Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat x. Capittel.

1. Wijder van der straffe der Afgoderije, dat sy met verstooringhe, hulpeloos, van den Koninck, 5. ende Afgod den kalue, verlaten worden sullen, 9. vermaentse, met verwijte lanckdurigher sonden, 12. tot beteringhe, 13. oft hy wil met syner ernstighen straffe voortuaren.

A.1

ISrael is een verwoestet ^a wijnstock geworden, syne ^b vrucht is euen also: want so vele vruchten als hy heeft, so vele Altaren hadde hy ghemaket: waer het landt aen den allerbesten was, daer stichten sy de allerschoonsten Kercken.

a Iesa. 5.a.1.

b Dat is, De steden zijn sulcx wijnstocks vruchten, doch hy is afgelesen ende ledich.

2

Haer herte is ghedeylet: nu ^c† sal sy haer schuldt vinden: hare Altaren sullen verbroken, ende hare Kercken sullen verstooret worden.

c† And. sullen sy verwoestet worden:

3

Als dan moeten sy segghen: Wy en hebben gheenen Koninc: want wy en vreesen den Heere niet: wat kan ons de Koninck helpen?

4

Sy sweeren te vergheefs ende maken een verbondt, ende sodanighen raedt groenet op allen voren in den velde, als galle.

5

^d De inwooners te Samaria, sorghen voor de kalueren te BethAuen: want zijn volck treuret om ^e hem, ouer welcken hem syne ^f† Camerim pleghen te verheughen, syner heerlicheydt haluen, want het is van hen wech gheuoeret.

d 2.Reg. 17.a.6.

e Uerstaet, het kalf.

f† And. Papen. Daer van leest, 2.Reg. 23.a.5.

6

Ia dat kalf is in Assyrien ghebracht, ^g tot eenen gheschencke den Koninck te Iareb: also moet Ephraim met schanden staen, ende Israel schandelicken gaen met synen voornemen.

g Hosee. 6.b.12.

7

Want de Koninck te Samaria is daer henen, als een schuym op den water.

8

De hoochten te Auen zijn verdelghet, daer hem Israel mede versondichde: distelen ende doornen wassen op haren Altaren, ^h ende sy sullen segghen: Ghy berghen bedecket ons, ende ghy kleynen berghen vallet op ons.

h Iesa. 2.b.19. Luc. 23.d.30. Apoc. 6.b.16.

9

Israel du hebst sindt der tijdt ⁱ Gibea ghesondighet, daer zijn sy oock by ghebleuen: doch des strijdts te Gibea ghelijcken, die teghen de boose lieden gheschiedde, en salse niet grijpen:

i Daeruan Iudic. 19.c.22. ende 20.

B.10

Maer ick wilse tuchtighen na mynen wenschen: dat daer volcken sullen ouer haer versamelt komen, ^k† wanneer ickse sal straffen, ^l om hare twee sonden:

k† And. daerom dat sy hen aengespannet hebben aen beyde haren voren:

l Dat is, Omme beyder kalueren Afgoderije wille.

11

Ephraim is een kalf gewennet, dat het gheerne dorschet, ick wil hem ouer synen schoonen hals varen: ick wil Ephraim ^m† rijden, ende Iuda sal ploeghen, ende Iacob egghen.

m† And. doen rijden,

12

ⁿ Daeromme saeyet v gherechticheydt, ende maeyet liefde, ende ^{o †} ploeghet anders, dewijle dat het tijdt is, den Heere te soecken, tot dat hy kome, ende reghene ouer v gherechticheyt.

n Iere. 4.a.3.

o Saeyet, Dat is Predicket recht, ofte ick wil eenmael met v ackeren etc.

† An. teulet uwe braken.

13

Want ghy ploeghet boose dinck, ende maeyet quade daedt, ende etet leughenvruchten: Dewijle du dy dan verlaetst op dijn wesen, ende op de veelheyt dyner Helden,

14

So sal hem een rumoer verheffen in dynen volcke, dat alle dyne vesten verstooret worden, ^p gelijck als Salman, het huys Arbeel verstoorde, ter tijdt des strijdts, doe de moeder ouer de kinderen te gronde ghinck.

p Iudic. 8.b.11. Dese geschieddenisse staet anders nerghens in der Schrift, ende zijn der gelijcken wel meer gheschiedt, die niet alle beschreuen en zijn: gelijc als die Iudas aentrecket, in sijnen brieue, van Michael ende den Satan. Sommighe bediedent op Salmanasser, die aen den eersten Iare Hosee, synen intoch dede, ende Arbel op ghene sijde des Iordaens, seer iammerlicken omme brachte: dat het also een bekent ende versch exempel zy.

15

Euen also salt te Beth El ooc gaen, om uwer grooter boosheydt wille: dat de Koninck Israel, ^q smorghens vroech ondergae.

q Dat is, Haest ende onuersiens.