Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxj. Capittel.

1. Pharao den Koninck in Egypten wordt aenghetooghet, dat, ghelijck hy den Assyriers in heerlicheydt ende gheweldt ghelijck ware gheweest, hy oock also denseluen in onderganghe ghelijck zijn sal.

A.1

ENde het begaf hem in den elfsten Iare, aen den eersten daghe der derder maent, gheschiedde des Heeren woordt tot my, ende sprack:

2

^a Du menschen kindt, ⁺ segghet Pharao den Koninck te Egypten, ende tot allen synen volcke: Wien meynstu dan, dat du gelijck bist in dyner heerlicheyt?

a Hesek. 29. 30. 32.

+ Pharao.

3

Siet, ^{+ b} Assur was als een Cederenboom op den Libanon, van schoonen tacken, ende dicke van looue, ende gantsch hooch, dat synen ^c tsop hooch stondt, onder grooten dicken tacken.

+ Assur.

b Danie. 4.a.9.

c Of, wippe

4

De wateren maeckten, dat hy groot werdt, ende de diepten, dat hy hooch wies: syne waterstroomen ghinghen rontomme synen stamme henen, ende syne beken tot allen boomen in den velde.

5

Daerom is hy hoogher gheworden, dan alle boomen op den velde, ende kreech vele tacken, ende langhe ^d scheuten, want hy hadde waters ghenoech, hem wt te breyden.

d Oft, meyen,

6

Alle vogelen des Hemels nestelden op synen tacken, ende alle gedierten in den velde, hadden ionghen onder synen meyen, ende onder syner schaduwe woonden alle groote volcken.

7

Hy hadde schoone, groote ende lange tacken, want syne wortelen hadden vele waters.

8

Ende hem en was gheen Cederenboom ghelijck, in Gods houe, ende de Dennenboomen, en waren synen tacken niet te verghelijcken, ende de ^e† Amandelboomen en waren niets teghen syne meyen: Ia hy was so schoone, als gheen boom in den houe Gods.

e† An. Castaneen of, Ahornen.

9

Ick hebbe hem so schoone ghemaeckt, dat hy so vele tacken kreech, dat hem alle lustighe boomen in den houe Gods benijdden.

B.10

Daeromme spreeckt de Heere Heere also: Dewijle hy so hooch gheworden is, dat synen tsop stondt onder grooten, hooghen, dicken meyen, ende zijn herte hem verhief, dat hy so hooch was,

11

Daeromme gaf ick hem den ^f allermachtichsten onder den Heydenen in de handen, dat hy met hem omghinghe, ende hem verdreue, als hy verdienet hadde, met synen Godloosen wesen.

f Want de Koningen te Babel hebben het Konincrijck Assur ende Niniue, recht te voren opghegheten, eer Ierusalem verstooret wert.

12

Dat hem vreemde wtroeyen souden, namelicken, de Tyrannen der Heydenen, ende hen verstroyen: ende dat syne tacken, op den bergen, ende in allen dalen, ligghen moesten, ende syne

[fol. 54v]

meyen ^g verbroken, aen allen beken in den lande: dat alle volcken op Aerden, van syner schaduwe wech trecken moesten, ende hem verlaten,

g Of, in tween ghebroken,

13

Ende alle voghelen des Hemels, op synen omgheuallen stamme saten, ende alle ghedierten in den velde, leyden hen op syne tacken.

14

Op dat hem voort aen gheen boom aen den water, syner hoochte verhieue, dat synen toppe onder grooten dicken meyen stae, ende gheen boom aen den water hem verhieue ouer de anderen: want sy moeten alle onder de Aerde ende den doot ouergegeuen worden, als andere menschen, die in de kuyle varen.

15

So spreeckt de Heere Heere: Ter tijdt, doe hy henen onder in de Helle voer, doe maecte ick een treuren, dat hem de diepte bedeckede, ende syne waterstroomen stille staen moesten, ende de groote wateren niet loopen en konden: ende maeckte, dat de Libanon om hem treurde, ende alle veltboomen verdorreden ouer hem.

16

Ick verschrickede de Heydenen, doe sy hem hoorden vallen, doe ick hem henen onder stiete ter ^h Hellen, met dien, die in de kuyle varen: ende alle lustighe boomen onder der Aerden, de edelsten ende de besten op den Libanon, ende alle die aen den water ghestaen hadden, gonnedent hem wel.

h Iesai. 14.b.15. Hesek. 32.b.18.

17

Want sy moesten oock met hem henen onder ter Hellen, tot den verslagenen met den sweerde, dewijle sy onder de schaduwe zijns arms gewoont hadden, onder den Heydenen.

18

Hoe groot meynstu dan, dat du [Pharao] zijst, met dynen prale ende heerlicheydt, onder den lustighen boomen? want du moest met den lustighen boomen, onder de Aerde henen af varen, ende onder den onbesnedenen ligghen, die met den sweerde verslagen zijn: also sal het Pharao gaen, met tsamen alle synen volcke, spreect de Heere Heere.