Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Uerklaret noch wijder van der straffe Niniue ende der Assyriers, 8. tooghet aen het exempel van Alexandria, 12. ende slaet hen haer valsch vertrouwen op wterlicke macht ende ghewelt gantsch af.

A.1

VVee der moorderschen stadt, die vol ^a leugenen ende roouerije is, ende van haren roouen niet aflaten en wil.

a Afgoderije, welcke hy oock toouerije ende hoererije noemet. Hesek. 24.a.9. Habac. 2.b.12. Mich. 3.b.10.

2

Want daer salmen de sweepen hooren klappen, ende de raders bolderen, de peerden schreyen, ende de waghenen rollen.

3

Hy brenget ruyters herwaerts op met blinckenden sweerden, ende met glinterenden spiessen: daer ligghen vele verslaghene, ende groote hoopen lichamen, dat derseluen gheen ghetal en is, ende men ouer hare lichamen vallen moet.

4

Dat alle om der grooter hoererije wille, der schooner lieuer hoeren, die met toouerije ommegaet, die met harer hoererije de Heydenen, ende met harer toouerije, landen ende lieden verworuen heeft.

5

^b Siet, ick wil aen dy, spreeckt de Heere Zebaoth, ick wil dy dijn ^c lijftbelech ontdecken onder dynen aenghesichte, ende wil den Heydenen dyne blootheydt, ende den Koninckrijcken dyne schande, wijsen.

b Iesai. 47.a.3. Hesek. 16.d.37.

c Of, slippen

6

Ick wil dy gantsch grouwelick maken, ende dy schenden, ende een schusel van dy maken.

7

Dat alle die dy sien, van dy vlieden, ende segghen sullen: ^* Niniue is verstooret: wie wil medelijdinghe met haer hebben? ende waer sal ick dy troosters soecken?

* Tob. 14.a.5. Sephan. 2.b.13.

8

Meynstu, ⁺ du zijst beter dan de stadt No der Regenten? die daer lach aen den wateren, ende rontom henen water hadde, welcker mueren ende ^d vesten was de Zee.

+ No.

d Of, sterckten, vasticheden

9

Moorenlandt ende Egypten, was hare ontellicke macht, Put ende Lybia waren dyne hulpe.

B.10

Noch heeft sy moeten verdreuen worden, ende gheuancklick wech trecken, ende hare kinderen zijn op allen straten verslaghen worden: ende om hare Edelen wierpmen het lott, ende alle hare Gheweldighen, werden in ketenen ende ^e veteren geleyt.

e Of, boeyen

11

Also moestu oock droncken worden, ende dy verberghen, ende ^{f †} een veste soecken voor den vyandt.

f Of, sterckte,

† an. hulpe begeeren om dijns vyandts wille.

12

Alle dyne vaste steden, zijn als vijgenboomen met rijpen vijghen, wanneermense schuddet, dat sy dien in den mondt vallen, diese eten wil.

13

Siet, dijn volck ^g sal tot wijuen worden in dy, ende de poorten dijns lants, sullen dynen vyanden gheopent worden, ende het vyer sal dyne grendelen verteeren.

g Uertzaecht ende klaechlick ghelijt als in kints nooden.

14

^h† Trect dijn water, want du salst beleyt worden: betert dyne ⁱ vesten, gaet in den leem, ende treedt hem, ende maeckt stercke tiechelsteenen.

h† An. schept dy, of put dy etc.

i Dat is, dyne sterckten

15

^k Doch het vyer sal dy verslinden, ende het sweert dooden, het sal dy afeten, als de keuers: ^l† het sal dy oueruallen als de keuers, het sal dy oueruallen als de sprinckhanen.

k Iesai. 10.b.17. ende 30.c.27.d.31. ende 31.a.8. Sach. 10.b.11.

l† An. Oft du dy schoon hoopest als de keuers, ende dy vermenichuuldighest als de etc.

16

Du hebst meer handelaers, dan Sterren aen den Hemel zijn, doch nu sullen sy hen wtbreyden, als keuers, ende daer van vlieghen.

17

Dyner ^m heeren is so vele, als de sprinckhanen, ende dyuer Hooftlieden als der keuers, die hen aen de thuynen legheren, in den kouden dagen: wanneer nu de Sonne opgaet, so maken sy hen daer van, datmen niet en weet, waer sy blijuen.

m Nazarei hare Papen, an. weecklinghen.

18

Dyne Herders sullen slapen, O Koninck te Assur, dyne Machtighen sullen hen legghen, ende dijn volck sal op den berghen verstroyet zijn, ende niemandt en salse versamelen.

19

Niemant en sal omme dyne schande treuren, noch hem om dyne plaghe bekommeren, maer alle die sulcks van dy hooren, sullen met haren handen ouer dy klappen: want ouer wien is dyne boosheyt, sonder ophouden, niet ghegaen?

Eynde des Propheets Micha.