Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xj. Capittel.

1. Trouwe ende weldaden Gods teghen Israel, 5. hare gheuanckenisse, 8. met tsamen verlossinghe door Christum.

A.1

DOe Israel ionck was, hadde ick hem lief, ^a ende riep hem, mynen sone, wt Egypten:

a Exod. 3.a.7. ende 6.a.5. Matth. 2.b.15.

2

Doch wanneermen hen nu roepet, so wenden sy hen daer van, ^b ende offeren den Baalim, ende roocken den beelden.

b Exod. 32.a.6. 1.Reg. 11.a.7. 2.Reg. 10.b.18.

3

Ick nam Ephraim by synen armen, ende ^c leyddede hem, doch sy en mercken het niet, hoe ick hen halp.

c Gelijck als een moeder den kinde gaen leeret, ende leydde het by den armkens.

4

Ick lietse een menschelick iock trecken, ende in seelen der liefde gaen, ende halp hen het iock aen haren halse draghen, ^d ende gaf hen voeder:

d Exod. 16.b.13.

5

Op dat hy hem Ia niet en soude weder in Egyptenlandt keeren: so is nu Assur haer Koninck gheworden, want sy en willen hen niet bekeeren.

6

Daeromme sal het sweerdt ouer hare steden komen, ende sal hare ^e† grendelen te niete maken ende verslinden, omme haers voornemens wille.

e† And. tacken

7

Mijn volck is ^{f †} moede, hen tot my te keeren, ende hoemen hen predicket, so en richtet hem niemandt op te hooren.

f Lut. Dit versch en sal niemandt verstaen, oock in den Ebreischen niet.

† an. in twijffel

8

Wat sal ick van dy maken Ephraim? sal ick dy ^g beschutten Israel? sal ick met rechte een ^h Adama van dy maken, ende dy, ghelijck als Zeboim toebereyden? doch mijn herte is eens anderen sinnes, myne barmherticheyt is te vyerich,

g Hy wil also seggen: Ick en weet niet, hoe ick dy helpen sal: daer helpet noch straffe noch ghenade: ick moet Christum senden, die salt goet maken.

h Gene. 19.c.24. Deut. 29.c.23. Amos. 4.b.11.

9

Dat ick niet doen wil, na mynen grimmigen toorne, noch my henen keeren, Ephraim gantsch te verderuen: want ick ben God, ende niet een mensche, ende ben de Heylighe onder dy: ick en wil doch niet in de stadt komen.

B.10

Als dan salmen de Heere nauolghen, ⁱ ende hy sal brullen als een Leeuwe: ende wanneer hy sal brullen, so sullen die verschricken, die teghent Westen zijn.

i Apoc. 5.a.5.

11

Ende die in Egypten, sullen oock verschricken, als een voghel, ende die in den lande Assur, als duyuen: ende ick wilse in hare huysen setten, spreeckt de Heere.