Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE PROPHEET Daniel.

Dat Eerste Capittel.

1. Daniel wert met sommighe heerlicke Ionghelinghen gheuanckelick na Babel gheuoert, ende in des Konincx hof tot Konincklicken dienste opghetoghen, 8. leeft gantsch heylichlicken ende Godureesende, 17. ende wert van God wonderlicken begenadet ende verhoocht.

A.1

INden derden Iare des Rijcks ^a† Ioiakim des Konincx Iuda, quam NebucadNezar, de Koninck te Babel, voor Ierusalem, ende beleydese.

a† And. Iehoiakim

2

^b Ende de Heere gaf hem ouer Ioiakim den Koninck Iuda, ende sommige vaten wt den huyse Gods: ⁺ die liet hy voeren int lant Sinear, in zijns Gods huys, ende leyde de vaten in zijns Gods ^c† schattkisten.

b 2.Reg. 24.b.10. 2.Parali. 36.a.6.

+ Sinear, is het lant Babel. Gene. 10.

c† And. schatkameren.

3

Ende de Koninck sprack tot Aspenas synen ouersten Kamerlinck, ⁺ hy soude wt den kinderen Israels, ^d vanden Konincklicken stamme ende heerenkinderen, wtlesen,

+ Aspenas, des Konincx te Babel Kamerlinc.

d Iesaie 39.a.7.

4

Ionghelinghen die gheen ghebreck en hadden, maer schoone, vernuftighe, wijse, kloecke, ende verstandighe, die daer gheschickt waren, te dienen in des Konincx houe, ende te leeren Chaldeische schrift ende sprake.

[fol. 62r]

5

Sulcken verordende de Koninck, watmen hen daghelicx gheuen soude van syner spijse, ende van den wijne, dien hy selfs dranck: dat sy also dry Iaer lanck opghetoghen, daer na voor den Koninck dienen souden.

6

Onder welcke waren Daniel, Hanania, Misael ende Asaria, vanden kinderen Iuda.

7

Ende de ouerste Kamerlinck gaf hen namen, ende noemde Daniel, ^e Beltsazer, ende Hanania, Sadrach, ende Misael, Misach, ende Asaria, AbedNego.

e Daniel. 10.a.1.

8

^f Doch Daniel settede hem voor in syner herte, dat hy hem met des Konincx spijse, ende met den wijne, dien hy selfs dranck, niet verontreynighen en woude: ende badt den ouersten Kamerlinck, dat hy hem niet en dorste verontreynighen.

f Gen. 43.d.32. Tob. 1.b.12. Iudith. 12.a.2.

9

Ende God gaf Daniel, dat hem de ouerste Kamerlinck gunstich ende ghenadich wert.

B.10

Deselue sprack tot hem: Ick vreese my voor mynen heere den Koninck, die v, uwe spijse ende dranck verordent heeft: wanneer hy soude sien dat uwe aenghesichten iammerlicker waren, dan de andere Ionghelinghen ws ouders, so brachtet ghy my by den Koninck om mijn leuen.

11

Doe sprack Daniel tot Melzar, dien de ouerste Kamerlinck, Daniel, Hanania, Misael ende Asaria beuolen hadde,

12

Versoeckt het doch met dynen knechten tien daghen lanck, ende laet ons ^g† toemoes te eten gheuen, ende water te drincken:

g† And. ghemoes

13

Ende laet dan voor dy onse ghestalt, ende der Ionghelingen, die van des Konincx spijse eten, besien: ende daer na als du dan sien salt, daer na maeckt het met dyne knechten.

14

Ende hy hoorde harer daerin, ende versochte het met hen tien daghen lanck.

15

Ende na de tien daghen, waren sy schoonder ende beter by lijue, dan alle Ionghelinghen, die van des Konincx spijse aten.

16

Doe dede Melzar hare verordende spijse ende dranck henen wech, ende gaf hen toemoes.

17

Doch de God deser viere, gaf hen konst ende verstant, in allerley ^h schrift ende wijsheyt: Daniel doch, gaf hy verstandt in allen ghesichten ende droomen.

h Dat is, Sy leerden alle konste, die by den Chaldeen beschreuen waren.

18

Ende doe de tijt omme was, die de Koninck bestemt hadde, dat sy souden henen in gebracht worden, brachtse de ouerste Kamerlinc henenin voor NebucadNezar.

19

Ende de Koninck sprack met hen: ende daer en wert onder allen niemant geuonden, die Daniel, Hanania, Misael ende Asaria ghelijck ware, ende sy werden des Konincx dienaers.

C.20

Ende de Koninck vandtse in allen saken, daer hyse omme vraechde, tienmael kloecker ende verstandigher, dan alle ^i† Sterrenkijckers ende Wijsen, in synen gantschen Rijcke.

i† And. Waersegghers, etc. ende swerte konstenaers.

21

^k Ende Daniel leefde tot in het eerste Iaer des Konincx Cores.

k Danie. 6.c.28.