Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vij. Capittel.

1. Beschrijft, met klaghe ouer der vromer weynicheyt, de schalckheyt beyde des volcks ende der Richteren, 5. Item, hoe de trouwe onder den menschen gantsch wt zy, 7. troostet hem met eenen Liede, tegen der Godloosen rasen, 11. ende propheteert onder der heerlicker verlossinghe van Babel, van der wonderbaren ghenade ende ghelucksalickheyt in der Kercke Christi.

A.1

OCh, ⁺ het gaet my, als eenen die in den wijnberghe naleest, daermen gheene druyuen en vindet te eten, ende woude doch gheerne der besten vruchten hebben.

+ Der gheloouighen ende vromen kleyn getal.

2

^a De vrome lieden zijn wech in desen lande, ende de rechtueerdighen, en zijn niet meer onder den lieden: sy ^b† pooghen slechs bloet te vergieten: een yeghelick iaghet den anderen, op dat hy hem verderue.

a Rom. 3.b.10.

b† And. trachten

3

Ende meynen, sy doen daer wel aen, wanneer sy quaet doen: wat de Vorst wil, dat spreeckt de Richter: dat hy hem weder eenen dienst doen sal: de Gheweldighen raden na haren moedtwille, schade te doen, ende draeyent hoe sy willen.

4

De allerbeste onder hen is, ⁺ als doornen, ende de allerredelickste, als ^c† distelen, doch wanneer den dach dyner Predickers, komen sal, wanneer du salt te huys ghesocht worden, so en sullen sy dan niet weten, waer sy henen wt sullen.

+ Vorsten. Ouersten.

c† And. hegghen.

5

^d Niemandt en ghelooue synen naesten, niemandt en verlate hem op de Vorsten: bewaret de deure dijns mondts, voor dier, die in dynen armen slaept.

d Ierem. 9.a.4.

6

^e Want de sone verachtet den vader, de dochter settet haer teghen de moeder: des soons wijf is teghen haers mans moeder, ^f ende des menschen vyanden zijn, zijn eyghen huysghesinne.

e Matth. 10.d.35. Deute. 13.a.6. ende 33.a.9. Psalm. 38.b.12. ende 55.b.14.

f Matth. 10.d.36.

7

Maer ick wil op den Heere sien, ende des Gods mijns Heyls verwachten: mijn God sal my hooren.

8

^g Verheucht dy niet myne vyandinne, ⁺ dat ick daer neder ligghe: ick sal weder opkomen: ende so ick in duysteren sitte, so is doch ^h de Heere mijn licht.

g Prouer. 17.a.5. ende 24.b.17.

+ Een Liedt des Propheten Micha.

h Psalm. 27.a.1.

9

Ick wil des Heeren toorne draghen, want ick hebbe teghen hem ghesondighet tot dat hy myne saecke wtuoere, ende my recht doe: hy sal my ⁱ aent licht brenghen, dat ick mynen lust aen syner ghenade sie.

i Dat is, Hy sal my troosten.

B.10

Myne vyandinne sal het sien moeten, ende met aller schande bestaen, die nu tot my seydt: ^k Waer is de Heere dijn God? myne oogen sullent sien, dat sy dan als dreck op der straten, vertreden wort.

k 2.Reg. 19.a.4.b.11.

11

^l Te dier tijdt sullen dyne mueren ghebouwet worden, ende ^m† Gods woordt wijdt wtkomen.

l Amos 9.b.11.

m† An. het schot verre [van dy] komen.

12

Ende terseluer tijt, sullen sy van Assur, ende van den vasten steden, tot dy komen, van den vasten steden, tot aen het Water, van eener Zee ter anderen, van eenen gheberchte ten anderen.

[fol. 76v]

13

Want het landt sal woest zijn, syner inwooners haluen, omme der vrucht wille harer wercken.

14

Du doch ^o weydet dijn volck met dynen ^p staue, de kudde dijns erfdeels, die daer woonen beyde in den woude alleen, ende op den velde: laett haer te Basan ende Gilead weyden, als van oudts herwaerts.

o Actu 20.c.28. 1.Petr. 5.a 2.

p Psalm. 23.a.4.

15

Ick wilse wonder sien laten, ghelijck als ter tijt, doe sy wt Egyptenlandt toghen.

16

Dat de Heydenen sien, ende alle hare Gheweldighen hen schamen sullen, ^q ende de handt op haren mondt legghen, ende hare ooren toehouden.

q Hiob. 39.d.37.

17

Sy sullen stof lecken, ^r als de slanghen, ende als wormen op Aerden, beuen in haren holen: sy sullen hen vreesen voor den Heere onsen God, ende hen voor dy onsetten.

r Gene. 3.b.14.

18

^s Waer is sulck een God, als du bist, ^t die de sonde vergheeft, ende verlaett de misdaedt, den ouergebleuenen zijns erfdeels, die ^u synen toorn niet eewichlick behoudt, want hy is barmhertich.

s Ierem. 10.a.6.

t Coloss. 2.b.13.

u Psalm. 30.a.6.

19

^x Hy sal hem onser weder ontfermen, onse misdaedt dempen, ende alle sonde in de diepte des Zees werpen.

x Ierem. 9.c.23. Iesai. 54.a.8.

20

Du salst den Iacob de trouwe, ende Abraham de ghenade, houden, ^y als du onsen vaderen van oudts herwaerts, ghesworen hebst.

y Gene. 22.b.16. Luc. 1.f.51.

Eynde des Propheets Micha.