Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxj. Capittel.

1. Ierusalem wort grousaemlicken met den sweerde ghedreycht, 18. ouer die ende Rabbath, neemt NebucadNezar een waerseggersteecken, 25. Zedekia hoort syne vernederinge, 28. ende de Ammoniters hare verstooringe.

A.1

ENde des Heeren woordt gheschiedde tot my, ende sprack:

2

Du menschen kindt, rechtet dijn aenghesichte teghen Ierusalem, ende druppet teghen de Heylichdommen, ende propheteert tegen het landt Israels,

3

Ende spreect totten lande Israels: So spreect de Heere: ^a Siet, ick wil aen dy: ick wil mijn sweerdt wt der scheyden trecken, ende wil in dy wtroeyen, beyde rechtueerdighe ende onrechtueerdighe.

a Iesai. 1.d.31.

4

Dewijle ick dan in dy, beyde den rechtueerdighen ende onrechtueerdighen wtroeye, so sal mijn sweert wt der scheyden varen, ouer alle het vleesch, vant Suyden af totten Noorden.

5

Ende alle het vleesch sal ghewaer worden, dat ick de Heere mijn sweerdt hebbe wt syner scheyden ghetoghen, ende het en sal niet weder inghesteken worden.

6

Ende du menschen kindt salt suchten, ^b tot dat dy de lendenen wee doen, Ia bitterlicken saltu suchten, dat sy het sien.

b Tren. 1.c.20. ende 2.b.11.

7

Ende wanneer sy tot dy segghen sullen: Waerom suchtestu? so saltu segghen: Om des gheschreys wille, dat daer koemt, voor welcken alle herten vertzagen, ende alle handen sincken, aller moet vallen, ende alle knyen, als water gaen sullen: siet het koemt, ende sal gheschieden, spreect de Heere Heere.

8

Ende des Heeren woort gheschiedde tot my, ende sprack:

9

Du menschen kint, propheteert ende spreect: So spreeckt de Heere: ^c Het sweert is ghescherpet ende wtgheuaghet.

c Psalm. 7.b.13.

[fol. 50v]

B.10

Het is ghescherpet, dat het slachten sal: het is wtgheuaghet, dat het blincken sal, ^c† O hoe vrolick wouden wy zijn, wanneer hy oock alreede alle ^d boomen tot roeden makede, ouer de boose kinderen.

c† And. souden wy ons dies verheughen? de roede is mijns soons, sy verachtet alle hout.

d Hy dreycht, de straffe en sal geen gheesselen ende kinder straffen zijn, daer beteringe na volghe: maer het sal ijdel toorne ende gantsch met hen wt zijn: daerom wenschede hy wel, dat het een scherpe roede ware, Ia dat alle boomen tot roeden gemaect waren, so doch, dat het niet ijdel toorne en ware. Maer hy spreeckt daerna: God heeft het dicmael versocht met der roeden, maer het en hebbe niet gheholpen, daerom moet nu het sweert komen.

11

Nu hy heeft een sweerdt wt te vaghen ghedaen, datmen het vaten sal: het is ghescherpet ende wtgheuaghet, datmen het den dootslagher in de handt gheue.

12

Schreyet ende huylet, du menschen kindt: want het gaet ouer mijn volck, ende ouer alle Regenten in Israel, die ten sweerde, met tsamen mynen volcke, versamelt zijn: daerom slaet op dyne lendenen,

13

Want hy heeftse dickmael ghetuchtiget, wat heeft het gheholpen? der boosen kinderen roede en wil niet helpen, spreeckt de Heere Heere.

14

Ende du menschen kindt, propheteert ende slaet dyne handen tesamen: want het sweerdt sal dobbel, Ia dryuuldich komen: een worchsweert, een sweerdt eener grooter slachtinghe, datse oock treffen sal in den kameren, daer sy henen vlieden.

15

Ick wil dat sweert laten klincken, dat de herten vertzaghen, ende vele vallen sullen aen alle haren poorten: Ach hoe klinckt het, ende houwet daer henen ter slachtinghe,

16

[Ende spreken:] Houwet daer onder, beyde ter rechter ende slincker zijden, wat voor dy is.

17

So wil ick dan met mynen handen vrolic daer ouer zijn, ende mynen toorne gaen laten: ick de Heere hebbe het gheseyt.

18

Ende des Heeren woort gheschiedde tot my, ende sprack:

19

Du menschen kindt, maeckt twee weghen, door welcke komen sal het sweert des Konincx te Babel: sy sullen Ia alle beyde wt eenen lande gaen: ende setten een teecken voor aen den wech na der stadt, daer het henen wijsen sal.

C.20

Ende maeckt den wech, dat het sweerdt kome te Rabbath der kinderen Ammon, ende in Iuda, tot der vaster stadt Ierusalem.

21

Want de Koninck te Babel, sal hem aen de wechscheydinghe setten, voor aen den tween weghen, ^e dat hy hem waersegghen late, met den pijlen om het ^f lott schiete, synen Afgod vraghe, ende sie de leuer aen.

e Leuit. 10.d.31. ende 20.a.6. Deute. 18.b.11.

f De Koninc van Babel sal syne Waerseggers vragen, welck volck hy aengrijpen sal, ende waer het hem gelucken sal, ende sal teecken versoecken, als namelicken schieten, ende achtinge hebben, waer den pijl henen vallen wil: want sodanich teecken hebben deselue krijghers ghebruyct. So was dat oock een teecken, wanneer de Heydenen offerden, so besachmen de leuer ende het herte.

22

Ende de waersegginghe sal op de rechte zijde na Ierusalem bedieden, dat hy soude bocken henen aen voeren laten, ende holen maken, ende met grooten gheschrey oueruallen ende moorden: ende dat hy bocken voeren soude tegen de poorten, ende daer eenen wall maken, ende daer bolwercken bouwen.

23

Doch sulck voorsegghen sal hem valsch duncken, hy sweere so diere als hy wil: doch hy sal dencken aen de misdaet, dat hyse ghewinne.

24

Daerom spreeckt de Heere Heere also: Daerom, dat uwer ghedacht wordt, om uwer misdaet wille, ende uwe ongehoorsaemheyt gheopenbaert is, datmen uwe sonde siet in alle uwen doen: Ia daerom, dat uwer ghedacht wort, sullet ghy met ghewelt gheuanghen worden.

25

Ende du Vorst in Israel, die du verdoemt ende veroordeelt bist, diens dach daer henen komen sal, wanneer de misdaedt ten eynde ghekomen is.

26

So spreeckt de Heere Heere: Doet wech den hoedt, ende neemt af de kroone: want daer en sal noch hoedt noch kroone blijuen: maer ^g die hem verhooget heeft, die sal vernedert worden, ende die hem vernedert heeft, die sal verhooghet worden.

g Matth. 18.a.4. ende 23.b.11. Luc. 14.b.11. ende 18.b.14.

27

Ick wil de kroone te niete, te niete, te niete maken, tot dat hy kome, diese hebben sal, dien wil ickse gheuen.

28

Ende du menschen kindt, propheteert ende spreeckt: ⁺ So spreeckt de Heere Heere ^h van den kinderen Ammon, ende van haren lasteren: ende spreeckt: Het sweert, het sweert is wtgheruckt, dat het slachten sal, het is wtgheuaghet, dat het ⁱ worghen sal, ende blincken.

+ Ammon.

h Ierem. 49.a.1. Hesek. 25.a.1. Amos. 1.b.13.

i Dat is, haest rooden ende moorden sal.

29

Daerom, dat du dy valsche ghesichten seggen laetst, ende leughen propheteren: op dat du oock ouerghegheuen wordest onder den verslagenen Godloosen, welcker haren dach quam, doe de misdaet ten eynde ghekomen was.

D.30

Ende wanneert alreede weder in de scheyde gesteecken worde, so wil ick dy doch richten aen der plaetsen, daer du geschapen, ende inden lande, daer du gheboren bist.

31

Ick wil mynen toorne onder dy ghieten, ick wil het vyer myner grimmicheyt ouer dy opblasen, ende wil dy lieden, die branden ende verderuen konnen, ouerleueren.

32

Du moest den vyere ter spijse worden, ende dijn bloedt moet in den lande vergoten worden: ende men sal dyner niet meer ghedencken, want ick de Heere hebbe het ghesproken.