Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

1. De Heere wil met syner ernstighen ende ghewisse straffe ouer zijn volck voortuaren, 7. wil dannoch vele anders met hen, als met anderen sondighen Koninckrijcken, ommegaen, 11. ende wt hen syne veruallene Kercken, noch weder bouwen.

A.1

ICk sach den Heere op den Altare staen, ende hy sprac: Slaet aen ^a† den knoop, dat de posten beuen: want hare ghiericheydt sal hen op haren kop komen: ende ick wil hare nakomelinghen met den sweerde ^b verworghen, dat niemandt ontulieden, noch yemandt daer van ontgaen en sal.

a† An. bouendorpel,

b Of, dooden, moorden,

2

^c Ende wanneer sy hen alreede in de Helle vergroeuen, so salse doch mijn hant van daer halen: ende wanneer sy in den Hemel voeren, so wil ickse doch henen onder stooten.

c Psalm. 139.a.8. Obad. a.4. Ierem. 23.c.24. ende 49.b.16.

3

Ende wanneer sy hen alreede versteken bouen op den berghe Charmel, so wil ickse doch aldaer soecken, ende daer af halen: ende wanneer sy hen voor mynen ooghen verberchden, in den grondt der Zee, so wil ickse doch den slanghen beuelen, dat syse aldaer steecken sullen.

4

Ende wanneer sy voor haren vyanden gheuancklick henen ghinghen, so wil ick doch den sweerde beuelen, dat het haer aldaer verworgen sal: ^d want ick wil myne ooghen ouer haer houden, ten onghelucke, ende niet ten goede.

d Ierem. 44.b.11

5

Want de Heere Heere Zebaoth is sulck een man, wanneer hy een landt aenroeret, so versmeltet het, dat alle inwooners treuren moeten, dat het sal gantsch ouer haer henen loopen, als een water, ende sy ouerswemmet worden, als het ^e vliet in Egypten doet.

e Dat is, Nilus, die alle Iaer het lant Egypten, in den Somer ouerswemmet ende vochtet.

6

^f Hy isset, die syne Sale in den Hemel bouwet, ende zijn Hutte op der Aerden fondeert: ^g hy roepet dat water in de Zee, ende ghiett het op het Aerdtrijcke: hy heet Heere.

f 1.Reg. 8.e.49.

g Amos. 5.a.8.

7

Sijt ghy kinderen Israels, my niet ghelijck als de ^h Moorenlieden, spreeckt de Heere? hebbe ick Israel niet wt Egypten gheleydt, ⁱ ende de Philisteen wt Caphthor, ende de Syriers wt Kir?

h God drijft altoos een volc door het ander wt, om der sonden wille, gelijc als hy door Israel de Cananiters, de Syriers door die van Kir; ende de Caphthorers door de Philisteen: ende ghelijck als de Moorenlieden, vele andere volcken verdreuen hebben.

i Gene. 10.b.14. Reliquias ex Iudeis seruabo, infidelem Synagogam reijciam et perdam.

8

Siet, de ooghen des Heeren Heeren sien op een sondich Koninckrijcke, dat ick het van den Aerdtbodem gantsch verdelge: ^k hoewel ick het huys Iacobs niet gantsch verdelghen en wil, spreeckt de Heere.

k Ierem. 30.b.11. Sacha. 13.a.8. Roman. 9.c.27.

9

Doch nochtans siet, ick wil het beuelen, ende het huys Israels, onder allen Heydenen, siften laten, gelijck alsmen met eener seue siftet, ende de ^l† koornkens en sullen niet op de Aerde vallen.

l† An. steenkens

B.10

Alle sondaers in mynen volcke, sullen door het sweerdt steruen, die daer segghen: Het ongheluck en sal so na niet zijn, noch ons ^m ontmoeten.

m Of, wederuaren, dat is, teghen varen, beiegenen

11

ⁿ Terseluer tijt wil ick de veruallen hutte Dauids weder oprichten, ende hare reten verthuynen, ende wat afghebroken is, weder oprichten: ende wilse bouwen, ghelijck als sy in voortijden gheweest is.

n Actu. 15.b.16. Miche. 7.b.11.

12

Op dat sy besitten de ouerghebleuen te Edom, ende de ouerghebleuene onder allen Heydenen, ouer welcke mynen Naem ghepredickt zijn sal, spreeckt de Heere, die sulcks doet.

13

Siet, den ^o tijt koemt, spreect de Heere, datmen teghelijcke ackeren ende maeyen, ende teghelijcke den wijn perssen ende saeyen sal: ^p ende de berghen sullen van soeten wijne druppen, ende alle kleyne berghen, sullen vruchtbaer zijn.

o Dit is den tijdt des Euangelij ende des Rijcx Christi.

p Ioel. 3.b.18.

14

^q Want ick wil de gheuanckenisse mijns volcx Israels wenden, dat sy sullen de woeste steden bouwen ende bewoonen, wijnbergen planten, ende wijn daer van drincken, houen maken, ende vruchten daer wt eten.

q Hesek, 16.f.53.

15

Want ick wilse in haer landt planten, dat sy niet meer en sullen wt haren lande gheroeyet worden, dat ick hen gheuen sal, spreect de Heere dijn God.

Eynde des Propheets Amos.