Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

1. Diere tijdt, 3. gheuanckenisse, 11. ende onuruchtbaerheyt, der Afgoderije straffe.

A.1

DV en derfst dy niet verheughen Israel, noch roemen ghelijck de volcken: want du hoererest teghen dynen God, daermede dat du hoeren loon soeckest, dat alle schueren vol koorns worden.

2

^a Daerom en sullen dy de schueren ende wijnperssen niet gheneeren, ende de wijn en sal dy niet ghedijen.

a Hagg. 2.b.17.

3

Ende en sullen niet blijuen in den lande des Heeren: ^b maer Ephraim moet weder in Egypten, ende moet in Assyria, wat onreyn is, eten,

b Hesek. 4.b.13.

4

Daer sy den Heere gheen dranckoffer van wijne, noch yets wat tot welgheuallen doen en konnen: haer offer sal zijn, als der ^c bedroefden broodt, van welcken onreyne worden, alle die daer van eten: want haer broodt moeten sy voor haer selfs eten, ende en sal niet in des Heeren huys ghebracht worden.

c Deut. 26. is verboden, bedroefde offer te doen.

5

Wat willet ghy dan in den Iaertijden ende in den Vierdaghen des Heeren doen?

6

Siet, sy moeten wech voor den verstoorder, Egypten salse versamelen, ende Moph salse begrauen, netelen sullen wassen, daer nu haer lieue Afgoden siluer staet, ende ^d† doornen in haren hutten.

d† And. hegghen

7

De tijdt der te huyssoeckinghe is ghekomen, de tijdt der vergheldinghe, dies sal Israel wel gewaer ^e† worden: de Propheten zijn sotten, ende de rottengheesten zijn onsinnich, om dyner grooter misdaedt, ende om der grooter verdrietlicker Afgoderije wille.

e† And. worden, dat sy door de narrische Propheten ende onsinnighe Gheestrijcken [verleyddet zijn] om dyner grooten misdaedt wille heeft haer de vyandtschap vermenichuuldicht.

8

^f† De Wachters in Ephraim, hielden hen voortijdts aen mynen God, doch nu zijn sy Propheten die stricken legghen, op alle haren weghen, door de verdrietlicke Afgoderije, in den huyse haers Gods.

f† And. de wachter Ephraim met God, is een strick des voghelaers, een haet in het huys Gods. And. Ia Ephraim heeft hemselfs tot een wachter mijns Gods gemaket, tot een Propheet die stricken leyt op alle syne straten, ende een grouwel in dat huys zijns Gods

9

Sy verderuen het te diepe ende seere, als ter tijdt ^g Gibea: daeromme sal hy harer misdaedt ghedencken, ende hare sonden te huys soecken.

g Iudic. 9.b.15.c.22. ende 20.b.13. Doe verdedichden de kinderen BenIamin, de allerdiepste ende grootste boosheyt, die niet te heelen en was, ende moeste te gronde gaen.

B.10

Ick vandt Israel in der woestijne, als druyuen, ende sach uwe vaders, als de ^h eersten vijghen aen den vijgenboomen: ⁱ doch daerna gingen sy tot BealPeor, ende gheloefden hen den schandelicken Afgod, ende worden ia so grouwelick, als hare boelen:

h Iere. 24.a.2.

i Num. 25.a.3.

11

Daeromme moet de heerlicheyt Ephraims, als een voghel wech vlieghen, dat sy noch baren noch draghen, noch swangher worden sullen.

12

Ende waneeer sy hare kinderen schoon opbrochten, so wil ickse doch sonder kinderen maken, dat sy gheene lieden zijn en sullen: och wee hen, wanneer ick ben van hen gheweken.

13

Ephraim, als ick het aensie, is gheplantet ende schoone, als Tyrus, maer moet nu hare kinderen daerwt gheuen, den Doodtslagher.

14

Heere gheeft hen, ^k† wat wiltu hen doch geuen? gheeft hen onuruchtbare lijuen ende verdroochde ^l borsten.

k† An. dat du hen gheuen salt: gheeft etc.

l Dat sy gheene kinderen meer opuoeden en konnen inden lande, maer aller dingen wech geuoeret zijn sullen.

[fol. 69v]

15

Alle hare boosheyt gheschiedt tot ^m Gilgal, aldaer ben ick hen een vijandt: ende ick wilse oock om hares boosen wesens wille, wt mynen huyse stooten, ende hen gheene liefde meer bewijsen, want alle hare Vorsten zijn afuallighe.

m Iosu. 4.b.19. Hosee. 12.b.11.

16

Ephraim is gheslagen, hare wortel is ^n† verdorret, dat sy gheene vruchten meer brengen en konnen: ende oft sy genereren, so wil ick doch de lieue vrucht hares lijfs, dooden.

n† Dat is, Het Koninckrijcke is henen wech, ende moeten onder den Heydenen verstroyet zijn, ende dwalende gaen.

17

Mijn God salse verwerpen, daerom dat sy hem niet hooren en willen, ende moeten onder de Heydenen dwalende gaen.