Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE PROPHEET Habacuc.

Dat Eerste Capittel.

1. Hy beklaghet hem voor God, der boosheyt des volcx, 5. ende dreycht hen Gods straffe, 12. biddet daerbeneuen, de Heere wilse den vromen ten besten gedijen laten, 13. ende voluoert syne klaghe, waeromme hy, die so rechtueerdich is, der Tyrannen wreuelich woeden ouersiet,

A.1

DIt is den last, die de Propheet Habacuc ghesien heeft.

2

Heere, hoe ^a langhe sal ick schreyen, ende du en wilt niet horen? ^b Hoe lange sal ick tot dy roepen ouer ^c wreuel, ende du en wilt niet helpen?

a Psalm. 22.a.3.

b Psalm 22.a.2. Hiob 19.a.7.

c Onbillicke onrecht,

3

Waerom laetstu my moeyte ende arbeydt sien? waerom wijsestu my roof ende wreuel rontom my? ^d ghewelt gaet ouer het recht.

d Of, Hader ende kijf heeft de ouerhandt.

4

Daerom gaet het gantsch anders, als recht is, ende gheen rechte saecke en kan ghewinnen: want de Godloose ^e verkortet den rechtueerdighen, daerom gaen verkeerde oordeelen.

e Of, verlistighet

5

^f Siet onder den Heydenen: ^g siet ende verwondert v: want ick wil wat doen tot uwen tijden, dat ghy niet gheloouen en sullet, wanneer men daer van segghen sal.

f Desen spreuck voeret S. Paulus Actu. 13.e.41. op een ander wijse, als hem hier de Propheet voeret: als hy anders wel meer te doen pleecht.

g Actu. 13.e.41.

6

^h Want siet, ick wil de Chaldeen verwecken, een bitter ende snelle volck, dwelck trecken sal, so wijdt als het landt is, wooninghen in te nemen, die niet syne en zijn.

h Deute. 28.e.49.

7

Ende sal grousaem ende verschricklick zijn, dwelck ghebiedt ende dwinghet, hoe het slechs wil.

8

ⁱ Hare peerden zijn sneller, dan de Luypaerden, so zijn sy oock bijtischer, ^k dan de Woluen des auondts: hare Ruyters trecken met grooten hoopen van verre daer henen, als vloghen sy, als de Arnden ten aese hen snellen.

i Ierem. 4.b.13. Thren. 4.b.19.

k Sapien. 3.a.3.

9

Sy komen altesamen, op dat sy schade doen: waer sy henen willen, daer breken sy henen door, als eenen Oostenwindt, ende sullen gheuangene tesamen rapen als zandt.

B.10

Sy sullen de Koninghen bespotten, ende der Vorsten sullen sy belachen, alle ^l vesten sullen hen eenen schimp zijn: want sy sullen bolwercken maken, ende haer doch ghewinnen.

l Dat is, sterckten, vasticheden.

[fol. 77v]

11

Als dan sullen sy eenen nieuwen moedt nemen, sullen vortuaren ende hen versondighen: ^m dan moet hare ouerwinninghe haers Gods zijn.

m Iesai. 46.a.7. 2.Para. 28.c.23.

12

Maer du Heere, mijn God, mijn ⁿ Heylige, die du van eewicheyt aen bist, laett ons niet steruen: maer laettse ons, O Heere, alleen een straffe zijn, ende laettse, O onse ^o Hordt, ons slechs tuchtighen.

n Psalm. 89.b.19. Iesai.1.a.4.

o Dat is, Stercte, Rotze,

13

Dyne oogen zijn reyne, dat du het boose niet sien en machst, ende den iammer en kanstu niet toesien: ^p waerom siestu dan de verachters toe, ende swijgst, dat de Godloose dien verslindet, die daer vromer is dan hy?

p Ierem. 12.a.1. Psalm 31.a.7. ende 73.a.2. Iob 21.a.7.

14

Ende laetst de menschen gaen, als de visschen in der Zee, als wormen, die gheenen heere en hebben.

15

^q Sy treckent alles met der ^r angel, ende vanghent met haren nette, ende versamelent met haren garen, dies verheughen sy hen, ende zijn vrolick.

q Ierem. 5.c.24.

r Of, hame,

16

Daerom offeren sy haren Nette, ende roocken haren Garen, dewijle dat door deseluen haer deel so vett, ende hare spijse so oueruloedich geworden is.

17

Derhaluen werpen sy haer netten noch altoos wt, ende en willen niet ophouden, lieden te verworghen.