Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xlj. Capittel.

1. Hy bewijst hoe de Tempel ende de dinghen belanghende tot den dienste Gods, behooren herbouwet oft vermaeckt te zijne, ende in wat forme oft wijse.

A.1

ENde hy brachte my henenin inden Tempel, ende matt de bysetten aen den wanden, die waren aen eener yeghelicker sijden ses ellen wijdt, so wijdt als het gantsche huys was.

2

Ende de deure was tien ellen wijdt, doch de wanden tot beyden sijden aen der deure, was eene yeghelicke vijf ellen breedt: ende hy matt het ruym in den Tempel, dat hadde veertich ellen in de lengde, ende twintich ellen in de breydde.

3

Ende hy ghinck daerbinnen henenin, ende matt de deure, twee ellen: ende de deure hadde ses ellen, ende de wijdde der deure seuen ellen.

4

Ende hy matt twintich ellen in de lengde, ende twintich ellen in de breydde, aen den Tempel: ende hy sprack tot my: Dit is het Allerheylichste.

5

Ende hy matt de wandt des huys, ses ellen hooch: daer waren ganghen op ^a allenthaluen rontomme, gedeylet in ^b† ghemaken, die waren allenthaluen vier ellen wijdt.

a Of, allenthenen, oueral,

b† And. kameren

6

Ende der seluen ghemaken, waren op yeghelicker sijden, dry ende dertich, elcke een aen den anderen: ende daer stonden pijlaren beneden by den wanden aen den huyse, allenthaluen rondtomme, diese droeghen.

7

Ende bouen desen waren noch meer gangen rontomme, ende bouen waren de ghanghen wijdder, datmen van den ondersten in de middelsten, ende vanden middelsten in de bouensten ghinck.

8

Ende een stondt telcken ses ellen bouen den anderen.

9

Ende de wijdde der bouensten ganghen, was vijf ellen: ende de pijlaren droeghen de ganghen aen den huyse.

B.10

Ende het was telcken van eener wandt aen den huyse, tot der anderen, twintich ellen.

[fol. 59r]

11

Ende daer waren twee deuren aen den windelsteene henenop, eene teghent Noorden, de ander teghent Suyden: ende de windelsteen was vijf ellen wijdt.

12

Ende de muere teghent Westen, was vijf ende tseuentich ellen breedt, ende neghentich ellen lanck.

13

Ende hy matt de lengde des huys, die hadde door ende door hondert ellen, de muere ende wat daeraen was.

14

Ende de wijdde voor aen den huyse teghent Oosten, met dien dat daeraen stondt, was oock hondert ellen lanck.

15

Ende hy matt de lengde des ghebouwedes, met allen wat daeraen stondt, van eenen hoecke tot den anderen, dat was op yeghelicker sijden, hondert ellen, met den binnensten Tempel ende voorhuysen in den voorhoue,

16

Met tsamen den deuren, vensteren, hoecken, ende den dryen ghanghen ende ^c schrijnwerck allenthaluen rontomme.

c Of, schutzwerc.

17

Hy matt oock, hoe hooch dat het van der Aerden, tot den vensteren was, ende hoe breedt dat de vensteren zijn souden.

18

Ende matt van der poorte aen, tot den Allerheylichsten, binnen ende buyten rontomme.

19

Ende aen den gantschen huyse rontom, van beneden aen, tot bouen henenop aen de deure ende aen den wanden, waren Cherubim, ende palmloofwerck onder de Cherub ghemaket.

C.20

Ende een yeghelick Cherub hadde twee koppen, op ^d eener sijden als eenen menschen kop, op der anderen sijden, als een Leeuwen kop.

d Hesek. 1.b.10.

21

Ende de deure aen den Tempel was vierkant, ende alle dinck was behendich in malcanderen gheuoecht.

22

Ende de ^e houten Altaer was dryer ellen hooch, ende tweer ellen lanck ende breedt: ende syne hoecken ende alle syne sijden, waren houten: ende hy sprack tot my: Dat is de disch, die voor den Heere staen sal.

e Exod. 25.c.23.

23

Ende de deure beyde aen den Tempel ende dat Allerheylichste,

24

Hadde twee ^f† vleughelen, diemen op ende toe dede.

f† And. bladeren

25

Ende daer waren oock Cherubim ende palmloofwerck aen, als aen den wanden, ende daer waren stercke grendels voor, teghen den voorhuyse.

26

Ende daer waren enghe vensteren, ende vele palmloofwercks rontomme, aen den voorhuyse ende aen den wanden.