Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxij. Capittel.

1. Een klaghe ouer Pharao, 11. ende zijn volck, 22. met aenwijsinghe, dat sy, als andere Koningen ende volcken, met heerlicheydt ende pracht ondergaen, ende een eynde nemen sullen.

A.1

ENde het begaf hem inden twaelfsten Iare, aen den eersten daghe der twaelfster maendt, gheschiedde des Heeren woort tot my, ende sprack:

2

Du menschen kindt, maeckt een weeklaghe ouer ^a Pharao den Koninck te Egypten, ⁺ ende spreeckt tot hem: Du bist ghelijck als een Leeuwe onder den Heydenen, ende als een Zeedrake, ende springhest in dynen waterstroomen, ende vermorest het water met dynen voeten, ende maecktst syne stroomen onreyn.

a Hesek. 29. 30. 31.

+ Pharao.

3

So spreeckt de Heere Heere: ^b Ick wil mijn nette ouer dy wtwerpen, door eenen grooten hoop volcx, die dy sullen in mijn garen iaghen.

b Hesek. 12.b.13. ende 17.c.20.

4

Ende wil dy op het landt trecken, ende op het veldt werpen, dat alle voghelen des Hemels op dy sitten sullen, ende alle gedierten op Aerden, van dy satt worden:

5

Ende wil dijn aes, op de berghen werpen, ende met dyner hoochte, de dalen veruullen.

6

Het landt daer du in swemmest, wil ick van dynen bloede root maken, tot aen de berghen henen aen, dat de beken van dy vol worden.

7

^c Ende wanneert nu gantsch met dy wt is, so wil ick den Hemel bedecken, ende syne Sterren verduysteren, ende de Sonne met wolcken ouertrecken, ende de Maen en sal niet schijnen.

c Iesai. 13.b.10. Ioel 2.d.31. ende 3.b.15. Matth. 24.c.29. Marc. 13.c.24. Luc. 21.c.23.

8

Alle lichten aen den Hemel, wil ick ouer dy laten doncker worden, ende wil een duysternisse in dynen lande maken, spreeckt de Heere Heere.

9

Daer toe wil ick veler volcken herten verschrickt maken, wanneer ick den Heydenen dyne plaghe ghewaer worden late, ende velen landen, die du niet en kenst.

B.10

Vele volcken sullen hen ouer dy ontsetten, ende haren Koninghen sal voor dy grouwen, wanneer ick mijn sweert teghen haer blincken late: ende sullen ^d op denseluen ooghenblicke verschricken, dat hen het herte ontuallen sal ouer dynen val.

d Of, in nu

11

Want so spreeckt de Heere Heere: Het sweert des Konincx te Babel, sal dy treffen.

12

Ende ick wil dijn volck vellen, door het sweert der Helden, ende door allerley Tyrannen der Heydenen, die sullen de heerlicheyt Egypti verheeren, dat alle haer volck verdelghet worde.

13

Ende ick wil alle ghedierten ombrenghen, aen den grooten wateren, datse gheens menschen voet, ende gheens ghedierten klauwe, onreyn maken en sal.

14

Als dan wil ick hare wateren klaer maken, dat hare stroomen vlieten, als olye, spreeckt de Heere Heere.

15

Wanneer ick het landt Egypten verwoestet, ende alles wat in den lande is, eensaem ghemaeckt, ende alle die daer in woonen, verslagen hebbe: dat sy gewaer worden, dat ick de Heere zy.

16

Dat sal den iammer zijn, dienmen wel mach beklagen: Ia vele dochteren der Heydenen, sullen sulcke klage drijuen ouer Egypten, ende alle haer volck salmen beklaghen, spreeckt de Heere Heere.

17

Ende in den twaelfsten Iare, aen den vijfthienden daghe derseluer maent, geschiedde des Heeren woort tot my, ende sprack:

18

Du menschen kindt, beweent het volck in Egypten, ende stoote het met den dochteren der stercker Heydenen henen af ^e onder de Aerde, tot dien, die in de kuyle varen.

e Iesai. 14.b.15. Hesek. 31.b.16.

19

Waer is nu dyne wellust? henen onder, ende legghet dy by de onbesnedenen.

C.20

Sy sullen vallen onder den verslaghenen met den sweerde: het sweert is alreede gheuatet ende wtghetoghen, ouer haer gantsche volck.

21

Daer van sullen seggen in der Helle, de stercke Helden met haren helpers, die alle henen onder gheuaren zijn, ende ligghen daer onder den onbesnedenen ende verslagenen van den sweerde.

22

Aldaer leyt Assur met alle synen volcke om henen begrauen, ⁺ die alle verslaghen ende door het sweert gheuallen zijn.

+ Assur.

23

Hare dooden grauen zijn diepe inder kuylen, ende zijn volck leyt ^f allenthaluen om henen begrauen, die alle verslaghen ende door het sweert gheuallen zijn, daer haer de gantsche wereldt voor vreesde.

f Oft, allenthenen, oueral,

24

Daer leyt oock ^g Elam met alle synen hoop om henen begrauen, ⁺ die alle verslaghen, ende door het sweert gheuallen zijn, ende henen onder gheuaren als de onbesnedenen, onder de Aerde, daer haer oock de gantsche werelt voor vreesde, ende moeten hare schande draghen met dien, die in de kuyle varen.

g Iere. 49.d.34. Danie. 8.a.2.

+ Elam.

25

Men heeftse onder de verslagene geleyt, met tsamen alle haren hoopen, ende liggen om henen begrauen, ende zijn alle als de onbesnedenen, ende de verslaghenen van den sweerde, voor dien haer oock de gantsche werelt vreesen moeste: ende moeten hare schande dragen met dien, die in de kuyle varen, ende onder den verslaghenen blijuen.

26

Daer leyt Mesech ende Thubal, ⁺ met alle haren hoopen, ⁺ om henen begrauen, die alle on-

+ Mesech.

+ Thubal.

[fol. 55r]

besneden ende met den sweerde verslaghen zijn, voor dien haer oock de gantsche wereldt vreesen moeste.

27

Ende alle andere Helden, die onder den onbesnedenen gheuallen zijn, ende met harer krijchsweere ter Hellen gheuaren, ende hare sweerden onder hare hoofden hebben legghen moeten, ende hare misdaet ouer hare gebeenten ghekomen is, die doch oock gheureesde Helden waren, in der gantscher werelt: also moeten sy ligghen.

28

So moestu vrijlick oock onder den onbesnedenen vermorselt worden, ende onder dien, die met den sweerde verslaghen zijn, ligghen.

29

Daer leyt ^h Edom met synen Koninghen, ⁺ ende alle synen Vorsten, onder den verslaghenen met den sweerde, ende onder den onbesnedenen, met tsamen anderen, die in de kuyle varen, die doch machtich gheweest zijn.

h Ierem. 49.a.7. Hesek. 25.b.12. ende 35.a.1.

+ Edom.

D.30

Ia alle Vorsten vant Noorden moeten daer henen, ende alle Zidoniers, die met den verslaghenen henen af gheuaren zijn: ende hare verschrickelicke ghewelt, is te schanden geworden, ende moeten ligghen onder den onbesnedenen, ende dien, die met den sweerde verslaghen zijn: ende hare schande draghen, met tsamen dien, die in de kuyle varen.

31

Dese sal Pharao sien, ende hem troosten met alle synen volcke, die onder hen met den sweerde verslaghen zijn, ende met synen gantschen heyre, spreeckt de Heere Heere.

32

Want de gantsche wereldt sal haer oock eenmael voor my vreesen, dat Pharao ende alle zijn hoopen, sal ligghen onder den onbesnedenen, ende met den sweerde verslaghen, spreeckt de Heere Heere.