Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Gods ernstighe liefde teghen zijn volck, wort met schandelicker ontrouwe vergolden. 4. Israel sal hem na lanckduerigher ellende, tot den Heere bekeeren.

A.1

ENde de Heere sprac tot my: ^a Gaet noch eens henen, ende ^b vrijet om dat boeleersche ende ouerspelighe wijf, ghelijck als dan de Heere om de kinderen Israels vrijet, ende sy haer doch tot vreemden Goden keeren, ^c ende vrijen ^d om een kanne wijns.

a Hesek. 44.c.22.

b boelet

c Iesaie. 28.a.1. Amos. 6.a.6.

d Om des buycx wille. Ia Hemel, Hemel: Hadde ick hier broot seggen sy.

2

Ende ick wert met haer eens, om vijftien siluerlinghen, ende anderhaluen Homer gersten,

3

Ende sprack tot haer: ^e† Houdt dy tot my eenen tijt lanck, ende en drijft gheen hoererije, ende en laet gheenen anderen tot dy, want ick wil my oock tot dy houden.

e† And. Du salst dy tot my houden, ende geen hoererie drijuen, ende geenen anderen tot dy laten, ende noch wil ick my tot dy [niet] houden.

4

^f Want de kinderen Israels sullen langen tijt ^g sonder Koninck, sonder Vorsten, sonder Offer, sonder Altaer, sonder Lijfrock, ende sonder Heylichdom blijuen.

f 2.Paral. 15.a.3.

g Israel en heeft na der geuanckenisse gheenen Koninck weder ghehadt, tot dat de rechte Dauid Christus, quam, der gantscher werelt Koninck.

5

Daer na sullen haer de kinderen Israels bekeeren, ende den Heere haren God, ende ^h haren Koninck Dauid soecken, ende sullen den Heere ende syne ghenade eeren in der laetster tijt.

h Hesek. 34.c.23. Hosee. 10.a.3.