Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Houdet het volck op, in synen lijden ende vertrecke des troosts met warachtighen gelooue op Gods toesegginghe, predicket, de NebucadNezar soude syner hooueerdije ende roouerije, 9. syner giericheyt, 12. tyrannije, 15. swelgherije, 18. ende Afgoderije, straffe noch draghen, ende schandelicken ondergaen.

A.1

HIer ^a stae ick op myner wachte, ende trede op myne ^b sterckte, ende schouwe, ende sie toe, wat my geseyt worde, ende wat ick antwoorden sal dien, die my scheldet.

a Iesai. 21.a.8.

b Of, vasticheyt

2

De Heere doch antwoordet my, ende spreect: Schrijft het ghesichte, ende schildert het op een tafel, dat het lesen konne, wie daer voor by loopt.

3

[Namelicken also:] ^c De propheteringhe sal ymmers noch veruult worden te syner tijt, ^d ende sal eyndtlicken vrij aen den dach komen, ende niet ^e wtblijuen: oft sy het dannoch vertreckt, so verwachtet harer: sy sal ghewislicken komen, ende het niet vertrecken.

c Danie. 9.c.24.

d Hebr. 10.d.37.

e Of, feylen

4

Siet, wie halssterck is, die en sal gheen ruste in syner herten hebben: ^f want de Rechtueerdighe leuet zijns gheloofs.

f Iesai. 21.a.2. Ioan. 3.d.36. Roma. 1.b.17. Gala. 3.b.11. Hebr. 10.d.38.

5

^* Doch de wijn bedriecht den stouten man, dat hy niet blyuen en kan, welcke zijn ziele opsperret, als de Helle, ^g ende is ghelijck als de doodt, die niet te versadighen en is: maer rapet tot hem alle Heydenen, ende vergadert tot hem alle volcken.

* Cap. iij. Lut.

g Prouer. 30.b.16.

6

Wat gheldt het doch? deselue alle, sullen een spreucke van hem maken, ende een ^h† seggen ende spreeckwoordt, ende sullen segghen: Wee dien, die zijn goet vermeerdert met vreemden goede: hoe langhe sal het dueren? ende ladet slechs vele drecks op hem.

h† And. saghe.

7

O hoe gantsch ⁱ onuersiens sullen opwaken, die dy bijten, ende ontwaken, die dy wech stooten, ende du moest hen te deele worden.

i die dy bijten sullen, en sullen niet onuersiens waken,

8

^k Want du hebst vele Heydenen berooft: so sullen sy dy weder beroouen alle ouerghebleuene van den volcke: om des bloets wille der menschen, ende om des ^l wreuels wille in den lande, ende in der stadt, ende aen allen, die daer inne woonen, begaen.

k Obad. b.15.

l Dat is, onbillicken onrechts ende moetwillens

9

Wee dien, die gierich is ten onghelucke zijns huys, op dat hy ^m synen nest in de hoochte legghe, dat hy den ongheualle ontkome.

m Obad. a.4.

B.10

Doch dynen raedtslach, sal ter schande dijns huys ghedijen: want du hebst te vele volcken ^n† verslaghen, ende hebst met allen moedtwille ghesondighet.

n† An. tot puluer gheslaghen,

11

^o Want oock de steenen in der mueren sullen schreyen, ende de balcken aen den ^p ghesperre, sullen hen antwoorden.

o Luc. 19.e.40.

p Of, solder,

12

^q Wee dien, die de stadt met bloede bouwet, ende bereydet de stadt met onrecht.

q Hesek. 24.a.3. Nah. 3.a.1. Mich. 3.b.10.

13

Isset niet also, dat het van den Heere ^r† Zebaoth gheschieden sal? wat dy de volcken ghearbeydet hebben, moet met vyere verbranden, ende daer de lieden moede aen gheworden zijn, moet verloren zijn.

r† And. der Heyrscharen

14

^s Want de Aerde sal vol worden, van der kennisse der eere des Heeren, als water dat de Zee bedecket.

s Exod. 9.b.16. Nume. 14.c.21. Iesai. 12.a.9.

15

Wee dy, die du dynen naesten inschenkest, ende menghest dyne grimmicheydt daer onder, ende hem droncken makest, ^t op dat du syne schaemte siest.

t Gene. 9.c.21.

16

Men sal dy oock versadighen, met schande voor eere: so suypt du nu oock, dat du tuymelst: want de kelck in der rechter handt des Heeren, sal dy ommeuangen, ende moest schandelicken spouwen voor dyne heerlicheyt.

17

^u Want de ^x wreuel aen Libanon begaen, sal dy oueruallen, ende de verstoorde ghedierten sullen dy verschricken: om des bloedts wille der menschen, ende om des wreuels wille in den lande ende in der stadt, ende aen allen die daerinne woonen, begaen.

u Ierem. 50.b.15. Obad. b.15.

x Dat is, moedtwillighe onbillicke boosheyt.

18

Wat sal dan ^y dat beelt helpen, dat zijn Meester ghebeeldet heeft? ende het valsche ghegoten beeldt, daer op hem de Meester verlaett, dat hy stomme Afgoden makede?

y Iesai. 44.a.9. Iere. 10.a.3.

19

Wee dien, die ten houte spreeckt, Waeckt op: ende ten stommen steenen, Staet op: hoe soude het leeren? siet, ^z het is met goude ende siluer ouertoghen, ende daer en is gheen adem in hem.

z Ierem. 10.a.4.

20

^{a *} Maer de Heere is in synen heyligen Tempel, de gantsche werelt die zy voor hem stille.

a Psalm 11.a.5.

* Cap. iiij.Lut.