Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE PROPHEET Hosea.

Dat Eerste Capittel.

1. Hosea wort ghesonden te predicken teghen de Afgoderije Israels, 10. Item hoe Israel ende Iuda met tsamen den Heydenen, onder een hooft Christum, ghebracht worden souden.

A.1

DIt is het vvoort des Heeren, dat gheschiedt is tot Hosea den sone Beheri, ter tijt Vsia, Iothan, Ahas, ende Hiskia, der Koninghen Iuda, ende ter tijt Ierobeam, des soons Ioas, des Konincx Israels.

2

Ende doe de Heere begonst te spreken door Hosea, sprack hy tot hem: ^a Gaet henen, ende neemt een hoerenurouwe ende hoerekinderen: want het lant loopt vanden Heere, der hoererije na.

a Leuit. 21.b.13. Hesek. 44 c.22. Hosee 3.a.1.

3

Ende hy ginck henen, ende nam Gomer, de dochter Diblaim: die wert met kinde, ende baerde hem eenen sone.

4

Ende de Heere sprack tot hem: Heet hem Iesreel, want het is noch om een kleyne tijdt te doen, so wil ick de bloetschulden in ^b Iesreel te huys soecken, ouer het huys Iehu, ende wilt met den Konincrijcke des huyses Israels, een eynde maken.

b 1.Reg. 21.c.21.

5

Ter seluer tijt, wil ick den boghe Israels verbreken, inden dale Iesreel.

6

Ende sy wert noch eens met kinde, ende baerde een dochter, ende hy sprack tot hem: Heetse ^c LoRyhamo: want ick en wil my ouer het huys Israels, niet meer ontfermen, maer ick wilse wech worpen.

c Dat is, Sonder genade: want hy en woudese niet verlossen vanden Koninck Assur. 2.Reg. 17.c.23.

7

^d Doch wil ick my ontfermen ouer het huys Iuda, ende wil hen helpen, door den Heere haren God: ick en wil hen Ia niet helpen, door boghe, sweert, strijdt, peerden, oft ruyteren.

d Gene. 49.a.8. 2.Reg. 19.d.35.

8

Ende doe sy LoRyhamo ghespeenet hadde, wert sy wederom met kinde, ende baerde eenen sone.

9

Ende hy sprack: Heet hem ^e LoAmmi: want ghy en zijt mijn volck niet, so wil ick oock de uwe niet zijn.

e Niet mijn volc: want hy woude het Iodische volc eyndtlicken verlaten, ende haers Konincrijcx ende Priesterdoms, een eynde maken, als dan door het Euangelium gheschiet is, als korts hier na volget. Ioan. 19.b.15

B.10

^f Maer het ghetal der kinderen Israels sal zijn, als het zandt aen de Zee, datmen noch meten noch tellen en kan: ende het sal geschieden, aen der plasetse daermen tot hen gheseyt heeft: Ghy en zijt mijn volck niet: salmen tot hen segghen: O ghy kinderen des leuendighen Gods.

f Cap. ij. Luth. Roma. 9.c.27. Gene. 22.b.17.

11

^g Want de kinderen Iuda, ende de kinderen Israels, sullen te hoope komen, ende sullen hen met malcanderen aen een Hooft houden, ⁺ ende wt den lande daerop trecken: want den dach Israels sal een groot dach zijn.

g Hesek. 37.b.10.

+ Dat is van Christo ende den Euangelio, onder den Heydenen ende Ioden te predicken, geseyt: daer is een ander Hooft ende Konincrijcke geworden. Dit hooft is Iesus Christus.

12

Segghet uwen broederen: Sy zijn mijn volck: ende tot uwer ^h† suster: Sy zijn in ghenaden.

h† And. uwe susters,