Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxv. Capittel.

1. Uerstooringhe des gheberchs Seir, dat is, der Edomiters, daerom dat sy de kinderen Israels beleeedigen of verdruckten ende hateden.

A.1

ENde des Heeren woordt gheschiedde tot my, ⁺ ende sprack:

+ Seir.

2

Du menschen kindt, richtet dijn aenghesichte teghen het geberchte ^a Seir, ende propheteert daer teghen,

a Iesai. 34.a.5. Ierem. 49.a.7. Hesek. 25.b.12. ende 32.c.29. ende 36. a.5.

3

Ende spreeckt tot denseluen: So spreeckt de Heere Heere: Siet, ick wil aen dy, du berch Seir, ende mijn handt teghen dy wtstrecken, ende wil dy gantsch woest maken.

4

Ick wil dyne steden eensaem maken, dat du salt tot eener woestijne worden, ende ghewaer worden, dat ick de Heere ben.

5

^b Daerom, dat ghy eewighe vyandtschap draghet, teghen de kinderen Israels, ende iaechdese int sweert, doe het hen qualick ghinck, ende hare sonde een eynde hadde.

b Nume. 20.b.18. Deute. 2.a.3. Obad. b.10.

6

Daerom so warachtich als ick leue, spreeckt de Heere Heere, wil ick dy oock bloeden maken, ende en salt den bloeden niet ontgaen: ^c dewijle dat du lust tot bloet hebst, en saltu dijn bloeden niet ontgaen.

c 1.Mach. 5.a.3.

7

Ende ick wil den berch Seir woest ende eensaem maken, dat niemaendt daer op wandelen noch gaen en sal.

8

Ende wil zijn gheberchte, ende alle kleyne berghen, dalen ende alle ^d leechten, vol dooden maken, die door het sweerdt sullen verslaghen daer ligghen.

d Of, gronden,

9

Ia tot eener eewiger woestijne wil ick dy maken, dat niemandt in dynen steden woonen en sal: ende sullet ghewaer worden, dat ick de Heere ben.

B.10

Ende daerom, dat du spreectst: ^e Dese beyden volcken met beyden landen, moeten myne worden, ende wy willense innemen, ^f† wanneer oock alreede de Heere daer woonet.

e Namelicken: Iuda ende Israel.

f† And. ende de Heere was daer. Exod. 25.c.22.

11

Daerom, so warachtich als ic leue, spreeckt de Heere Heere, wil ick na dynen toorne ende hate, met dy omgaen, als du met hen omghegaen hebst, wt enckelen hate, ende wil by hen bekendt worden, wanneer ick dy ghestraffet hebbe.

12

Ende salt ghewaer worden, dat ick de Heere, alle dijn lasteren ghehoort hebbe, dat du gesproken hebst, teghen het gheberchte Israels, ende gheseyt: Sy zijn verwoestet, ende ^g† ons te verderuen ghegheuen.

g† An. ter spijse

13

Ende hebt v tegen my beroemt, ende heftich teghen my ghesproken, dat hebbe ick ghehoort,

14

So spreeckt nu de Heere Heere: Ick wil dy tot eener woestijne maken, dat hem alle het landt, verheughen sal.

15

^h Ende als du dy verheughet hebst, teghen het erue des huys Israels in te nemen, daerom, dat het was woest gheworden: euen so wil ick met dy doen, dat de berch Seir woest zijn moet, met tsamen den gantschen Edom: ende sullet ghewaer worden, dat ick de Heere ben.

h Hese. 25.a.6.b.13 ende 26.a.2.