Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiij. Capittel.

1. Settet hen wederom onder ooghen, hare Afgoderije. 4. ende afuallighe ondanckbaerheydt, 7. daertoe hare straffe, 14. met eener toesegghinghe Godlicker bescherminghe, dier hen dannoch weynich tot haren heyle aennemen souden.

A.1

DOe Ephraim ^a verschrickelick leerde, werdt hy in Israel verheuen: daerna versondichden sy hen door Baal, ende worden daerouer ^b ghedoodet.

a Een vroom herte schuddet ende beeft voor der verschricklicker Afgoderije, die Ierobeam wtrichtede: noch ghinck het voort, ende nam toe, ghelijck dan alle Afgoderijen seer toenemen, dat doch goeden vromen herten, een verschricken is aen te sien.

b Als Achab met den synen.

2

Doch nu maken sy der sonden vele meer, ^c ende van haren siluer, beelden, hoe sy het slechs bedencken konnen, namelicken Afgoden, welcker doch ijdel smedenwerck zijn: ^d† noch predicken sy van den seluen: Wie de kalueren kussen wil, die sal menschen offeren.

c Iesa. 46.a.6. Hesek. 16.b.17. Hose. 2.a.7.

d† An. van welcken sy segghen, den menschen die offeren, Datmen de kalueren kusse. Daerom sullen sy zijn gelijck als de morgenwolcken,

3

De seluen sullen hebben de morghenwolcken, ende den ^e dauwe, die vroech valt: Ia als het kaf, dat van den dorschuloer verwaeyet wordt, ende als den roock van den schorsteene.

e Sy seggen den valschen Godsdiensten groot dinc toe. Ia achterwaerts, spreeckt Hosea.

4

^f Ick ben Ia de Heere dijn God, wt Egyptenlandt af: ende du en soudest Ia gheenen anderen God kennen, dan my, ende gheenen Heylandt, dan alleene my.

f Exod. 20.a.2. Iesa. 43.b.10

5

^g Ick nam my oock dyner aen, in der woestijne in dorren lande.

g Deut. 8.a.2.

6

^h Doch dewijle dat sy gheweydet zijn, dat sy sat gheworden zijn, ende ghenoech hebben, verheffet hem haer herte, daeromme vergheten sy myner.

h Deut. 32.b.15.

7

So wil ick oock teghen haer worden, als een Leeuwe, ende als een Pardeel, op den wege wil ick op haer loeren.

8

Ick wil hen ontmoeten als eenen Beyre, dien syne iongen ghenomen zijn, ende wil haer verstockede herte verscheuren: ende wilse aldaer, als een Leeuwe verslinden, de wilde ghedierten sullense verscheuren.

9

ⁱ Israel du brenghest dy in ^k ongheluck, want dijn Heyl staet alleene by my.

i Hiob. 22.a.5.

k Dat du by den menschen hulpe soeckest ende niet by God.

B.10

Waer is dijn Koninck henen? die dy helpen konne in alle dynen steden: ende alle dyne Richters? daer du van seydest: Gheeft my Koningen ende Vorsten.

11

Wel aen, ^l ick gaf dy eenen Koninck in mynen toorne, ende wil dy hem in myner grimmicheyt, wech nemen.

l 1.Sam. 8.a.5. Act. 13.c.21. Hy wil segghen: Ghelijck als ick dy den eersten Koninck gaf in toorne, so wil ick dy oock den laetsten in grimmicheydt nemen, dat du geenen meer hebben en salt.

12

De misdaedt Ephraims is te samen ghebonden, ende hare sonde is bewaert.

13

Want hen sal wee worden, ghelijck als eener die daer baert, want het zijn onuoorsichtige kinderen: ^m† den tijdt sal komen, dat sy niet blijuen en sullen, voor den iammer der kinderen.

m† And. Anders en sullen sy niet langhe in der geboorten angste blijuen.

14

Doch ick wilse wt der Helle verlossen, ende van den doodt beurijen: Doodt, ick wil dy eene verghift zijn, ⁿ Helle, ick wil dy eene pestilencie zijn: doch is de ^o† troost voor mynen oogen verborghen.

n Het tijdtlicke Konincrijcke sal ondergaen, maer het Gheestelicke sal komen: doch dies sullen hen weynich Ioden troosten: want sy en sullent niet aennemen, ende door de Romeynen, als door eenen sueren windt, verstooret worden.

o† And. berouwe

15

Want hy sal tusschen broederen vrucht brenghen: daer sal een Oostenwindt komen, de Heere sal wt der woestijne daerop varen, ende haren ^p† borne wt drooghen, ende hare adere verdrooghen, de selue sal roouen den schatt alles kostlicken tuyghes.

p† An. wijngaert etc. fonteyne