Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Een weeklage, 4. met vermaninghe ter boete, 10. dier sy hen wt hate der Propheten, 11. ende wt vertwijffelder boosheydt, die sy aen de armen, rechtueerdighen, ende bloedtschuldighen begaen, niet aennemen, 14. ende willen hen ghelijckewel sonder alle vromicheydt, Gods roemen, 16. settet hen onder ooghen, de eyslicheydt des daechs des Heeren, 18. met tsamen der verdoemlicken onbesintheyt dier, die den seluen begeeren ende beklaghen, 21. ende eyscht recht ende gherechticheyt, voor wterlick vieren ende offer.

A.1

HOoret ghy van den huyse Israels, dit woordt, want ick moet dit klaechliedt ouer v maken.

2

De Ionckvrouwe Israel is gheuallen, dat sy niet weder opstaen en sal: sy is ter Aerden ghestooten, ende daer en is niemandt, die haer ophelpe.

3

Want so spreect de Heere God: De stadt, daer duysent wtgaen, sal slechs hondert ouer behouden, ende daer hondert wtgaen, sal slechs tiene ouer behouden, in den huyse Israels.

4

Daerom so spreeckt de Heere tot den huyse Israels: Soecket my, so sullet ghy leuen.

5

Soecket niet ^a BethEl, ende en koemt niet te Gilgal, ende en gaet niet na Berseba: want ^b Gilgal sal gheuancklick wech gheuoeret worden, ende BethEl sal BethAuen worden.

a 1.Reg. 12.c.29.

b Amos 4.a.4. Hosee. 9.b.15. ende 12.b.11.

6

^c Soecket den Heere, so sullet ghy leuen, op dat daer niet een vyer in den huyse Iosephs de ouerhandt neme, dat daer verteere, ende het niemandt wtblusschen en konne te BethEl.

c Iesa. 55.a.6. Sepha. 2.a.3.

7

Ghy die het recht in alssen verandert, ende de gherechticheyt ter Aerden stootet.

8

^d Hy maket het ^e Seuengesteernte, ende Orion: die van der duysternisse den morghen, ende van den daghe, de duyster nacht maket: ^f die den water in der Zee roepet, ende ghiet het op den Aerdtbodem, hy heet Heere.

d Hiob. 9.a.9.

e Die Pleiades ghenoemet worden.

f Amos 9.a.6.

9

Die ouer den stercken een verstooringhe aenrichtet, ende brenghet eene verstooringhe ouer de vaste stadt.

B.10

Doch sy zijn dien ^g gram, diese in der poorte straffet, ende hebben dien voor eenen grouwel, die daer heylsaem leeret.

g Of, grimmich, hatich.

11

Daerom, dewijle ghy den armen onderdrucket, ende nemet het koorne by grooten lasten van hen, ^h so en sullet ghy in den huysen niet woonen, die ghy van ghehouwen steenen ghebouwet, ende den wijn niet drincken, dien ghy in den fijnen wijnberghen gheplantet hebbet.

h Deut. 28.c.20. Zeph. 1.b.13.

12

Want ick weet uwe ouertredinghe, dier vele is, ende uwe sonden, die daer sterck zijn: hoe ghy de rechtueerdigen drenghet, ende bloedtgeldt nemet, ⁱ ende de armen inder poorte onderdrucket.

i Exod. 23.a.6. Mich. 2.a.2. ende 3.b.11.

13

Daerom moet de kloecke ter seluer tijt ^k swijghen, ^l want het is een boose tijdt.

k Men en derf niet predicken, het en wil niemant hooren noch lijden.

l Mich. 2.a.3.

14

Soecket het goede, ende niet het boose, op dat ghy leuen moghet: so sal de Heere, de God Zebaoth by v zijn, ghelijck ghy roemet.

15

^m Hatet het boose, ende hebbet lief het goede, ⁿ bestellet het recht in der poorte, so sal de Heere de God Zebaoth, den ouergebleuenen in Ioseph, ghenadich zijn.

m Psal. 97.b.10. ende 34.b.15. ende 37.c.27. Rom. 12.a.9.

n Deut. 16.b.18.

16

Daerom so spreeckt de Heere, de God Zebaoth de Heere: Daer sal in allen wijcken weeklaghe zijn, ende op allen straten salmen segghen: O wee, O wee: ende men sal den Ackerman ten treuren roepen, ende ter weeklaghe, wie daer slechs weenen kan.

17

In allen wijnberghen, sal weeklaghe zijn, want ick wil onder v ^o omme gaen, spreeckt de Heere.

o Ick wil v mores leeren.

18

^p Wee dien, die des Heeren dach begheeren: wat sal hy v? want des Heeren dach is een duysternisse ende niet een licht.

p Iere. 30.a.7. Ioel. 2.b.11. Zeph. 1.b.14. Iesa. 13.a.6.

19

Ghelijck als wanneer yemant voor den Leeuwe vlode: ende eenen Beyre ontmoetede hem: ende wanneer als yemandt in een huys quame, ende lenede hem met der handt aen de wandt, ende eene slanghe stake hem.

C.20

Want des Heeren dach sal Ia duyster, ende niet licht zijn, doncker ende niet ^q helle.

q Of, klaer

21

^r Ick ben uwen vierdaghen ^s gram, ende verachtese, ende en kan niet ^t riecken in uwer versamelinghe.

r Iesa. 1.b.11. Iere. 6.c.20. Malea. 1.b.10.

s Dat is, hatich, vyandich.

t Dat is, Uwe reuckoffer en beualt my niet, ick hebbe de snoue.

22

Ende wanneer ghy my alreede brandtoffer ende spijsoffer offeret, so en hebbe ick doch geen welgheuallen daeraen: so en mach ick oock uwe vette danckofferen niet aensien.

23

Doet slechs het blarren dyner liederen, van my wech: want ick en mach dijn Psalterspel niet hooren.

24

Doch het recht sal gheopenbaert worden, als water, ende de gherechticheydt, als eenen stercken stroom.

25

^u Hebbet ghy van den huyse Israels, my oock in der woestijne de veertich Iaer lanck, slachtoffer ende spijsoffer gheoffert?

u Iere. 7.c.21. Act. 7.e.42.

26

Ia wel: ghy droeget den ^x Sicchut uwen Koninck, ende Chiun uwe beelden, het ghesteernte uwer Goden, die ghy v selfs ghemaket haddet.

x Act. 7. voeret S. Lucas desen Spreuck anders, dat machstu daer selfs lesen. Het luydet nochtans gelijckewel, als zy het een Godsdienst gheweest, dien sy Sicchut, dat is, eene behoedinghe beschuttinghe, oft bescherminge genoemet (ghelijck als wy S. Sebastiaen als eenen Sicchut tegen de pestilencie aengebeden hebben) door welcken sy voor allen quade, hebben willen seker zijn. Also Chiun, luydet so vele, als ghewisse, bestendich, seker: dat sy daerdoor seker het ghene behouden hebben, wat sy gheweest ende ghehadt hebben: ende aller dingen als wy de Heylighen aengheroepen hebben, dat sy ons het teghenwoordighe goedt behielden, ende voor allen quade ons behoededen.

27

So wil ick v van hier na Damasco wech voeren laten, spreeckt de Heere, die daer God Zebaoth heet.