Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

1. De Heere laett den volcke met heftighen woorden predicken, 3. wat liefde ende trouwe hy aen haer bewesen, 6. ende wat hy voor dienst daer voor, van hen gheuordert hebbe, 9. Item hoe hy de onghehoorsaemheyt zijns woorts straffen wil.

A.1

HOoret doch wat de Heere seyt: ^a Maect dy op, ende scheldet de berghen, ende laett de kleyne berghen, dyne stemme hooren.

a Iesai. 58.a.1.

2

Hooret ghy bergen, hoe de Heere straffen wil, met tsamen den stercken fondamenten der Aerden: want de Heere wil zijn volck schelden, ende wil Israel straffen.

3

^b Wat hebbe ick dy ghedaen, mijn volck? ende waer mede hebbe ick dy beleedighet? dat segghet my.

b Ierem. 2.a.2.

4

^c Ick hebbe dy doch wt Egyptenlandt gheuoeret, ende wt den diensthuyse verlosset, ^d ende voor dy henen ghesonden Mosen, Aaron ende MirIam.

c Exod. 14.c.21.

d Nume. 12.a.1.

5

^e Mijn volck, dencket doch daer aen, wat Balak de Konnic in Moab inden sinne hadde, ende wat hem Bileam de sone Beor, antwoordde, van Sittim aen tot Gilgal toe, daer ghy Ia aen mercken soudet, dat v de Heere alle goedt ghedaen heeft.

e Num. 20. 22. 23. 24. 25.

6

^* Waer mede sal ick den Heere versoenen? met buyghen voor den hooghen God? sal ick hem met brandofferen, ende Iarighen kalueren versoenen?

* God en laet hem met offeren ende wercken niet versoenen, wanneer yemandt oock alreede synen sone offerde: maer somen hem vreeset ende hem vertrouwet etc.

7

Meynstu, ^f de Heere hebbe een welgeuallen aen vele duysenden rammen, ofte aen olye, wanneer dier oock alschoon ontallicke stroomen vol waren? ofte sal ick mynen eersten sone voor myne ouertredinge gheuen? ofte mijns lijfs vrucht voor de sonde myner ziele?

f 1.Sam. 15.c.22. Iesai. 1.b.11. Iere. 7.b.10. Matth. 9.b.13.

8

Het is dy gheseydt, mensche, wat goedt is, ende wat de Heere van dy eyscht, namelicken, ^g Gods woort houden, ende ^h liefde oeffenen, ende ootmoedich zijn voor dynen God.

g Dat is, Geloouen, lief hebben ende lijden.

h In Hebreo, facere iudicium

9

Des Heeren stemme, sal ouer de stadt roepen: doch, wie dynen Name vreeset, dien sal het wel ⁱ slaen: Hooret ^k† ghy stammen, wat gepredicket wordt.

i Of, ghelucken

k† And. de straffe, ende diese bestemmet heeft.

B.10

^l Noch blijft onrechtueerdich goet, inden huyse des Godloosen, ende het verhatede ^m schars Epha.

l Leuit. 19.d.35. Deute. 25.b.13. Prouer. 20.b.10. Hesek. 45.b.10.

m Of, vermindert

11

Ofte soude ick ick de onrechte waghe ende valsche ghewichte int sacxken ⁿ billicken?

n Dat is, Soude ick seggen, dat sy billick ende recht doen, dat sy valsche ghewichten hebben etc.

12

Door welcke, hare Rijcken vele onrechts doen, ende hare inwooners gaen met leughen omme, ende hebben valsche tonghen in haren halse.

13

Daerom wil ick dy beginnen te plagen, ende dy om dyner sonden wille woest maken.

14

^o Du en salt niet ghenoech te eten hebben, ende salt versmachten: ende wat du aengrijpest, dat en sal doch niet daer van komen, ende wat daer van koemt, dat wil ick doch den sweerde ouerleueren.

o Leuit. 26.c.26. Hose. 4.b.10. Hagg. 1.a.6.

15

^p Du salt saeyen ende niet maeyen, du salt olye perssen, ende dy met derseluer niet saluen, ende most perssen, ende gheenen wijn drincken.

p Deut. 28.d.38. Hagg. 1.a.6.

16

Wantmen houdt de ^q wijse Amri, ende alle wercken des huys Ahab, ende volghet haren Rade: daeromme will ick dy tot eener woestijne maken, ende hare inwooners, datmense aenfluyten sal, ende salt mijns volcks smaedtheydt draghen.

q Dat is, Godsdienst. 1.Re. 16.b.16.c.25.