Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxix. Capittel.

1. Wijder van der straffe Gog, 22. oorsake, waeromme de Heere den seluen ende andere vyanden, ouer zijn volck komen late, 25. met toesegghen ghenadiger verlossinghe, wt harer gheuanckenisse.

A.1

ENde du menschen kindt, ⁺ propheteert tegen ^a Gog, ende spreeckt: Also spreeckt de Heere Heere: ^b Siet ick wil aen dy Gog, die du de ouerste Vorst bist in Mesech ende Thubal.

+ Gog.

a Apoc. 20.c.

b Hesek. 38.a.3.

2

Siet, ick wil dy omme ^c krommen ende ^d locken, ende wt den eynden vant Noorden brenghen, ende op de berghen Israels komen laten.

c Of, wenden

d Luth. Wat de Rabim hier met haren sexteren maken, dat laten wy varen: wy houdent met S. Hieronymo. Munst Met ses straffen straffen. Apoc. 20.b.7.

3

Ende wil dy den boghe wt dyner slincker handt slaen, ende dyne pijlen, wt dyner rechter handt werpen.

4

Op den berghen Israels saltu nedergheleydt worden, du met alle dynen Heyre, ende met den volcke, dat by dy is: ick wil dy den vogelen, waer sy henen vlieghen, ende den dieren op den velde te verslinden gheuen.

5

Du salt op den velde daer neder liggen, want ick de Heere Heere hebbe het gheseyt.

6

Ende ick wil vyer werpen op Magog, ende op die, die in den ^e Eylanden seker woonen, ende sullen ghewaer worden, dat ick de Heere ben.

e Dat is, In Gogs landt te huys salt oock branden.

7

Want ick wil mynen heylighen Name kondt maken, onder mynen volck Israels, ende en wil mynen Heylighen Name niet langer schenden laten: maer de Heydenen sullen ghewaer worden, dat ick de Heere ben, de Heylighe in Israel.

8

Siet, het is alreede ghekomen ende geschiet, spreeckt de Heere Heere: dat is den dach, daer ick van ghesproken hebbe.

9

Ende de burghers in den steden Israels, sullen daerwt gaen ende vyer maken, ende verbranden wapen, schilden, tartschen, boghen, pijlen, ^f† vuyststangen ende lange spiessen: ende sullen seuen Iaer lanck, ^g† vyerwerck daermede houden,

f† And. handtstocken

g† An. vyer ontsteken

B.10

Dat sy gheen houdt doruen halen op den velde, noch in den woude houwen, maer van den wapenen, sullen sy vyer houden: ende sullen beroouen de ghenen, van dien sy beroouet zijn, ende plonderen de ghenen, van dien sy geplondert zijn, spreeckt de Heere Heere.

11

Ende het sal ter dier tijdt gheschieden, dat ick Gog wil een stede gheuen, ter begraefnisse in Israel, namelicken het dal, daermen gaet aen de Zee teghent Oosten: also dat ghenen, die voor by gaen, hen daer voor ^h schuywen sullen, dewijle datmen aldaer Gog met synen hoopen, begrauen heeft, ende sal heeten, ⁱ Gogs hoopen dal.

h Dat is, de neuse voor den stancke toehouden.

i Dat is, Dat aldaer de groote veelheyt ende hoopen Gogs begrauen ligghen.

12

Het huys Israels nu salse begrauen, seuen Maenden lanck, op dat het landt ghereynighet worde.

13

Ia alle het volck in den lande, sal aen hen te begrauen hebben, ende sullen roem daer van hebben, dat ick dies daechs myne heerlicheyt bewesen hebbe, spreeckt de Heere Heere.

14

Ende sy sullen lieden wtscheyden, die ^k doorgaens in den lande rontomme gaen, ende met den seluen de doodengrauers, te begrauen de ouerghebleuen op den lande, op dat het ghereyniget worde: na seuen Maenden sullen sy daerna ^l ondersoecken.

k Of, alleweghe.

l Of, neerstelicken soecken, Oft sy alle begrauen zijn, oft waer noch yemandt ligghe onbegrauen.

15

Ende de ghenen die in den lande rontomme gaen, ende erghens eens menschen beenders sien, sullen een merckteecken daer by oprichten, tot dat hen de doodengrauers, oock in Gogs hoopendal begrauen.

16

So sal oock de stadt heeten, ^m Hamona: also sullen sy het landt reynighen.

m Heet een veelheyt oft een groot hoop.

17

Nu, du menschen kindt: So spreeckt de Heere Heere: ⁿ Segghet allen voghelen, werwaerts sy vlieghen, ende allen dieren op den velde: Versamelt v, ende koemt herwaerts, vindet v ^o allenthaluen ^p te hoope, tot mynen slachtoffer, dat ick v slachte, een groot slachtoffer op den berghen Israels, ende verslindet vleesch, ende suypet bloedt.

n Apoc. 19.b.17.

o Of, aen allen sijden, alomme, oueral.

p Sephan. 1.a.7.

18

Het vleesch der stercken sullet ghy verslinden, ende het bloedt der Vorsten op Aerden, sullet ghy suypen, der Rammen, der Hamels, der Bocken, der Ossen, die altemale vett ende wel ghemestet zijn.

19

Ende sullet het vette verslinden, dat ghy vol wordet, ende het bloedt suypen, dat ghy droncken wordet, van den slachtoffer, dat ick v slachte.

C.20

Versadighet v nu ouer mynen dissche, van Peerden ende Ruyteren, van Stercken ende allerley Krijchslieden, spreeckt de Heere Heere.

21

Ende ick wil myne heerlicheyt onder de Heydenen brengen, dat alle Heydenen sien sullen, mijn

[fol. 58r]

oordeel, dat ick hebbe gaen laten, ende myne handt, die ick aen haer gheleyt hebbe,

22

Ende also het huys Israels ghewaer worde, ⁺ dat ick de Heere haer God ben, van dien daghe aen ende voordtaen.

+ Daer staet het, dat Gog, om onser sonde wille machtich zy, ende so vele onghelucks, ende so menigen strijdt behouden hebbe.

23

Ende oock alle Heydenen ghewaer worden, hoe het huys Israels omme syner misdaedt wille, sy wech geuoeret, ende dat sy hen aen my besondighet hadden: daerom hebbe ick mijn aenghesichte voor hen verberghet, ende hebse ouerghegeuen, in de handen harer wederpartijders, dat sy altemael door het sweerdt vallen moesten.

24

Ick hebbe hen ghedaen, als hare sonde ende ouertredinghe verdienet hebben, ende also mijn aenghesichte voor hen verberghet.

25

Daeromme so spreeckt de Heere Heere: Nu wil ick de gheuanckenisse Iacobs wenden, ende my des gantschen huys Israels ontfermen, ende omme mynen Heylighen Name ^q ijueren.

q Dat is, hertenbrandt draghen.

26

Sy nu sullen hare smaetheydt, ende alle hare sonde, daer sy hen aen my besondighet hebben, draghen, wanneer sy slechs seker in haren lande woonen moghen, datse niemandt en verschricke.

27

Ende ickse slechs weder van den volcken ghebracht, ende wt den landen harer vyanden versamelt hebbe, ende ick in hen gheheylicht gheworden ben, voor den ooghen veler Heydenen.

28

^r Also sullen sy ghewaer worden, dat ick de Heere haer God ben, die ickse hebbe laten onder de Heydenen wechuoeren, ende wederom in haer landt laten versamelen, ende niet eenen van hen, daer ghelaten en hebbe.

r Hesek. 36.c.22.23.24. Iesa. 44.a.3. Ioel. 2.c.28. Act. 2.b.17.

29

Ende en wil mijn aengesichte niet meer voor hen verbergen: want ick hebbe mynen Gheest, ouer het huys Israels wtgheghoten, spreeckt de Heere Heere.