Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

1. Des volcx, 6. ende der Papen sonde ende straffe. 15. Iuda wort vermaent, der gheylen Israel in haren lasteren niet te volghen.

A.1

HOort ghy kinderen Israels, des Heeren woort: want de Heere heeft oorsake te schelden, die inden lande woonen: want daer en is gheen trouwe, gheen liefde, ^a gheen woordt Gods inden lande:

a Dat is, Men leert niets van Gode.

2

Maer Gods lasteringe, ^b liegen, moorden, stelen, ^c ende ouerspel heeft ouerhandt genomen, ende ^d een bloetschuldt koemt na der anderen.

b Leuit. 19.b.11.

c Exod. 20.c.24. Ierem. 7.a.9. ende 9.a.2. ende 23.b.10.

d Ierem. 12.a.4. ende 14.a.2.

3

Daeromme sal het lant iammerlicken staen, ende allen inwoonders qualick gaen: want oock de dieren op den velde, ende de voghelen onder den Hemel, ende de visschen in de Zee, sullen wech gherapet worden.

4

Doch men derf niet schelden, noch yemande straffen: want dijn volck is als die, die ^e† doch de Priesters schelden.

e† And. tegen, etc. twisten.

5

Daeromme saltu by daghe vallen, ende de Prophete des nachts met dy vallen: also wil ick dyne moeder henen richten.

6

^f Mijn volck is verloren, daeromme dat het niet ^g leeren wil, ^h want du verworpest Gods woort, daeromme wil ick dy oock verworpen, ⁱ dat du niet mijn Priester zijn salt: du vergheetst des Wets dijns Gods, daeromme wil ick dyner kinderen oock vergheten.

f Iesaie. 5.b.13.

g Dat is, prediken hooren van God.

h Maleac. 1.a.6. ende 2.a.7.

i Exod. 19.a.6.

7

Hoe harer meer wert, hoe sy meer tegen my sondigen, daerom wil ick hare eere te schanden maken.

8

^k Sy verslinden het sondoffer mijns volcks, ende zijn begheerich na haren sonden.

k Leuit. 6.c.26.

9

^l Daeromme salt den volcke, ghelijck als den Priesteren gaen: want ick wil haer doen te huys soecken, ende hen verghelden, als sy verdienen.

l Iesaie. 24.a.2.

B.10

^m Dat sy sullen eten, ende niet sat worden, hoererije drijuen, ende het en sal hen niet ⁿ ghelucken, daeromme, dat sy den Heere verlaten hebben, ende hem niet en achten.

m Dat is, Sy sullen haren Godsdienst harde drijuen, ende doch weynich daer van te eten hebben. Ghelijck als nu de Antichristische, hare Missen gheerne wouden hooch drijuen, maer het en wil so niet gelden, ghelijck als te voren. Leui. 26.c.26. Mich. 6.b.14. Hagge. 1.a.6.

n Of wel slaen,

11

Hoererije, ^o wijn ende most, maken sotten.

o Prouer. 20.a.1.

12

^p Mijn volck vraghet zijn hout, ende synen staf sal hem prediken: want der hoererije gheest verleydtse, dat sy teghen haren God hoererije drijuen.

p 2.Reg. 1.a.2.

13

^q Bouen op den berghen offeren sy, ende op den kleynen berghen roocken sy, onder den eycken, linden ende buecken, want die hebben fijne schaduwe: daeromme sullen uwe dochteren oock tot hoeren, ende uwe bruyden tot ouerspeelderschen worden.

q 2.Reg. 17.b.10.

14

Ende ick en wils oock niet weeren, wanneer uwe dochteren ende bruyden gheschendet, ende tot hoeren worden, ^r dewijle dat ghy ^s† eenen anderen Godsdienst aenrichtet met den hoeren, ende offeret met den boeuinnen: want het dulle volck wil ^t gheslaghen zijn.

r Nume. 25.a.2.

s† An. v versteket met, etc.

t Sotten, moetmen met koluen luysen

15

Wiltu Israel ymmers hoererije drijuen, dat hem doch Iuda slechs niet en beschuldichde: en gaet niet henen na Gilgal, ende en koemt niet henenop op BethAuen, ^u ende en sweert niet, So warachtich als de Heere leeft.

u Deute. 10.c.20.

16

Want Israel loopt als een dulle koe: so salse oock de Heere ^x weyden laten, als een lam dat dwalende loopt.

x Dat is, Sy is een onbandighe koe, wil niet inden stal blijuen, so wil ic haer ooc ruym beschicken, ende haer onder alle Heydenen verstroyen, dat sy genoech te loopen hebbe.

17

Want Ephraim heeft hem tot den Afgoden ghesellet: so laet hem henen varen.

18

Sy hebben hen in de swelgerije ende hoererije

[fol. 68v]

ghegheuen, hare ^y heeren hebben lust daer toe, dat sy ^z† schande aenrichten.

y Hare Koningen, Uorsten ende Priesters.

z† And. schandelicken [spreken] brenget herwaerts

19

Eenen wint met synen vleugelen, salse ghebonden wech drijuen, ende moeten ouer haren offer te schanden worden.