vvoort des Heeren, welcke gheschiedde tot ZephanIa, den sone Chusi, des soons Gedalia, des soons Amaria, des soons Hiskia, ter tijt ^a Iosia des soons Amon, des Konincx Iuda.

a 2.Reg. 21. 23.

2

Ick wil alle dinck wt den lande wech nemen, spreeckt de Heere.

3

Ick wil beyde menschen ende vee, beyde voghelen des Hemels ende visschen in der Zee, wech nemen, met tsamen den erghernisse ende Godloosen, Ia, ick wil de menschen wtroeyen wt den lande, spreeckt de Heere.

4

Ick wil myne handt wtstrecken ouer Iuda, ende ouer alle die te Ierusalem woonen: also wil ick het ouergebleuene van Baal wtroeyen, daertoe den name der ^b Camarim ende Papen wt deser plaetse.

b Die beter zijn wouden, dan de slechte Papen oft Priesters: ende Malchom was een Afgod der kinderen Ammon. 2.Reg. 23.a.5.

5

Ende die, die op den daken des Hemels heyr aenbidden: die het aenbidden, ^c ende sweeren doch by den Heere, ende tegelijcke by Malchom.

c Deute. 10.c.20.

6

Ende die van den Heere afuallen, ende na den Heere niets en vraghen, ende hem niet en achten.

7

^d Weset stille voor den Heere Heere, want ^e des Heeren dach is na by: want de Heere heeft een slachtoffer bereydet, ende syne ^f gasten daer toe ghenoodet.

d Psalm. 37.a.7. ende 46.b.11.

e Amos 5.b.18.

f De Babyloniers, die Ierusalem souden opeten, daerom, dat sy vreemde wijse, God te dienen hielden, buyten Mosis beuel, etc.

8

Ende aen den dage des slachtoffers des Heeren, wil ick te huys soecken, de Vorsten, ende ^gdes Konincx kinderen, ende alle die een vreemdt ^h kleet draghen.

g 2.Reg. 25.a.7. Ierem. 39.a.6.

h Namelicken in haren Afgodendienste, als Misse ghewaet, Choorkappen etc. want sy hebben sonderlicke wijse, offer ende kleederen gestichtet, den God te Ierusalem tot verdriet.

9

Oock wil ick terseluer tijdt die te huys soecken, die ouer den dorpel springen, die harer heeren huys veruullen, met rooue ende bedriegherije.

B.10

Ter seluer tijt, spreeckt de Heere, sal hem een luydt gheschrey verheffen van der ^* Vischpoorten aen, een huylen van der anderen poorte, ende een groot iammer op den kleynen bergen.

* Nehe. 3.a.3

11

Huylet ghy die in der ⁱ meulen woonet, want het gantsche kremervolck is henen wech, ende alle die ghelt vergaderen, zijn wtgheroeyet.

i Ierusalem die nu gantschlicken den Mammon ende buycke dienender ende wt der Kercken een meulen of keucken gheworden was, ende enckel tijdtlick goet sochte, met haren Godsdienste: gelijck als by ons oock etc.

12

Terseluer tijdt, wil ick Ierusalem met lanternen doorsoecken, ende wil te huys soecken de lieden, ^k die op haren droesem liggen, ende spreken in harer herten: ^l De Heere sal noch goedt noch quaet doen.

k Die daer seker sitten, als wijn, diemen niet aflaten soude, ende bespotten het dreyghen der Propheten.

l Deut. 9.b.19. Ierem. 23.b.17.

13

Ende hare goederen sullen ten rooue worden, ende hare huysen tot eener woestijne: ^m sy sullen huysen bouwen, ende daer niet in woonen, sy sullen wijnberghen planten, ende gheenen wijn daer van drincken.

m Amos 5.b.12. Deute. 28.d.30.

14

ⁿ Want des Heeren grooten dach is na by, ende snellet hem gantsch seer: ^o wanneer dat geschrey van den daghe des Heeren komen sal, so sullen de stercke dan bitterlicken schreyen.

n Ierem. 30.a.7. Amos 5.b.18. Ioel. 2.b.11.

o 4.Esd. 2.c.27. Matth. 24.c.29. Apoc. 1.a.7.

15

Want desen dach is eenen dach der grimmicheyt, ^p eenen dach der droeffenisse ende des angsts, eenen dach des weders ende onstuymicheyt, eenen dach der duysternisse ende donckerheydt, eenen dach der wolcken ende des neuels.

p Male. 4.a.5.

16

Eenen dach der basuynen ende trompetten, teghen de vaste steden ende hooghe berghen.

17

Ick wil den lieden banghe maken, dat sy rontom gaen sullen, als de blinden, daerom, dat sy teghen den Heere ghesondicht hebben: haer bloedt sal vergoten worden, als ware het stof, ende haer lijf, als ware het dreck.

18

^q Haer siluer ende gout en salse niet ^r† verlossen konnen aen den daghe des toorns des Heeren, ^s maer het gantsche landt sal door het vyer zijns ijuers verteert worden: want hy sal dies in korten een eynde maken, met allen die in den lande woonen.

q Hesek. 7.b.19.

r† An. beschermen, wtrucken

s Zephan. 3.a.8.