Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiiij. Capittel.

1. Samaria sal ommekomen. 2. Israel wordt vermaent ter boete, 5. so wiltse de Heere ghenadichlicken weder opnemen.

A.1

SAmaria sal ^a woest worden, want sy zijn haren God onghehoorsaem: sy sullen door het sweerdt vallen, ende hare ionghe kinderen ^b versmettert, ende hare swanghere vrouwen, verreten worden.

a 2.Reg. 17.a.6.

b Of, verpuluert

2

^* Bekeeret dy Israel tot den Heere dynen God, ^{+ c} want du bist geuallen om dyner misdaet wille.

* Ca. xiiij. Lut.

+ Iere. 18.a.8.b.11. Hesek. 18.c.21. ende 33.b.14.

c 1.Reg. 12.c.28.

3

Neemt dese woorden met v, ende bekeeret v tot den Heere, ende spreeckt tot hem: Vergheeft ons onse sonden, ende doet ons wel, so willen wy offeren de ossen onser lippen.

4

Assur en sal ons niet helpen: wy en willen niet meer op peerden rijden, oock niet meer segghen tot den wercken onser handen: Ghy zijt onse God: maer laet de weesen by dy ghenade vinden.

5

So wil ick haer ouertreden weder heylen: gheerne wil ickse lief hebben, dan sal hem mynen toorne van hen wenden.

6

Ick wil Israel ghelijck als eenen dauw zijn, dat hy sal bloeyen, als een roose, ende syne wortelen sullen wtbreken als Libanon.

7

Ende syne ^* tacken hen wtbreyden, dat hy sy so schoone, als een olyboom, ende sal sulcken goeden reucke gheuen als Libanon.

* Of, scheuten, of, meyen

8

Ende sullen weder onder syner schaduwe sitten: van koorne sullen sy hen gheneeren, ende bloeyen als eenen wijnstock: syne gedachtenisse sal zijn als de wijn aen Libanon.

9

Ephraim, ^d† wat sullen my voordtaen de Afgoden? ick wil hen verhooren ende leyden: ick wil zijn als eenen groenenden ^e† Denne, aen my salmen dyne vrucht vinden.

d† An. sal seggen, wat hebbe ick meer te doen ten Afgoden?

e† An. Cederboom

B.10

Wie is wijs, die dit versta, ende kloeck, die dit mercke? ^f want de wegen des Heeren zijn recht, ^g ende de rechtueerdighen wandelen daerinne: doch de ouertreders vallen daerinne.

f Apoc. 15.a.3.

g Syrac. 40.b.14

Eynde des Propheten Hosea.