Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. De Heere wil zijn verstroyet volck, weder te hoope brenghen, 16. met wonderbaren seghen ende ghenade in syner Kercken onderhouden, 2. ende de vyanden, diese beleedighet hebben, voor den gherichte vorderen ende straffen.

A.1

VVant siet, in dien daghen, ende terseluer tijdt, wanneer ick de geuanckenisse Iuda ende Ierusalems, wenden sal.

2

So wil ick ooc alle Heydenen te samen brenghen, ende wilse henenaf in den dale Iosaphat voeren, ende wil met hen aldaer rechten, ^a van weghen mijns volcks, ende mijns erfdeels Israels, dat sy onder de Heydenen verstroyet, ende hen in mijn landt ghedeylet,

a Mercket, dat alle straffen ende gherichten Gods, ouer de boosen, om der vromen wille gheschiet: also ooc het Iongste gherichte.

3

Ende het lott omme mijn volck gheworpen hebben: ende hebben de iongen voor spijse ghegheuen, ende de maechdekens ^b voor wijn verkocht ende verdroncken.

b Dat is, verachtlick, ende smaetlicken verkocht.

4

^c Ende ghy van Zor ende Zidon, ende alle landtpalen der Philisteen, wat hebbet ghy met my te doen? willet ghy met my pochen? welaen, pochet ghy met my, so wil ick het v haestelicken ende in korten weder vergelden op uwen kop.

c Hesek. 26.a.1. ende 27.c.26. ende 28.c.22. Amos 1.a.9.

5

Ghy die mijn siluer ende goudt, ende myne schoone kleynodien, ghenomen, ende in uwe Kercken ghebracht hebbet,

6

Daertoe oock de kinderen Iuda, ende de kinderen Ierusalems, verkocht hebbet den Grieken, op dat ghyse Ia verre van haren landtpalen brachtet,

7

Siet, ick wilse verwecken van der plaetse, daer ghyse henen verkocht hebbet, ^d ende wil het v verghelden op uwen kop.

d Iere. 50.b.15. Obad. b.15.

8

Ende wil uwe sonen ende dochteren wederom verkoopen, door de kinderen Iuda, die sullense dan in rijck Arabia, eenen volcke in verren landen verkoopen, want de Heere heeft het ghesproken.

9

Roepet dit wt onder den Heydenen, heylicht eenen strijdt, verwecket de stercken, latet hiertoe komen ende henenop trecken, alle krijchslieden.

B.10

^e Maket van uwen ^* ploechscheren sweerden, ende van uwen sickelen spiessen, de swacke spreke: Ick ben sterck.

e Iesa. 2.a.4. Mich. 4.a.3.

* Of, ploechijseren

11

Rottet v te hoope, ende koemt herwaerts alle Heydenen, omme ende omme, ende versamelt v: aldaer sal de Heere dyne stercken neder legghen.

12

De Heydenen sullen hen opmaken, ende opwaerts komen ten dale Iosaphat: ^f want aldaer wil ick sitten, te richten alle Heydenen omme ende omme.

f Matth. 25.d.31.

13

^g Slaet met den sickelen aen, ^h want den Oogst is rijpe: koemt nederwaerts, want de wijnpersse is vol, ende sy loopet ouer, want hare boosheydt is groot.

g Apoc. 14.b.15.

h Matth. 13.d.39.

14

Daer sullen hier ende daer hoopen volcx zijn inden ^i† dale des Oordeels, want des Heeren dach is na by, in den dale des Oordeels.

i† And. bestemmeden oft ghedeylden dale.

15

^k De Sonne ende Maen sullen verduysteren, ende de Sterren sullen haren schijn verhouden.

k Ioel. 2.b.10.d.31. Iesa. 13.b.10.

[fol. 71v]

16

^l Ende de Heere sal wt Zion brullen, ende wt Ierusalem syne stemme hooren laten, dat beyde Hemel ende Aerde beuen sal: daerenteghen de Heere sal synen volcke eene toeulucht zijn, ende een ^* veste den kinderen Israels.

l Iere. 25.d.30. Amos 1.a.2.

* vasticheyt, stercte

17

Ende ghy sullet ghewaer worden, dat ick de Heere uwe God, te ^m Zion op mynen heylighen Berghe woone, ⁿ als dan sal Ierusalem heylich zijn, ende niemant vreemdts meer, door haer wandelen.

m Psalm. 9.b.12. ende 76.a.3. Iesa. 8.b.10.

n Iesa. 52.a.2. Apoc. 21.b.10.

18

^o Terseluer tijdt, sullen de berghen van soeten wijne druppen, ende de kleyne berghen van melck vlieten, ende alle beken in Iuda, sullen vol waters gaen: ^p ende daer sal een sprinckfonteyne, van den huyse des Heeren wt gaen, die sal den stroom Sittim wateren.

o Amos 9.b.13.

p Ioan. 7.d.38. Hesek. 47.a.2. Sacha. 13.a.1. ende 14.a.8.

19

^q Doch Egypten sal woest worden, ^r ende Edom eene woeste wildernisse, om des ^s wreuels wille, aen den kinderen Iuda begaen, ^t dat sy onschuldich bloet, in haren lande vergoten hebben

q Iere. 46.a.2.

r Iere. 49.a.7.

s Dat is, moedtwilligher onbillicheyt.

t Prouer. 6.b.17. 2.Reg. 21.b.16. Hesek. 22.b.12.

C.20

Doch Iuda sal eewichlick bewoonet worden, ende Ierusalem ^u† voort ende voort.

u† And. van gheslachte tot gheslachte.

21

^x Ende ick wil haer bloedt niet onghewroken laten, ^y ende de Heere sal woonen te Zion.

x 4.Esd 15.a.9. Luc. 18.a.7. Apoc. 6.b.10. ende 19.a.2.

y Apoc. 21.a.3.

Eynde des Propheets Ioel.