Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. De Heere heet de Ioden, die hem met grouwelicker Afgoderije besoedelden, ter boete roepen. 5. dreychtse met straffe tot hem te benauwen, 13. ende belouet hen also met vasten verbonde, syne ghenade, ende menichfuldighen seghen.

A.1

SPreeckt het oordeel ouer uwe moeder: ^a Sy en zy mijn wijf niet, ende ick en wilse niet hebben: heetetse hare hoererije van haer wech doen, ende hare ouerspeelderije van haren borsten.

a Ierem. 3.a.

2

Op dat ickse niet naeckt wt en trecke, ende daer henen sette ^b als sy was, doe sy gheboren werdt, ende dat ickse niet naeckt en make, als een woestijne, ende als een dorre lant, dat ickse niet van dorste steruen en late,

b Hesek. 16.a.4.

3

Ende my harer kinderen niet en ontferme, want sy zijn hoerekinderen.

4

Ende hare moeder is een ^c hoere, ende diese ghedraghen heeft, ^d houdt haer schandelicken, ende spreeckt: Ick wil mynen boelen na loopen, die my gheuen broot, water, wolle, vlas, olye, ende drincken.

c Dat is, Sy dient den Afgoden.

d 2.Reg. 17.a.7.

5

Daeromme siet, ick wil dynen wech met doornen toemaken, ende eenen wandt daeruoor trecken, dat sy haren padt niet vinden en sal.

6

Ende wanneer sy haren boelen na loopt, dat sy die niet grijpen, ende wanneer sy die soeckt, ^e niet vinden konne, ende seggen moet: Ick wil wederomme tot mynen vorighen manne gaen, daer my beter by was, dan my als nu is.

e De Afgodischen, dewijle dat sy geluck hebben, meynen, sy hebbent met haren Gosdienst verworuen, tot dat de droeffenisse koemt: so moeten sy doch den rechten God om louter genade aenroepen.

7

Want sy en wil niet weten, dat ick het zy, die haer gheeft, koorne, most, ende olye, ende haer vele siluers ende gouts ghegheuen hebbe, ^f dat sy Baal ter eeren ghebruycket hebben.

f Hesek. 16.b.17.

8

Daeromme wil ick mijn koorne ende mynen most, weder nemen te syner tijt, ende mijn wolle ende vlas ontwenden, daer sy hare schamelheyt mede bedecket.

[fol. 68r]

9

^g Nu wil ick hare schande ontdecken, voor den ooghen harer boelen, ende niemant en salse van myner hant verlossen.

g Ierem. 13.c.26.

B.10

Ende ick wils een eynde maken, met alle haren ^h vreuchden, Feesten, Nieuwe maenden, Sabbathen, ende allen haren Vierdaghen.

h Deute. 16.b.17.

11

Ick wil hare wijnstocken ende vijghenboomen woeste maken, dewijle dat sy seyt: Dat is mynen loon, dat my myne boelen gheuen: ick wil een woudt daeruan maken, dat het de wilde dieren verslinden sullen.

12

Also wil ick te huyssoecken ouer haer, ⁱ de daghen Baalim, welcken sy reuckoffer doet, ende ^k verciert haer met voorhooftspanghen, ende halsbanden, ende loopt haren boelen na, ende vergheet myner, spreeckt de Heere.

i Iudic. 2.b.11. ende 10.a.6.

k Of, wttoyet.

13

Daeromme siet, ick wilse locken, ende wilse in een woestijne voeren, ende ^l vriendelicken met haer spreken.

l Dat is, dat lieue Euangelium,

14

Aldaer wil ick haer gheuen hare wijnbergen wt deselue plaetse, ende ^m den dale Achor, de hope op te doen: aldaer sal sy singhen, ⁿ als ter tijt harer ieucht, ^o doe sy wt Egyptenlant tooch.

m Het dal Achor, is de gulden landouwe, daer het cruyce der droeffenisse is, ende doch troostelicke woorden Christi: want Achor heet droeffenisse oft cruyce, daermen enckel onsichtlick dinck prediket, des men hopen moet. Iosue 7.c.25.

n Iudic. 5.a.1.

o Exod. 15.a.1.

15

Alsdan spreeckt de Heere, saltu my heeten, Mijn man, ende my niet meer, Mijn Baal heeten.

16

Want ick wil de namen der Baalim, van haren monde wech doen, datmen der selue namen, niet meer ghedencken sal.

17

^p Ende ick wil hen ter seluer tijt, ^q een verbont maken, met den dieren op den velde, met den voghelen onder den Hemel, ende met den wormen op Aerden: ^r ende wil den boghe, sweert ende krijch, vanden lande verbreken, ende wilse seker woonen laten.

p Leuitic. 16.a.6.

q Dat is, het verbondt ende vrede der consciencien door den gelooue aen Christum, welcken geen mensche noch eenich dinck kan schade doen.

r Iesa. 2.a.4. Sacha. 9.b.10.

18

^s Ick wil my met dy verlouen in eewicheyt, ick wil my met dy vertrouwen, in gerechticheyt ende ^t gherichte, in ghenade ende barmherticheyt.

s Hesek. 16.a.8.

t Of, oordeel

19

Ia in ghelooue wil ick my met dy verlouen, ende du salt den Heere bekennen.

C.20

Ter seluer tijt spreect de Heere, ^u† wil ick verhooren, ick wil den Hemel verhooren, ende de Hemel sal de Aerde verhooren.

u† An. sal ick antwoorden, ick, etc.

21

Ende de Aerde sal het koorn, den most ende olye verhooren, ende deselue sullen Iesreel verhooren.

22

Ende ick wilse my op Aerden tot zade behouden, ende my ouer die ontfermen, die in onghenaden was, ende tot dien segghen, dat mijn volck niet en was,

23

^x Du bist mijn volck: ende het sal seggen, Du bist mijn God.

x Roma. 9.c.25. 1.Pet. 2.b.10.